Muambi 2 - Mukanda wa Nzambi Dihungila Dikulukulu ne Dihungila Dihia-dihia 2003

¹ Nakambila mutshima wanyi ne, Tuye bietu, nenkutete ne masanka; nunku usanke biebe. Monai, buakadi hatuhu kabidi.

² Nakamba bua tuseku ne, Tudi tuhote, bua masanka ne, Adi enza tshinyi?

³ Nakelangana meji mu mutshima wanyi bua kusankisha mubidi wanyi ne nvinyo, mutshima wanyi mutshikale undombola mu meji; nakateta malu a buhote bua kujingulula tshidi tshimpe bua ba ha buloba benze muinshi mua diulu matuku onso a muoyo waho.

⁴ Meme nakenza midimu minene; nakadiashila nsuhu; nakakuna mionshi ya tumuma tua nvinyo;

⁵ nakadilongoluela bibundu ne miaba ya biendelu; nakakunamu mitshi ya mamuma ya mishindu yonso;

⁶ nakadiumbuila mena a mai bua kusunabo mai a kumiamina mitshi inakakuna;

⁷ nakasumba bahika balume ne bahika bakashi; nakadi ne bana ba bahika baledibue mu nsubu muanyi; nakadi ne bimuna bia bungi, ngombe ne mikoko, bihite bia bonso bakadi ku mpala kuanyi mu Yelushalema.

⁸ Nakaheta argent ne or ne bintu bia mushinga mukole bifume kudi bakelenge ne ku provinces; nakadiangatshila bimbi ba misambu, balume ne bakashi, ne biombelu bia mishindu yonso bia kuimba nʼabi misambu.

⁹ Nakalota lumu lunene; bintu bianyi biakavulangana, biakahita bia bonso bakadi ku mpala kuanyi mu Yelushalema; nakatshidi anu ne meji anyi.

¹⁰ Tshiakahidia nansha tshintu tshimue tshiakajinga mesu anyi; tshiakalesha mutshima wanyi nansha disanka dimue; mutshima wanyi wakasanka bua midimu yonso makela; edi ndifutu dianyi dia ku midimu yonso biakenza.

¹¹ Hashishe, nakatangila midimu yonso yakenza bianza bianyi, ne lutatu lunakadi nʼalu; monai, malu onso akadi hatuhu bu kuihata kua luhehele; kakuakadi bualu buimpe muinshi mua diba.

¹² Nakahingana bua kutangila meji ne buhote ne malu a tshianana, kadi muntu walonda mukelenge udi mua kuenza tshinyi? Nênze anu malu akamanabo kuenza.

¹³ Hashishe, nakamona ne, Meji adi ahita malu a tshianana buakane bu mudi munya muhite midima.

¹⁴ Mesu a muena meji adi matangile ku mpala, ne muhote udi wenda mu midima; kadi nakajingulula ne, Bualu bumue budi bubakuata bonso.

¹⁵ Hashishe, nakamba mu mutshima wanyi ne, Bualu budi bukuata muhote nebunkuate kabidi; tshindi muvudishile meji ntshinyi? Nakamba mu mutshima wanyi ne, Bualu ebu budi hatuhu kabidi.

¹⁶ Kabena bavuluka nansha muena meji nansha muhote, bualu bua matuku alualua bubidi buabo nebabahue muoyo. Monai, muena meji ufuafua muomumue ne muhote!

¹⁷ Nunku nakakina muoyo, bualu bua mudimu udi muenjibue muinshi mua diba wakannyingalasha. Bualu bua malu onso adi hatuhu bu kuihata kua luhehele.

¹⁸ Nakakina midimu yonso inakenza muinshi mua diba hanakamona ne, Ndi nyishila muntu udi undonda.

¹⁹ Udi mumanye ne, Yeye neikale muena meji anyi muhote nganyi? Kadi yeye neakokeshe midimu yanyi yonso inakenza ne yakalesha bantu lungenyi lunakadi nʼalu muinshi mua diba. Ebu mbualu bua batuhu kabidi.

²⁰ Nunku ditekemena dia malu onso anakenza muinshi mua diba diakajimina.

²¹ Bualu bua misangu mikuabo muntu udi wenza mudimu wandi wa lungenyi, wa meji ne mulengele tshishiki udi ushila muntu buhianyi budiye kayi mukuatshile mudimu. Bualu ebu budi bua hatuhu, budi butambe bubi.

²² Muntu udi uheta tshinyi ku midimu yandi yonso yakenzeye ne yakanyingalasheye nʼai mutshima wandi muinshi mua diba?

²³ Bualu bua matuku andi onso adi ne ntatu ne mudimu wandi udi wa kanyinganyinga; mutshima wandi mene kawena wikisha butuku. Ebu mbualu bua hatuhu kabidi.

²⁴ Kakuena disanka kudi muntu bu kudia, kunua ne kusankisha mutshima wandi mu midimu yandi. Nakatangila disanka edi ne, Ndifume ku tshianza tshia Nzambi.

²⁵ Bualu bua udi mumanye mua kumpua meme ku didia ne disanka nganyi?

²⁶ Nzambi udi uha muntu udi umusankisha meji, lungenyi ne disanka; kadi udi uha muntu mubi lutatu lua kukunguisha bintu bia kuhesha mukuabo udi usankisha Nzambi. Bualu ebu mbua hatuhu kabidi ne bu kuihata kua luhehele.