Muambi 4 - Mukanda wa Nzambi Dihungila Dikulukulu ne Dihungila Dihia-dihia 2003

¹ Nakatangila kabidi makenga onso adibo bakengesha nʼau bantu muinshi mua diba; monai binsonshi bia bakadi bakengeshibua kabayi ne musambi! Bakabakengesha bakadi ne bukole, bobo kabakadi ne musambi.

² Nunku nakamba ne, Bantu bakamana kufua badi batamba batshidi ne muoyo kusanka,

³ ne badi kabayi banze kuledibua ne kabayi banze kutangila malu mabi adibo benza muinshi mua diba badi batamba buonso buabo kusanka.

⁴ Hashishe, nakatangila mudimu wonso ne ngenzelu wau mulengele bidi bivuisha bantu mukau. Bualu ebu budi hatuhu, bu kuihata kua luhehele.

⁵ Muhote udi udikuata bianza, udi udidia mubidi wandi.

⁶ Dianza diule tente ne ditalala didi dihita manza abidi mûle tente ne mudimu mukole ne kuihata kua luhehele.

⁷ Nakatangila kabidi malu a hatuhu muinshi mua diba;

⁸ mukuabo udiku udi nkayandi kayi ne muntu, nansha muana wa balume nansha muanʼabo wa balume, kadi nshikidilu wa mudimu wandi kenaku; mesu andi kaena manze kutshina ne bubanji. Hashishe, udi udikonka munda ne, Ndi ngenzela nganyi mudimu? Ndi ndikandika masanka bua tshinyi? Ebu mbualu bua hatuhu ne mudimu wa lutatu.

⁹ Bantu babidi badi bahita umue, bua bobo badi baheta difutu dimpe ku mudimu wabo.

¹⁰ Bualu bua biadishindabo, umue neabishe mukuandi; kadi diakabi didi kudi udi udishinda nkayandi kayi ne mukuabo bua kumuhisha.

¹¹ Bualu bukuabo, bialala bantu babidi kaha kamue badi bakuatshishangana luya; kadi udi ulala nkayandi udi mua kukuata luya munyi?

¹² Muntu udi mua kuhita mukuabo bukole, kadi bantu babidi badi mua kumuhita yeye bukole; kabena mua kutula mionshi isatu milukakasha lukasa.

¹³ Nsongalume muhele udi ne lungenyi udi uhita mukelenge mukulukashi muhote udi kayi witabusha mibelu,

¹⁴ nansha yeye muluhuke mu nsubu wa mashika bua kubuela mu bukelenge, nansha yeye muledibue mu bukelenge buandi.

¹⁵ Nakatangila bonso hadi ne muoyo bendakana muinshi mua diba hohamue ne nsongalume wakahiana bukelenge buandi;

¹⁶ bungi buabo kabuakadi mua kubadibua ne yeye wakadi ha mutu ha buonso buabo. Kadi balonda ha nyima kabena mua kusanka bua bualu buandi. Bulelela, ebu mbualu bua hatuhu kabidi, bu kuihata kua luhehele.