Yeshaya 13 - Mukanda wa Nzambi Dihungila Dikulukulu ne Dihungila Dihia-dihia 2003

Dî dia Yehowa bualu bua Babulona

¹ Dî dia tshijila bualu bua Babulona diakunvuabo kudi Yeshaya, muana wa Amoza.

² Bisha dibendela ha mutu ha mukuna udi kauyi ne mitshi hamʼbidi hau, ubabikile ne dî dikole; kuha tshianza bua bantu babuele biabo mu bibuelelu bia bakokeshi banene.

³ Nakuelela bakudijidila kundi mukenji; nakubikila bena bukitu banyi, bantu banyi badi batumbila ku outumbi buanyi, bua kuenza mudimu udi tshiji tshianyi tshiamba.

⁴ Unvuai, tshiona tshia mbila mu mikuna tshidi bu tshia tshisumbu tshinene tshia bantu! Unvuai, mutoyi udiku wa tshintompantompa tshia makelenge a bisamba bia bantu badi badikunguisha hohamue! Yehowa wa misumba udi usangisha musumba wa bena nvita bua nvita yandi!

⁵ Badi bafuma ku buloba budi kule, kunfudilu kua diulu, Yehowa mene ne bielelu bia nvita bia tshiji tshiandi bua kubutula buloba buonso.

⁶ Asai muadi! Bualu bua dituku dia Yehowa didi ha buihi; nedilue bu kubutuka kudi kufuma kudi Nzambi wa Bukole Buonso!

⁷ Nunku bianza bia bantu bonso nebitekete, mutshima wa muntu yonso newenguluke,

⁸ ne bobo nebakuatshike buowa. Makenga ne tunyinganyinga nebibakuate; nebikale ne dikenga bu mukashi udi ne didinyenga dia ha kuleleye, Nebatangilangane muntu ne muntu ne ditshina, mpala yabo mikale bu mpala miteme ne kahia.

⁹ Monai, dituku dia Yehowa dilualua, dikengesha bantu, dikala dia tshikisu ne dia tshiji tshikole, ndia kuyuisha buloba bu tshihela tshia hatuhu, ndia kubutula bantu babi.

¹⁰ Bualu bua mitoto ya mu diulu ne bisumbu bia mitoto bidimu kabiena bitema, diba nedifikuluke habandadi, ne ngondo kena ukenka ha buloba.

¹¹ Nenkengeshe ba ha buloba bua bubi buabo, ne bantu babi bua malu mabi abo; nempuwishe kudilesha kua badi badisue, nempuekeshe kudibandisha kua bakokeshi badi bakengesha bantu babo.

¹² Nenvishe bungi bua bantu butamba bua or bukese, nembuvuishe butamba bua or wa Ofi mene bukese.

¹³ Nunku nenzakashe bintu bia mu diulu, nenkankishe buloba tô ne humukabu mu muaba wabu, bualu bua tshiji tshia Yehowa wa misumba mu dituku dia tshiji tshiandi tshikole.

¹⁴ Mu dituku adi, bu mudi ngulungu udibo bihata, ne bu mudi mikoko idi kayiyi ne mulami wa kuyiangisha, muntu yonso neahingane kudi bana babo, muntu yonso neanyemene ku buloba buandi.

¹⁵ Nebatubule muntu yonso udibo basangana, ne muntu yonso udibo bakuata neahone mushihibue ku muele wa nvita.

¹⁶ Nebele bana batekete ba bantu aba hanshi, babahanda nseke ku mesu kuabo; nebahaule nsubu yabo, nebakuate bakashi babo ku bukole.

¹⁷ Monai! Nensonsole Bena Madai bua kuleshabo bantu aba, ne bobo kabena bamona argent bu tshintu tshimpe, ne or kena ubasankisha.

¹⁸ Mata abo neasunsule mibidi ya bansongalume, kabena bafuila badi bahatuka mu mafu luse, mesu abo kaena amona bana ne dinanga dia mua kubasungila.

¹⁹ Ne Babulona, butumbi bua makelenge, bulengele budibo banyisha kudi Bena Kasada, neikale bu Sodoma ne Amola hakabutulabo kudi Yehowa.

²⁰ Kena wikala ne bantu kashidi, bantu kabena bashikamamu kabidi tô ne tshiendelele. Muena Alaba kena ushimikamu ntenta wandi kabidi, ne balami ba mikoko kabena baladikaku mikoko yabo.

²¹ Kadi nyama ya ku tshihela tshia lusenga neyikale ne miaba idiyi ilalamu, nsubu yabo neyikale tente ne nyama idi idila muadi; nyunyu ya nfiondo neyishikamemu, ne mbushi ya mu mpata neyinayileku.

²² Nyama ya bimungu neyidile mu mbalasa ya bukelenge babo, mibuabua neyidile mu nsubu yabo ya mushinga mukole. Tshikondo tshiandi tshia kubutuka tshidi tshiamba kufika, ne matuku andi kaena aleha.