Misambu 46 - Mukanda wa Nzambi Dihungila Dikulukulu ne Dihungila Dihia-dihia 2003

Nzambi Udi Tshinyemenu Tshietu ne Bukole Buetu

¹ Nzambi udi tshinyemenu tshietu ne bukole buetu, udi dikuatshisha dietu mu makenga didi kadiyi dihanga tshiendelele.

² Nunku katuena tutshina, nansha biandamuka buloba, nansha biatenkakana mikuna mile idi munkatshi mua mai manene;

³ nansha biabila mai a mu mai manene ne biatutukau ntutu; nansha biazakala mikuna mile bualu bua kutuntumuka kuau.

⁴ Musulu udiku, ne tusulu tuau tudi tusankisha musoko wa Nzambi, muaba wa tshijila udi ne nsubu ya Mutambe Bunene wa mu Diulu.

⁵ Nzambi udi munkatshi muau, kabena bamanye mua kûnyungisha; Nzambi neaukuatshishe hatshia butuku.

⁶ Ba mu bisamba bia bantu bakajula diyoyo, makelenge akatenkakana; yeye wakamba dî diandi, buloba buakafingatuka.

⁷ Yehowa wa misumba udi nʼetu; Nzambi wa Yakoba udi tshinyemenu tshietu.

⁸ Luai bienu, nutangile bienzedi bia Yehowa, bu muakuenzesheye dibutuka dia bungi ha buloba.

⁹ Yeye udi ulekesha nvita bua ishike tô ne kunfudilu kua buloba; udi utshibula buta, udi ukosa difuma bituha bituha; udi wosha makalu a nvita mu kahia.

¹⁰ Imanai talalâ, numanye bienu ne, Meme ndi Nzambi. Nentumbishibue munkatshi mua bisamba bia bantu, nentumbishibue ha buloba.

¹¹ Yehowa wa misumba udi nʼetu; Nzambi wa Yakoba udi tshinyemenu tshietu.