Misambu 90 - Mukanda wa Nzambi Dihungila Dikulukulu ne Dihungila Dihia-dihia 2003

Mukanda Muinai Nzambi Udi wa Tshiendelele ne Bantu Badi ba Tshituha Tshihi

¹ Mukelenge, wewe udi muikale muaba wa tuetu kushikamamu mu bikondo bionso.

² Diambedi mikuna kayiyi mianze kumueneka, diambedi wewe kuyi muanze kufuka buloba ne bifukibua, ku tshibangidilu tô ne kunshikidilu wewe udi Nzambi.

³ Wewe udi uhingasha bantu mu dinfuenkenya kabidi, udi Wamba kabidi ne, Hinganai, nuenu bana ba bantu.

⁴ Bualu bua bidimu tshinunu bidi ku mesu kuebe bu dituku dia makelela dimane kuhita, anyi bidi bu tshituha tshia diba tshidi mutentekedi utentekelamu butuku.

⁵ Wewe udi ubumusha bu muakadi mai mûla ahueka nʼabo; badi bu tshilota, bu mashinde adi akola ne dinda.

⁶ Adi adiunda bimpe ne dinda, adi akola; halua dilolo, adi mutahibue ne adi afubidila.

⁷ Bualu bua tuakushidishibua mu tshiji tshiebe, bua njiya yebe tuakukuatshika buowa.

⁸ Wewe wakuteka malu mabi etu ku mpala kuebe, Wakuteka mihi ituakuenza mu busokoko mu munya wa ha mpala hebe.

⁹ Bualu bua matuku etu onso adi ajimina bualu bua tshiji tshiebe; bidimu bietu bidi bishika bu kuhumuna kua muhuya.

¹⁰ Matuku a mu bidimu bietu adi akumbana bu bidimu makumi muanda mutekete; anyi, bituikala ne bukole, bidi mua kukumbana bidimu makumi muanda mukulu; kadi dileha diabi didi dituvuishila anu mudimu mukole ne kanyinganyinga, bualu bua bidi bihita lubilu, ne ludi tuya lukasa.

¹¹ Udi mumanye bukole bua tshiji tshiebe nganyi? Udi mumanye njiya yebe idi itshinyisha bantu nganyi?

¹² Utuyishe mua kubala matuku etu onso ne dibala edi nunku — bua tuetu kudihetela mutshima udi ne meji.

¹³ Yehowa, hingana biebe! Muanda eu neulehe musangu bule munyi? Mutshima webe ufuile bantu bebe luse!

¹⁴ Ûshe mitshima yetu tente ne luse luebe lujalame ne dinda, bua tuetu tumanye mua kuikala ne musangelu ne disanka matuku etu onso.

¹⁵ Utusankishe ne disanka didi diakanangana ne bungi bua matuku awakutukengeshamu, ne bungi bua bidimu bi tuakatangilamu diakabi.

¹⁶ Mudimu webe umueneke kudi bantu bebe, butumbi buebe kudi bana babo baledibue.

¹⁷ Dianyisha dia Mukelenge Nzambi wetu dikale kutudi, utujadikile mudimu wa bianza bietu; e, bulelela, ujadike mudimu wa bianza bietu tshishiki.