Misambu 91 - Mukanda wa Nzambi Dihungila Dikulukulu ne Dihungila Dihia-dihia 2003

Badi Bashikame mu Mundidimbi wa Nzambi wa Bukole

¹ Udi mushikame mu tshisokomenu tshia Nzambi Mutambe Bunene wa mulu neikale mu mundidimbi wa Nzambi wa Bukole Buonso.

² Nengambe bua Yehowa ne, Yeye udi tshinyemenu tshianyi ne musoko wanyi munyunguluke ne Nzambi wanyi undi ngeyemena.

³ Bualu bua neakuhandishe ku buteyi bua tshilembi tshia nyunyu, neakusungile ku tshihuhu tshidi tshivuisha lufu.

⁴ Neakubuikile ne masala andi, neusangane tshinyemenu muinshi mua mahuahua andi; bujalame buandi bua bushuwa budi ngabu wa ha tshiadi ne ngabu wa ku tshianza.

⁵ Kuena utshina bualu budi bukuatshisha muntu buowa butuku, anyi mukete udi uhita lubilu mu munya;

⁶ anyi tshihuhu tshidi tshiendakana mu midima, anyi dibutuka didi dibutula bantu munda munya.

⁷ Bantu tshinunu badi mua kuhona ku luseke luebe, ne bantu binunu dikumi badi mua kuhona ku luseke lua tshianza tshiebe tshia balume; kadi bualu ebu kabuena bufika ha buihi nʼebe.

⁸ Neumone difutu dia bantu babi anu ne mesu ebe, neutangile mudibo babafuta.

⁹ Bualu bua wewe, Yehowa, udi tshinyemenu tshianyi, ne wakuvuisha Nzambi Mutambe Bunene wa mulu muaba webe wa kushikamamu,

¹⁰ nunku bualu bubi kabuena bukukuata, kakuena tshihuhu tshiafika ha buihi ne nsubu webe wa ntenta.

¹¹ Bualu bua yeye neakufile mu bianza bia banjelo bandi kukulamabo mu nshila yebe yonso.

¹² Nebakuambule mu bianza biabo bua wewe kututshi dikasa diebe ku dibue.

¹³ Neudiate ha nyama wa ntambue ne ha nyoka wa dikala, neutue muana wa nyama wa ntambue ne nyoka miseba.

¹⁴ Bualu bua yeye udi ulamata kundi mu dinanga diandi, nemmuhandishe; nemmushikike mu muaba udi kulu, bualu bua yeye udi mumanye dina dianyi.

¹⁵ Hambikileye, nengitabe kudiye; nengikale nʼandi habueleye mu dikenga, nemmuhandishe, nemmutumbishe.

¹⁶ Nensankishe mutshima wandi ne dileha dia matuku andi, nemmuleshe luhandu luanyi.