Nsumuinu 26 - Mukanda wa Nzambi Dihungila Dikulukulu ne Dihungila Dihia-dihia 2003

¹ Bu mudi neige mu tshidimu tshia munya, bu mudi nvula mu tshikondo tshia kuhuola, mbu mudi buneme kabuyi buakanangane ne muhote.

² Bu mudi mushamusha uhahala eku ne eku, wikila eku ne eku, bu mudi kandindi katua mulelu, mbu mudi mulau udi bantu bela hatuhu kauyi ukuata.

³ Mushosho udi wa kututa nʼau kabalu, mionshi idi ya kulombela nʼai nyama wa mpunda, ne mulangala udi wa kukuma nʼau bahote ha nyima.

⁴ Kukudimunyi muhote dî bu mudi buhote buandi, bua wewe kufuanangana nʼandi.

⁵ Kudimuna muhote dî bu mudi buhote buandi, bua yeye kedi meji ne, Ndi muena meji.

⁶ Udi utuma dî ku tshianza tshia muhote, udi udikosa makasa andi, udi unua tshimbambila.

⁷ Bu mudi mikolo ya muntu mulema ilemba kayiyi ne bukole, mbu mudi lusumuinu mukana mua bahote.

⁸ Bu mudi muntu usuika dibue mu tshielelu tshiadi, mbu mudi muntu udi uhesha muhote butumbi.

⁹ Bu mudi mungonge mutue mu tshianza tshia mukuatshiki wa maluvu, mbu mudi lusumuinu mukana mua bahote.

¹⁰ Bu mudi muena buta bua mikete udi wasa bantu bonso mputa, mbu mudi muntu udi ubuesha muhote mu mudimu wandi, anyi udi ubueshamu badi bahita mu nshila.

¹¹ Bu mudi mbua uhingana ku bilushi biandi, mbu mudi muhote uhingana ku buhote buandi.

¹² Udi umona muntu udi wela meji ne, Ndi muena meji, anyi? Ditekemena didibo nʼadi bua muhote didi dihita didibo nʼadi bua muntu au bunene.

¹³ Mufuba udi wamba ne, Nyama wa ntambue udi mu nshila; nyama wa ntambue udi mu misesu!

¹⁴ Bu mudi tshibi tshiendakana ha biamu biatshi, mbu mudi mufuba ukudimuka mu bulalu buandi.

¹⁵ Mufuba udi ubuesha tshianza tshiandi munda mua dilonga; bua kutshihingisha mukana muandi budi bumuhangisha.

¹⁶ Mufuba udi wela meji ne, Ndi ne lungenyi luhite lua bantu muanda mutekete badi mua kukudimuna dî ne meji.

¹⁷ Udi uhita mu nshila, ubuela mu matandu adi kayi bua bualu buandi, udi bu muntu udi ukuata mbua ku matshu.

¹⁸ Bu mudi mubuluke udi wela bishelele, mikete ne bia lufu,

¹⁹ mbu mudi muntu udi udinga muena mutumba nʼandi ne, Tshiena ngamba mei a matuku, anyi?

²⁰ Hikalaku kakuyi nkunyi, kahia kadi kajima; hikalaku kakuyi muena bunsonge, kutandangana kudi kuhuwa.

²¹ Bu mudi makala mela ha mutu ha makala a kahia, bu mudi nkunyi miela mu kahia, mbu mudi muena matandu udi usonsola nvita.

²² Mei a muena bunsonge adi bu tuhesa tua bia kudia bilengele; adi abuela tô ne munda mua mubidi.

²³ Mishiku idi ne mei a lubombo ne mutshima mubi bidi bu tshikanganya tshia tshiamu tshia argent tshilamika ha nyima ha luesu lua dima.

²⁴ Muntu udi ne lukuna udi ulusokoka ku mei adi mishiku yandi yamba, kadi udi muteke kudinga mu mutshima wandi.

²⁵ Havuisheye dî diandi bu dî dia luse, kuitabushi dî diandi nansha; bualu bua malu munyanguke muanda mutekete adi mu mutshima wandi.

²⁶ Bikala lukuna luandi lubuikila ne lubombo, bubi buandi nebusokolodibue mu disangisha dia bantu.

²⁷ Udi wumbula dijimba neahonemu; dibue didi muntu ubungulusha nedihingane hamʼbidi handi.

²⁸ Ludimi ludi ne mashimi ludi lukina bantu bakutahalu mputa; mukana mudi muamba mei a lubombo mudi muvuisha dibutuka.