Nsumuinu 27 - Mukanda wa Nzambi Dihungila Dikulukulu ne Dihungila Dihia-dihia 2003

¹ Kuditumbushi bua malu a makelela, bualu bua kuena mumanye muanda walua dituku dikuabo.

² Munga muntu akutumbishe, kadi mukana muebe kamukutumbishi nansha. Muntu wa bende akutumbishe, kadi mishiku yebe kayikutumbishi.

³ Dibue didi ne bujitu, lusenga ludi lunema kabidi; kadi tshiji tshia muhote tshidi tshitamba bubidi buabi bujitu.

⁴ Tshiji tshikole tshidi ne lukinu, tshiji tshidi bu mai adi ahasalala; kadi muntu kai udi mua kuimana ku mpala kua mukau?

⁵ Kubela muntu hatoke kudi kutamba luse lusokoka buimpe.

⁶ Hadi mulunda mukutahe mputa udi mua kumueyemena, kadi kutuangana kua mishiku kua muena lukuna kudi ne kudinga.

⁷ Muntu udi mûkute udi udiata dikatshi dia buitshi muinshi mua makasa, kadi tshintu tshionso tshidi ne bululu tshidi tshishemakana mukana mua udi ne nzala.

⁸ Bu mudi nyunyu udi uhambuka, umuka ku disua diandi, mbu mudi muntu udi uhambuka umuka ku muaba wandi.

⁹ Manyi ne manananshi bidi bisankisha muntu; ne mei malengele a mulunda wa muntu adi afuma ku lungenyi luimpe adi amusankisha muomumue.

¹⁰ Kulekedi mulunda webe ne mulunda wa tatu webe; kubuedi mu nsubu wa muanʼenu dituku dia dikenga diebe. Kuikala ne muena mutumba udi ha buihi kudi kuhita kuikala ne muanʼenu udi kule buimpe.

¹¹ Muanʼanyi, wikale ne meji, usankishe mutshima wanyi, bua mmanye mua kuitaba kudi muntu udi umpenda.

¹² Muntu mudimuke udi utangila dikenga diamba kumukuata, udi usokoma; kadi batshimbakanyi badi bahitaku, badi bakengeshibua.

¹³ Angata tshivualu tshia muntu udi mueyeke muenyi tshieya; ukuate udi mueyeke ba tshisamba tshia bende tshieya lukola.

¹⁴ Biavudishila muntu muena mutumba nʼandi disanka ne dî dikole ne dinda dionso, nebamubadile muanda eu bu mulau.

¹⁵ Kumatamata kua mai dituku dia nvula wa mudimbi ne mukashi muena matandu bidi muomumue.

¹⁶ Udi ukeba kumukanda udi bu udi ukanda luhehele, tshianza tshiandi tshia balume tshidi bu tshidi tshikuata manyi.

¹⁷ Bu mudi tshiamu tshisakisha tshinga tshiamu, mbu mudi muntu ulengesha tshikadilu tshia mulunda wandi.

¹⁸ Muntu udi ulama mutshi wa nfigi neadie mamuma au, ne udi ukuba nfumu wandi neatumbishibue.

¹⁹ Bu mudi mpala umueneka mu mai, mbu mudi mutshima wa muntu umumuenesha kudi munga muntu.

²⁰ Muaba wa Bafue ne wa Kubutuka kabiena biule kashidi; mesu a muntu kaena ûkuta kashidi.

²¹ Luesu ludiku lua kulengesha tshiamu tshia argent, tshikutu tshidiku tshia kulengesha tshiamu tshia or; ne badi bateta muntu ku tshidiye utumbisha.

²² Biwatua muhote ne muinshi mu tshinu hamue ne manvua, buhote buandi kabuena bûmuka kudiye.

²³ Umanye bimpe mudi mushindu wa bisumbu bia mikoko yebe, ela meji mudi mua kulama bisumbu bia bimuna biebe.

²⁴ Bualu bua biuma kabienaku tshiendelele; tshifulu tshia bunfumu tshidi tshishala tô bikondo bionso, anyi?

²⁵ Hatahabo bisoso bia kudisha nʼabi himuna bua kubilama, batoloka mashinde a lutende, hakosabo mashinde adi adiunda ha mikuna,

²⁶ bana ba mikoko nebikaleku bua bivualu biebe, ne mbushi neyikuheteshe mushinga wa budimi.

²⁷ Newikale ne mabele a mbushi makumbane bua bia kudia biebe, bua bia kudia bia ba mu nsubu muebe, ne bua wewe ukube nʼau mishikankunde idi ikukuatshila mudimu.