Misambu 49 - Mukanda wa Nzambi Dihungila Dikulukulu ne Dihungila Dihia-dihia 2003

Buhote bua Kueyemena Bubanji

¹ Unvuai bualu ebu, nuenu bantu bonso! Telejai matshu enu, bonso ba ha buloba,

² ne bahuekele ne banene, babanji ne bahele diatshimue.

³ Mukana muanyi nemuambe mei a lungenyi; meji andi ngela mu mutshima wanyi neikale meji a dijingulula dia malu.

⁴ Nenteleje matshu anyi ku lusumuinu, nengandule dijimbu dianyi ku kuimba kua lunkombe.

⁵ Bualu kai ndi ne bua kutshina mu matuku a makenga, hadi dihambuka dia ku buakane dia bena lukuna banyi dinnyunguluka nseke yonso?

⁶ Mbantu badi beyemena luhetu luabo, badi baditumbisha bua bungi bua biuma biabo.

⁷ Bulelela, kakuena muntu udi mua kuhikula muanʼabo ku tshintu tshiandi tshimue, anyi kufila mushinga wa kumuhikula nʼau kudi Nzambi,

⁸ bualu bua mushinga wa kuhikula nʼau mioyo yabo udi mukole, udi uhanga kukumbana tshiendelele,

⁹ bua yeye ashale ne muoyo tshiendelele, bua kamonyi biandi Dijimba dia Bafue.

¹⁰ E, yeye neamone ne, Bena meji badi bafua; muhote ne muntu mujibale badi bafua muomumue ne badi bashila banga bantu biuma biabo.

¹¹ Meji adibo bela munda muabo adi ne, Nsubu yetu neyishaleku tshiendelele, miaba itudi tushikama neyikaleku tô ne ku bikondo bionso. Badi binyika maloba abo ku mena abo mine.

¹² Kadi muntu kena mua kushala mu butumbi buandi, udi bu nyama idi ijimina.

¹³ Eu nnshila udi badi bahote mu kudieyemena kuabo bayamu; kadi badi balua ku nyima kuabo badi basanka bua mei akambabo.

¹⁴ Badi basungudibua bu tshisumbu tshia mikoko bua kubuelabo mu Muaba wa Bafue; Lufu neluikale mulami wabo. Bantu bakane nebabakokeshe ne lunkelu. Mibidi yabo neyinyane, neyijimine; Muaba wa Bafue newikale muaba wa bobo kushikama.

¹⁵ Kadi Nzambi, neahikule muoyo wanyi ku bukole bua Muaba wa Bafue, bua yeye neangangate.

¹⁶ Kutshinyi havuishibua muntu bubanji, havulangana biuma bia mu nsubu muandi.

¹⁷ Bualu bua, hafueye, kena uya ne tshintu tshimue nansha, butumbi buandi kabuena buhueka nʼandi bua kumulonda ku nyima kuandi.

¹⁸ Nansha biavudishileye mutshima wandi disanka hatshidiye ne muoyo, nansha hikala bantu bamutumbishe haditutshisheye dikasa dimpe,

¹⁹ yeye neaye anu ku mulongo wa bankambua bandi, kabena bamona munya kabidi tshiendelele.

²⁰ Muntu udi ne butumbi, kadi kena ujingulula, udi bu nyama idi ijimina.