Yeshaya 14 - Mukanda wa Nzambi Dihungila Dikulukulu ne Dihungila Dihia-dihia 2003

Badi Babela Mukelenge wa Babulona

¹ Bualu bua Yehowa neafuile Yakoba luse, neasungule ba mu Bena Isalele bu bantu bandi kabidi, ne neabashikike mu buloba buabo bua diambedi. Bantu ba bende nebadisangishe nʼabo, nebadilamike kudi ba mu bana ba Yakoba.

² Ba mu bisamba bia ba bende nebabangate, nebabafile ku muaba wabo. Ba mu Bena Isalele nebadiangatshile bantu aba bu buhianyi buabo mu buloba bua Yehowa bua kuikalabo bahika babo balume ne bahika babo bakashi. Nunku nebabueshe bantu aba mu buhika bakadi bababuesha mu buhika diambedi, ne nebakokeshe ku mutu kua bakadi babakengesha.

³ Hashishe, mu difuku adi hakukuha Yehowa dikisha ku dikenga diebe ne ku malu akadi akutatshisha ne ku mudimu mukole wakakuenzeshabo ku bukole,

⁴ neubange kuimba musambu eu wa kutshimbisha nʼau mukelenge wa mu Babulona. Newambe biebe ne, Mona mudi mutukengeshi muholeshibue, ne mudi tshiji tshiandi tshiakudibandisheye nʼatshi tshihuwishibue!

⁵ Yehowa wakutshibula mulangala wa bantu babi, dikombo mene dia bakokeshi,

⁶ bakadi bakuma bantu mu tshiji tshiabo, babakuma ne mikumu yakadi kayiyi ne ndekelu, bakadi bakokesha ba mu bisamba bia bantu ne luonji, babakengesha ne dikenga diakadi muntu kayi mua kukanda.

⁷ Ba ha buloba honso badi ne dikisha, badi ne ditalala, badi babisha mei abo mu kuimba kua musambu.

⁸ Mitshi ya cyprès mene idi isanka bua kubutuka kuebe, ne mitshi ya cèdre ya mu Lebanona kabidi idi yamba ne, Katshia wahuekeshibua kakuena muena tshisui wakulua bua kututaha.

⁹ Muaba wa Bafue udi muinshi mua buloba udi mubishibue bua kukuakidila hawafikamu, udi ukusonsuela bafue, bakokeshi banene bonso ba ha buloba mene, bua kukuakidilabo; udi ujula bakelenge bonso ba bisamba bia bantu mu nkuasa yabo ya bukelenge.

¹⁰ Buonso buabo nebakukudimune dî, nebakuambile ne, Wewe kabidi wakulua mutekete bu tuetu, anyi? Bakukufuanyishisha bu tuetu, anyi?

¹¹ Butumbi buebe buakuhuekeshibua tô ne ku Muaba wa Bafue, ne mutoyi wa nzenze yebe kabidi; bikusu bidi biadisha bu bulalu muinshi muebe, ne bikusu bidi tshibuikidilu tshiebe.

¹² Mona muwakuluka mu diulu, wewe mutoto wa nkesha, muana wa lunkelu! Mona muakukushimbulabo tô ne hanshi ha buloba, wewe nguashimbula bisamba bia bantu!

¹³ Wewe wakamba mu mutshima webe ne, Nembande mu diulu, nembandishe nkuasa wanyi wa bukelenge mulu ha mutu ha mitoto ya Nzambi; nenshikame bianyi ha mutu ha mukuna wa disangisha kunfudilu kua luseke lua nôde.

¹⁴ Nembande kulu ha mutu ha matutu, nendivuishe bu Nzambi Mutambe wa Mulu.

¹⁵ Kadi neuhuekeshibue tô ne ku Muaba wa Bafue, ku ndekelu wa Tshina tshia Bafue.

¹⁶ Badi bakumona nebakujoshe bikole, nebakuelele meji ne, Eu mmuntu wakazakasha buloba, wakakankisha makelenge, anyi?

