Nehemya 5 - Mukanda wa Nzambi Dihungila Dikulukulu ne Dihungila Dihia-dihia 2003

Badi Bateketa Kulomba Kasombela

¹ Bantu bakuabo ne bakashi babo bakadi ne muadi munene, bakafunda bana babo, Bena Yuda.

² Bualu bua bakuabo bakamba ne, Tuetu ne bana betu balume ne bana betu bakashi tudi ba bungi; tuangate blé bua tuetu kudia, tuikale ne muoyo.

³ Bakuabo bakamba ne, Tudi tueyeka madimi etu ne madimi a tumuma ne nsubu yetu, bua tusumbe blé bualu bua tshiole tshidiku.

⁴ Bakuabo bakamba ne, Tuetu tuakasomba argent bua kulambula mukelenge, tuakeyeka madimi etu ne madimi a tumuma.

⁵ Kadi musunyi wetu udi bu musunyi wa bana betu ne bana betu baledibue badi bu bana babo; tuetu tudi tubuesha bana betu balume ne bana betu bakashi mu huhika, ne bana betu bakashi bakuabo bakamana kuya mu buhika; katuena ne bukole bua kubakuatshisha, bualu bua bantu bakuabo bakamana kuangata madimi etu ne madimi a tumuma.

⁶ Hanakunvua muadi wabo ne mei â, nakadi ne tshiji tshikole.

⁷ Nakadielela meji munda muanyi, nakatandangana ne bantu banene ne bakokeshi, nakabambila ne, Muntu ne muntu udi ulomba tshia kasombela kudi muanʼabo. Nakashikika tshisumbu tshinene tshia bantu ku mpala kuabo.

⁸ Nakabambila ne, Tuetu bua bukole butuakadi nʼabu tuakuhikula bana betu Bena Yuda bakadi bahanyibue mu buhika kudi bisamba bia bantu; nuenu nudi basue kuhana bana benu, anyi? Nudi basue tuetu kubasunga, anyi? Hashishe bobo bakahuwa, kabakadi ne dî dia kungandamuna.

⁹ Nakamba kabidi ne Bualu ebu bunudi nuenza kabuena buimpe; kanuena ne buabi bua kuenda mu ditshina dia Nzambi wetu bualu bua bihendu bia bisamba bia bantu, bena lukuna betu, anyi?

¹⁰ Muomumue meme ne bana betu ne bena mudimu banyi tuakadi mua kubasombesha argent ne blé bua kuheta tshia kasombela. Ndi nnusengelela ne, Tulekelai tshia kasombela aka.

¹¹ Ndi nnusengelela ne, Nuhingishe madimi abo ne madimi a tumuma ne madimi a olive ne nsubu yabo ne tshia lukama lua argent ne blé ne nyinyo ne manyi binuakangata kudibo, anu lelu eu.

¹² Hashishe bobo bakamba ne, Netubahingishilebi, katuena tubalomba kasombela; netuenze bu muwakuamba. Hashishe nakabikila bakuidi, nakabatshihisha bua bobo benze bu muakadi mulayi eu.

¹³ Nunku nakatutula bilulu bianyi, nakamba ne, Nzambi neatutushe muntu yonso ku nsubu wandi ne ku mudimu wandi nunku biahangeye kumana mulayi eu; nebamumushe nunku, yeye neikale hatuhu. Bantu bonso bakamba ne, Amen; bakatumbisha Yehowa. Bantu bakenza bu muakadi mulayi eu.

¹⁴ Ku tshikondo tshiakansungulabo gouverneur wabo mu buloba bua Yuda, ku tshidimu tshia makumi abidi tshia bukelenge bua mukelenge Atashasete tô ne ku tshidimu tshia makumi asatu ne bibidi, bu bidimu dikumi ne bibidi, meme ne bana betu katuakanza kudia bidia bia gouverneur.

¹⁵ Kadi ba-gouverneur bakadi ku mpala kuanyi bakangata difutu diabo kudi bantu; bakadiangatshila bidia ne nvinyo kudibo ha mutu ha nshekele ya argent makumi anai; bena mudimu babo mene bakakokesha bantu, kadi meme tshiakenza nunku bualu bua dishina dia Nzambi.

¹⁶ Meme mene mene nakananukila kulamata mudimu wa lumbu elu, katuakadisumbila madimi; bena mudimu banyi bonso bakadisangishaku bua kuenzabo mudimu.

¹⁷ Bena Yuda ne bakokeshi bakuabo lukama ne makumi atanu bakadia ku mesa anyi ha mutu ha bakalua kutudi kudi ba munkatshi mua bisamba bia bantu biakadi bitunyunguluke.

¹⁸ Bintu bituakadia bia dituku dimue biakadi ngombe umue ne mikoko ya manyi isambombo; bakandambila nsolo; tuakanua nvinyo yonso musangu umue bu wa matuku dikumi; kadi mu malu â onso tshiakalomba bia kudia bia gouverneur bualu bua mudimu wakadi bujitu kudi bantu aba.

¹⁹ Nzambi wanyi, unvuluke bua kungenzela bimpe bua malu onso anakuenzela bantu aba.