Muambi 1 - Mukanda wa Nzambi Dihungila Dikulukulu ne Dihungila Dihia-dihia 2003

Malu Onso Adi Hatuhu

¹ Â mmei a Mulambi, muana wa Davidi, mukelenge wa mu Yelushalema.

² Muambi udi Wamba ne, Malu a hatuhu, malu a hatuhu! Malu onso adi hatuhu.

³ Muntu udi uheta tshinyi ku mu dimu wonso udiye wenza muinshi mua diba?

⁴ Tshikondo tshimue tshidi tshiya ku mpala, tshikuabo tshidi tshilonda ku nyima; ka dî buloba budi muomumue tshiendelele.

⁵ Diba didi dibanda, didi dibuela, didi dihita lubilu kabidi ku muaba udidi dibanda.

⁶ Luhehele ludi luya ku Sude, ludi luhingana ku nôde; lufu luanyunguluka bua kuhingana kabidi ku muaba wakafumalu.

⁷ Misulu yonso idi ibuela mu mai manene, kadi mai manene kaena ûla tente; mu miaba yonso idi misulu ihueka, idi ihinganamu kabidi.

⁸ Malu onso adi mûle tente ne ntatu; muntu kena mumanye mua kuâmba; kumona kakuena kutonda disu; kunyua kakuena kudiatshisha ditshu.

⁹ Malu akadiku diambedi neikaleku; malu akenzabo diambedi nênjibue; kakuena tshintu tshihia-tshihia muinshi mua diba.

¹⁰ Tshintu tshidiku tshidibo ba manye mua kuamba ne, Tangila, etshi ntshintu tshihia-tshihia, anyi? Tshiakadiku kale, mu bikondo biakadi ku mpala kuetu.

¹¹ Kabena bavuluka bantu ba kale; balualua ha nyima kabena babavuluka kudi bantu badi babalonda kabidi.

Malu Akadi Muambi Umona

¹² Meme Muambi nakadi mukelenge wa Isalele mu Yelushalema.

¹³ Nakateka mutshima wanyi ne meji anyi mu kukeba ne mu kujingulula kua malu onso adi menjibue muinshi mua diulu; eu mmudimu wa lutatu wakuha Nzambi ba ha buloba bua kubadisha nʼau.

¹⁴ Nakatangila malu onso adi menjibue muinshi mua diba; monai, malu au onso adi hatuhu, adi bu kuihata kua luhehele.

¹⁵ Tshidi tshikonyangala, kabena mua kutshiludika kahidi; tshintu tshidi katshiyihu, kabena mua kutshibala.

¹⁶ Nakamba mu mutshima wanyi ne, Nakuheta lungenyi lua bungi, muhite bonso bakadi ku mpala kuanyi mu Yelushalema; bulelela, mutshima wanyi wakajingulula meji a bungi ne lungenyi lua bungi.

¹⁷ Nakuteka mutshima wanyi mu kukeba kua meji ne mu kujingulula kua buhote ne malu a tshianana; nakamanya ne bualu ehu kabidi budi bu kuihata kua luhehele.

¹⁸ Bualu bua mu meji a bungi mudi kanyinganyinga ka bungi; wavudisha lungenyi neavudishe kanyinganyinga kabidi.