Misambu 66 - Mukanda wa Nzambi Dihungila Dikulukulu ne Dihungila Dihia-dihia 2003

Kutumbisha Nzambi bua Bienzela Biandi Bikole

¹ Nuenu bonso ba ha buloba, nuelele Nzambi mbila ya disanka.

² Nuimbe bienu musambu udi ulesha butumbi bua dina diandi, numutumbishe ne ditumbisha dihite bunene.

³ Nuambile Nzambi ne, Mona mudi bienzedi biebe bikuatshisha bantu buowa! Bualu bua bukole buebe budi bunene, badi nʼebe lukuna badi bakukokela ne lubombo.

⁴ Ba ha buloba bonso nebakutendelele; nebakuimbile misambu ya kukutumbisha nʼai; nebimbile dina diebe misambu.

⁵ Luai, numone bienzedi bidi Nzambi muenze: udi ubakuatshisha buowa ne bienzedi bidiye wenza munkatshi mua bukua bantu.

⁶ Wakandamuna mai manene bua kuluau buloba bûme; bantu bakahitshila mu musulu benda ku makasa. Tuakasankamu bua malu andi,

⁷ Udi ukokesha bantu ku bukole buandi tshiendelele; mesu andi adi atentekela bisamba bia bantu — batombokedi kabadibandishi nansha.

⁸ Nuenu bukua bantu, nuvudishile Nzambi wetu disanka; dî dinudi numutumbisha nʼadi diunvuike;

⁹ wakatulama bua tuikale munkatshi mua badi ne muoyo, ne kakitabusha makasa etu aselemuke.

¹⁰ Bualu bua wewe Nzambi wakatuteta; wakatuteta bu mudibo bateta tshiamu tshia argent mu tshikutu tshia kahia.

¹¹ Wakatufikisha mu bukuondo; wakateka dikenga diakatunemeshila bujitu mu bifuka bietu.

¹² Wakitabusha bua bantu bende babande ha mitu hetu; tuakahitshila mu kahia ne mu mai. Kadi wakatuluhulamu bua tuetu kuikala mu muaha mukumbane.

¹³ Nembuele mu nsubu muebe ne milambu ya kuosha ha kahia; nenfile mitshibu yanyi kûdi,

¹⁴ yoyo yakamba mishiku yanyi, yakaditshiha mukana muanyi, hanakadi mu dikenga.

¹⁵ Nenfile milambu ya mikoko idi ne manyi kûdi bu milambu ya kuosha ha kahia, ne dihembu dia muishi wa milambu ya bimpanga diatshimue nʼai. Nenfile milambu ya bana balume ba ngombe ne ya mbushi.

¹⁶ Luai bienu, nunvue, nuenu bonso badi banemeka Nzambi, nennuambile malu akuenzeleye muoyo wanyi.

¹⁷ Nakamuela dî dikole mukana muanyi, nakamutumbisha ne ludimi luanyi.

¹⁸ Bu meme inulame malu mabi mu mutshima wanyi, Mukelenge kakadi kungunvuila.

¹⁹ Kadi bulelela, Nzambi wakangunvuila; wakateleja matshu ku dî dia kulomba kuanyi.

²⁰ Nzambi avudishibue disanka, udi kayi musesuishe mei a kulomba kuanyi, udi kayi mungumushile luse luandi lujalame!