Sefanya 2 - Mukanda wa Nzambi Dihungila Dikulukulu ne Dihungila Dihia-dihia 2003

Dibutuka dia Bisamba Bidi Binyunguluka Bantu Bandi

¹ Nudisangishe hohamue, e, nudisangishe hohamue, nuenu ba mu tshisamba tshidi katshiyi ne bundu;

² diambedi mukenji kauyi muanze kukola, diambedi dituku kadiyi dianze kuhita luhilu bu mudi bisote bihehuka, diambedi tshiji tshikole tshia Yehowa katshiyi tshianze kufika kunudi; diambedi dituku dia tshiji tshia Yehowa kadiyi dianze kufika kunudi.

³ Kebai Yehowa, nuenu bena kalolo bonso ba ha buloba, badi batumikila mikenji yandi; kebai buakane, kebai kalolo; bumue nebanusokoke mu dituku dia tshiji tshia Yehowa.

⁴ Bualu bua Gaza neashale tshikulu, ne Ashekelona neikale tshihela tshia tshianana. Nebihate ba mu Ashedodo munda munya, nebajule Ekelona tô ne ku miji yandi.

⁵ Mulau wikale kudi bantu badi bashikame ku muelelu wa mai manene, tshisamba tshia Bena Kelete! Di dia Yehowa didi dinuhisha, nuenu ba mu Kânana, buloba bua Bena Peleshete! Nennubutule, kakuena kuikala muena musoko umue kabidi.

⁶ Ku muelelu wa mai manene nekuikale miaba ya mashinde ne miaba ya balami kushikama, ne mpangu ya kubuesha mikoko.

⁷ Buloba budi ku muelelu wa mai manene nebuikale bua difuka dia Bena Yuda. Nebadishilemu mikoko yabo. Butuku nebalale mu nsubu ya mu Ashekelona. Bualu bua Yehowa Nzambi wabo neahingane kudibo, neabumushe mu buhika bua kubaha diakalengele.

⁸ Nakunvua bibingu bia Bena Moaba, ne bihendu bia Bena Amona biakuhendabo nʼabi bantu banyi, biakudibandishabo nʼabi bakasuabo kukehesha mikalu ya buloba bua bantu banyi.

⁹ Yehowa wa misumba, Nzambi wa Isalele mene, udi wamba ne, Bu mundi ne muoyo, Moaba neikale bu Sodoma, Bena Amona nebikale bu Amola, bu buloba bûle tente ne mpesa ne mena a luehu, bu tshihela tshia tshianana tshiendelele. Difuka dia bantu banyi nedibahaule, ba mu tshisamba tshianyi badi bashala ne muoyo nebabahiane.

¹⁰ Mianda ai neyilue kudibo bualu bua kudisua kuabo, bualu bua bakatshimbisha bantu ba Yehowa wa misumba ne bakadibandisha ku mpala kuabo.

¹¹ Yehowa neabakuatshishe buowa; bualu bua neatekeshe nzambi yonso ya ha buloba ne tshiole; nebamutendelele muntu ku muaba wandi, muntu ku muaba wandi, tô ne ku maloba onso adi ku muelelu wa mai manene.

¹² Nuenu kabidi, Bena Atiopa, nenushihibue ku muele wanyi wa nvita!

¹³ Yeye neolole tshianza tshiandi bua kukuma ba ku luseke lua nôde, nebabutule Ashû. Neavuishe Ninewe bikulu, muaba mume bu tshihela tshia lusenga.

¹⁴ Bisumbu bia nyama nebilale hanshi munkatshi muau, nyama ya mu mpata ya mishindu yonso. Mpunga tshikola ne nkese nebishikame ha mutu ha bibumba; nyunyu mikuabo bu tshihungulu ne tshikololo neyele dî mu masoso a nsubu; dibutuka nedikale mu mbelu yonso, bualu bua yeye wakamuenesha hatoke tô miaba yakalengeshabo ne mabaya a cêdre.

¹⁵ Musoko eu wakadi bantu basankila bikole, bashikame kabayi ne ntatu, wakadi udiamba ne, Meme ndiku, kakuena musoko mukuabo, anu meme. Monai, mudiu mulue tshihela tshia hatuhu, muaba wa nyama ya mu mpata kulala! Muntu yonso udi uhitshilaku nêle tshibingu, uhoha ne tshianza.