Muambi 10 - Mukanda wa Nzambi Dihungila Dikulukulu ne Dihungila Dihia-dihia 2003

Buimpe bua Meji

¹ Njiji mifue idi inunkisha manyi a muenji wa manananshi muhuya mubi; nunku buhote bukese budi bujimisha lungenyi ne butumbi.

² Mutshima wa muenu meji udi ku tshianza tshiandi tshia balume; kadi mutshima wa muhote udi ku tshianza tshiandi tshia bakashi.

³ Bulelela, henda muhote mu nshila, mutshima wandi udi umuhangisha, yeye udi umanyisha bantu bonso ne, Ndi muhote.

⁴ Biakutekela mukokeshi tshiji, kumuki ku muaba webe nansha, bualu bua kalolo kadi katekesha bihendu bia bungi.

⁵ Nakatangila bualu bubi muinshi mua diulu, budi bu dituhakana didi difuma kudi mukokeshi;

⁶ malu mahote adi atumbishibua bikole, kadi babanji badi bashikame mu miaba mihuekele.

⁷ Nakatangila bahika babanda ha nyima ha tuhalu; nakatangila bakokeshi benda hanshi bu bahika.

⁸ Udi umbula dijimba neadishindemu; udi uluhula disoso mu tshimanu, nyoka neumusume.

⁹ Udi uhanda mabue, wowo neamukengeshe; udi uhanda nkunyi neyimuheteshe njiu.

¹⁰ Biatshihala tshiamu, hikala muntu kayi mutshinone, nunku budiye nʼahu mbua kutaha ne bukole buonso; lungenyi ludi mua kumutungunusha.

¹¹ Bulelela, nyoka neasume bikalaku kakuyi ditekesha; muenu biakulakula udi biandi muomumue.

¹² Mei a mukana mua muena meji adi ne kalolo, kadi mishiku ya muhote neyimumine.

¹³ Ku tshibangidilu tshia mei a mukana muandi kudi butshimbe; nshikidilu wa mei andi udi buhale bubi.

¹⁴ Muhote udi utudisha mei, kadi muntu kena mumanye malu adi kâyi manze kulua; udi mumanye mua kumuambila malu adi amulonda nganyi?

¹⁵ Midimu ya bahote idi ibatekesha; kabena bamanye mua kuya ku musoko.

¹⁶ Mulau kûdi, wewe tshisamba, tshidi ne mukelenge mutshikale muana, tshidi ne haminyampala batu badia mu dinda!

¹⁷ Disanka kûdi, wewe tshisamba, tshidi ne mukelenge muneme, tshidi ne baminyampala batu badia ha diba dikumbane bua kuheta bukole kabuyi bua kukuatshika maluvu.

¹⁸ Bua bufuba musaka wa nsubu udi uhuka; bua lulengu mai adi amata mu nsubu.

¹⁹ Bidia bidi bisankisha bantu; nvinyo idi isankisha mitshima ya bantu; biuma bidi bihetesha bintu bionso.

²⁰ Kuhendi mukelenge mu meji ebe nansha; kuhendi babanji mu nsubu webe wa bulalu; bualu bua nyunyu wa mulu neaye ne dî diebe, ne tshidi ne mahuahua netshimuangalashe lumu elu.