¹⁷ Eu nyeye wakavuisha buloba bu tshihela, wakabutula misoko yabu, wakahidia kulekela bena lukanu hua kuhinganabo kuabo, anyi?

¹⁸ Banfumu bakuabo ba bisamba bia bantu, buonso buabo mene, badi balala munkatshi mua butumbi, muntu ne muntu mulale mu majambu andi;

¹⁹ kadi wewe wakumushibua mu majambu ebe bu muana wa kabishi udibo bahetula, udi muluatshishibue bitalu bia bantu bashihibue, bakasompolabo ne muele wa nvita, badi bahueka tô ne ku mabue a mu Tshina, bu tshitalu tshidiatshibue muinshi mua makasa.

²⁰ Wewe kuena usangishibue nʼabo mu dijikibua diebe, bualu bua wakubutula buloba buebe, wakushiha bantu bebe. Kabena batela mena a tunkanunuina tua benji ba malu mabi tshiendelele!

²¹ Longoluelai bana bandi tshishihelu bualu bua malu mabi a batatu babo, bua kabajuki bua kuangatabo buloba bu biuma biabo, ne bua kabûshi buloba tente ne bimenga biabo.

²² Yehowa wa misumba udi wamba ne, Nenjuke bua kubaluisha, nengumushe ku Babulona badi babikidibue ku dina diau ne difuka dia bantu bau didi dishala, muana mulume ne muikuluʼandi, mmudi Yehowa wamba.

²³ Yehowa wa misumba udi Wamba ne, Nenvuishe musoko eu muaba wa nkese ne muaba wa bintampi. Nenkombemu ne lukombo lua kubutula nʼalu.

Nebabuele Bena Ashû

²⁴ Yehowa wa misumba wakuditshiha, wamba ne, Bulelela, bu munakuhangidisha bua kuenza, bualu nebuenjibue; bu nuina kusungula mu mutshima wanyi, nebujalame muomumue,

²⁵ mbua kutshibula Muena Ashû bituha mu buloba buandi, nemmudiate muinshi mua makasa anyi ha mutu ba mikuna yanyi; hashishe, mutshi wandi wa tshikokedi neûmushibue ba nshingu ya bantu banyi, ne bujitu buandi nebûmuke ha maha abo.

²⁶ Ebu mbualu bunakuhangidisha bua kuenzela ba ha buloba bonso; etshi ntshianza tshidi tshiolola ha mutu ha bisamba bionso.

²⁷ Bualu bua Yehowa wa misumba wakuhangidisha bualu, ne muntu kai neamanye mua kubuvuisha hatuhu? Yeye wakuolola tshianza tshiandi, muntu kai neatshihingashe ku nyima?

Dî dia Yehowa bualu bua Bena Peleshete

²⁸ Mu tshidimu tshiakafua mukelenge Ahaza muakamueneka dî edi dia tshijila ne,

²⁹ Nuenu ba mu Peleshete, buonso buenu, kanusanki bualu bua tshibonge tshiakanututabo nʼatshi tshiakutshibuka, bualu bua nyoka wa dikala neahatuke mu muji wa nyoka, ne muana udi dikala dilela neikale nyoka udi uhahala ne udi utema bu kahia.

³⁰ Banʼa bute ba bahele nebikale ne bia kudia, ne bakengi nebalale tulu kabayi ne ntatu; kudi nenshihe ba ku muji webe ne tshiole, ne bantu bebe badi bashala ne muoyo nebashihibue.

³¹ Ela mukunda, wewe tshibuelelu tshia ku musoko; asa muadi, wewe musoko! Fingaluka ne buowa, wewe buloba bua Peleshete, buloba buebe buonso! Bualu bua muishi wa kahia udi uluhuka mu luseke lua nôde, ne kakuena muendi wa bitulu mu milongo ya bena mata bau.

³² Nunku muntu neamanye mua kukudimuna miloho ya tshisamba etshi dî kai? Neambe ne, Yehowa wakujadika Siona, ne bantu bandi bakengeshibue nebasanganemu tshinyemenu.