Yeshaya 12 - Mukanda wa Nzambi Dihungila Dikulukulu ne Dihungila Dihia-dihia 2003

Musambu wa Disakidila

¹ Mu dituku adi newambe biebe ne, Nenkusakidile wewe, Yehowa; bualu bua wakankuatshila tshiji diambedi, kadi tshiji tshiebe tshiakukudimuka kundi, wakunsamba.

² Mona, Nzambi udi luhandu luanyi; nemmueyemene, ne tshiena ntshina nansha; bualu bua Yehowa, Yehowa mene, udi bukole buanyi ne musambu wanyi, ne yeye wakulua luhandu luanyi.

³ Nunku nenuhatule mai ne disanka mu bina bia mai bia luhandu.

⁴ Mu dituku adi nenuambe ne, Sakidilai Yehowa, tumbishai dinu diandi! Ambilai bantu bienzedi biandi munkatshi mua bisamba bionso, nubamanyishe ne, Dina diandi didi ditumbishibua.

⁵ Imbilai Yehowa misambu, bualu bua yeye wakuenza malu adi amuvuishila butumbi; muanda eu umanyibue mu miaba yonso ya ha buloba.

⁶ Bandisha dî diebe, ela mbila, wewe muena musoko wa Siona; bualu bua udi munene munkatshi muebe nyeye Wa Tshijila wa Isalele.