Nsumuinu 28 - Mukanda wa Nzambi Dihungila Dikulukulu ne Dihungila Dihia-dihia 2003

Nsumuinu Idi Mishilangane

¹ Bantu babi badi banyema kakuyi muntu udi ubihata, kadi bantu bakane badi ne dikima bu dia nyama wa ntambue.

² Bua ditomboka dia ba ha buloba bakokeshi babu badi ba bungi; kadi bikalaku bajinguludi ba mianda ne bena lungenyi, bukokeshi bujalame nebushale musangu mule.

³ Muntu muhele udi ukengesha bahele udi bu nvula wa tshihuhu udi kayi ushiya tshintu tshia kudia.

⁴ Badi balekela kulonda diyisha dia mikenji badi batumbisha bantu babi, kadi badi batumikila diyisha dia mikenji badi bafuilangana nʼabo.

⁵ Bantu babi kabena bajingulula kulumbulula kuakane, kadi badi bakeba lungenyi kudi Yehowa badi bakajingulula tshishiki.

⁶ Muntu muhele udi wenda mu buakane bua mutshima udi utamba udi mu nshila mikonyangale buimpe, nansha bikaleye mubanji.

⁷ Udi utumikila diyisha dia mikenji udi muana mulume udi ne meji, kadi udi ukuata bulunda ne bena lumpukusu udi ufuisha tatuʼandi bundu.

⁸ Udi utudisha biuma biandi ku kasombela ne ku makasa udi ubisangishila muntu udi ufuila bahele luse.

⁹ Udi umusha matshu andi ku diyisha dia mikenji, mulombu wandi udi utondesha Nzambi.

¹⁰ Udi uhambuisha bantu bakane bua bobo bende mu nshila mubi neahone mu dijimba didiye umbula; kadi badi ne mitshima mitoke nebahiane diakalengele.

¹¹ Muntu mubanji udi wela meji ne, Ndi ne meji, kadi muhele udi ne dijingulula dia mianda udi ukononona tshikadilu tshiandi.

¹² Hatumba bantu bakane, butumbi bunene budiku; kadi habanda bantu babi, bantu badi basokoma.

¹³ Udi usokoka matomboka andi kena wikala ne diakalengele, kadi udi uwatonda, uwalekela, neafuidibue luse.

¹⁴ Disanka didi kudi muntu udi utshina malu mabi misangu yonso, kadi udi ukolesha mutshima wandi neabuele mu dikenga.

¹⁵ Bu nyama wa ntambue udi udila, anyi bu nkashama udi ukeba nyama ya kudia, mbu mudi mukokeshi mubi udi ku mutu kua bantu bahele.

¹⁶ Mukokeshi udi kayi ne lungenyi udi mukengeshi mukole kabidi; kadi udi ukina luhetu lua ku malu mabi nealeheshe matuku andi.

¹⁷ Muntu udibo bahisha bualu bua mashi a munga muntu adi hamʼbidi handi aye mu dijimba; muntu kamukuatshisha nansha.

¹⁸ Muntu udi wenda mu buakane neahandishibue, kadi udi wenda mu nshila mikonyangale neahone lukasa.

¹⁹ Udi udima budimi buandi neikale ne bia kudia bia bungi, kadi udi ulonda malu a hatuhu neikale ne buhele bua bungi.

²⁰ Muntu udi mua kueyemenyibua neavudishibue ne masanka a bungi, kadi udi ne lukuluku bua kudivuisha mubanji kena ubinga.

²¹ Kulesha kansungusungu kakuena kuimpe; kadi muntu nênze malu mabi bua tshihesa tshia nshima.

²² Muena lukuka udi wenda lukasa bua kuheta biuma, kena mumanye ne, Buhele nebunkuate.

²³ Udi ubela muntu neahete diakalengele dihite dia udi umubomba ne ludimi luandi.

²⁴ Udi wiba bintu bia tatuʼandi anyi bia mamuʼandi, wamba ne, Muanda eu kawena wa ditomboka, udi mulunda wa mubutudi.

²⁵ Udi ne mutshima wa lukuka udi usonsola matandu, kadi udi weyemena Yehowa neavuishibue mubanji.

²⁶ Udi weyemena mutshima wandi udi muhote, kadi udi ulonda meji neahandishibue.

²⁷ Udi uha bahele bintu kena ukengela tshintu, kadi udi ubuikila mesu andi nebamuele milau ya bungi.

²⁸ Habuela bantu babi mu bukokeshi, banga bantu badi basokoma; kadi hajiminabo, bantu bakane badi bavulangana.