Misambu 73 - Mukanda wa Nzambi Dihungila Dikulukulu ne Dihungila Dihia-dihia 2003

Mukanda Muisatu Dibutuka dia Bantu Babi

¹ Bulelela, Nzambi udi muimpe mu bienzedi biandi kudi Bena Isalele, kudi badi ne mitshima mitoke.

² Kadi mbu mundi ngamba bualu buanyi, makasa anyi akamba kusesuka kaba kabalê; biendedi bianyi biakamba kuselemuka.

³ Bualu bua nakadi mukuatshile bantu badi badisue mukau, hanakatangila diakalengele dia bantu babi.

⁴ Bualu bua kabena ne kanyinganyinga ha kufua kuabo; kadi bukole buabo butshidi bukandamane.

⁵ Kabena habo ne makenga adi bantu bakuabo nʼau, kabena bakengeshibua bu mudi banga bantu.

⁶ Nunku kudisua kudi bu lukanu ludi lujingila mu nshingu yabo, tshimbambila tshidi tshibabuikila bu tshitalu.

⁷ Mesu abo adi atuntumuka bualu bua mafuta abo, bintu bidibo nʼabi bidi bihita bidi mitshima yabo misue.

⁸ Badi babuidia bantu, mu bubi buabo badi bamba mei a kukengesha nʼai bakuabo; badi bakula badibandisha.

⁹ Badi babandisha mei a mukana muabo tô ne mulu, ndimi yabo idi yendakana ha buloba.

¹⁰ Bua malu â bantu bandi badi bahingana kudibo; badi banua mai mavule, bâmane tô ne bishikishiki biau.

¹¹ Badi bamba ne, Nzambi udi mumanye munyi? Mutambe Bunene wa mu diulu udi ne lungenyi, anyi?

¹² Monai, aba mbantu babi; ne badi kabayi ne ntatu matuku onso, badi bavudisha biuma biabo.

¹³ Bulelela, nakalengesha mutshima wanyi hatuhu, nakôwa bianza bianyi hanakadi tshiyi ne tshilumbu.

¹⁴ Bualu bua dinda tô ne ku dilolo nakukumibua, nakukengeshibua ku dinda ne ku dinda.

¹⁵ Bu meme muambe ne, Nengakule nunku, monai, nakadi kutungila ba mu mulongo wa bana bebe tshitungu.

¹⁶ Hanakela meji bua kumanya bualu ebu, buakuhita kunkengesha,

¹⁷ tô ne hanakabuela mu muaba wa tshijila wa Nzambi, ne nakelanganamu meji a kunshikidilu kuabo.

¹⁸ Bulelela, wewe udi ubateka mu miaba ya busenu; wewe udi ubela hanshi mu dibutuka

¹⁹ Mona mudibo babutuke kabutu mu katuha ka diba! Badi bajimishibue tshiendelele ku buowa bua bungi.

²⁰ Bu mudi bualu bua tshilota hatabala muntu, nunku, Mukelenge, hawabika, neulengulule binfuanyi biabo.

²¹ Bualu bua mutshima wanyi wakadi unyingalala bikole, ne bualu bua nakadi mutahike munda muanyi,

²² nakadi mujibale, tshiyi ne lungenyi, nakadi bu nyama ku mesu kuebe.

²³ Kadi ntu ngikala nʼebe mafuku onso; wewe udi mikuata ku tshianza tshianyi tshia balume.

²⁴ Wewe neundombole ne meji ebe, hashishe, neumbueshe mu butumbi.

²⁵ Ndi ne nganyi mu diulu anu wewe nkayebe? Kakuena mukuabo ha buloba undi musue anu wewe.

²⁶ Mubidi wanyi ne mutshima wanyi bidi bihanga, kadi Nzambi udi dibue dia mutshima wanyi ne buhianyi buanyi tshiendelele.

²⁷ Bua mona, badi nʼebe kule nebajimine. Wewe wakubutula bonso badi bakulekela bua kulondabo malu a masandi.

²⁸ Kadi bidi bimpe bua meme kusemena ha buihi ne Nzambi. Nakuvuisha Mukelenge Yehowa tshinyemenu tshianyi, bua mmanye bianyi mua kuambila bantu bua midimu yebe yonso.