Misambu 37 - Mukanda wa Nzambi Dihungila Dikulukulu ne Dihungila Dihia-dihia 2003

Bantu Babi Kabena Bahanda

¹ Kunyingabadi bua benji ba malu mabi, kuikadi ne badi benza bienzedi bibi mukau.

² Bualu bua nebafubidile tshituha tshihi bu mashinde mataha, nebafubidile bu midioko mitekete.

³ Eyemena Yehowa ne enza malu mimpe; nunku neushikame mu buloba, neudie bia kudia mu dimueyemena diebe.

⁴ Wikale ne disanka diebe mu Yehowa, ne yeye neakuhe milombu idi mutshima webe ulomba.

⁵ Uteke nshila webe mu bianza bia Yehowa; umueyemene yeye kabidi, ne yeye nênze malu andi.

⁶ Yeye neumueneshe buakane buebe bu mudi munya umueneka, neamueneshe dibingishibua diebe bu diba dia munda munya.

⁷ Shala holâ ku mpala kua Yehowa, umuindile ne lutulu. Kunyingabadi bualu bua muntu udi ututa dikasa dimpe mu nshila muandi, ne bua muntu udi ujadika malu mabi adiye uhangidisha.

⁸ Lekela kufua tshiji, uhidie kuikala ne njiya. Kunyingabadi; bualu ebu budi mua kukuenzesha anu bualu bubi.

⁹ Bualu bua benji ba malu mabi nebabutudibue; kadi badi bindila Yehowa nebahiane buloba.

¹⁰ Tshituha tshihi katshiyi tshianji kuleha, muntu mubi kena wikalaku kabidi; e, neukebe kumona muaba wandi ne disuminyina, kena wikalaku.

¹¹ Kadi badi ne mitshima mihuekele nebahiane buloba, mioyo yabo neyisanke mu ditalala dikumbane.

¹² Muntu mubi udi welela muntu muakane tshifufu, udi umudiangena ku menu.

¹³ Mukelenge udi umuseka, bualu bua udi umona ne, Dituku dia kumukengesha dilualua.

¹⁴ Bantu babi badi bahatula muele wa nvita, badi banana buta buabo, bua kuhonesha bahele ne bakengedi ba bintu hanshi, bua kushihabo badi bakane mu nshila udibo bayamu.

¹⁵ Muele wabo wa nvita neutubule mitshima yabo, mata abo neatshibuke.

¹⁶ Bintu bikese bidi muntu muakane nʼabi bidi bitamba bintu bia bungi bia bantu babi bangi bulengele.

¹⁷ Bualu bua maboko a bantu babi neatshibudibue, kadi Yehowa udi ukolesha bantu bakane.

¹⁸ Yehowa udi mumanye matuku a bantu badi ne mitshima miakane, buhianyi buabo nebushale tshiendelele.

¹⁹ Kabena bafuishibua bundu bikondo bia diakabi; mu matuku a tshiole nebukute.

²⁰ Kadi bantu babi nebajimine, ne badi ne Yehowa lukuna nebikale bu bulengele bua mashinde a mu madimi; nebajimine — bu mudi muishi wa kahia ujimina, nebajimine biabo.

²¹ Muntu mubi udi usomba bintu, kena ubifuta kabidi; kadi muntu muakane udi ulesha bantu luse, udi ubaha bintu.

²² Bualu bua badi Yehowa uvudishila disanka nebahiane buloba, ne badiye wela mulau nebajimishibue.

²³ Biendedi bia muntu bidi bijadikibua kudi Yehowa, ne yeye udi usanka bua nshila wandi.

²⁴ Biatankukeye, kena udishinda tshiula, bualu bua Yehowa udi umukuata ne tshianza tshiandi.

²⁵ Nakadi nsongalume, katataka nakulua muntu mukole; kadi tshiena muanze kutangila muntu muakane mushale hatuhu, anyi bana bandi baledibue balombe bia kudia.

²⁶ Dinda tô ne ku dilolo yeye udi ulesha bantu luse, udi ubasombesha bintu; tunkanuniuna tuandi tudi tuvudishibua disanka.

²⁷ Umuka ku malu mabi, enza malu mimpe; nunku neushale tshiendelele.

²⁸ Bualu bua Yehowa udi unanga kulumbulula kuakane, kena ulekela bansanto bandi. Bantu bakane nebalamibue tshiendelele, kadi bana ba bantu babi nebajimishibue.

²⁹ Bantu bakane nebahiane buloba, nebashikamemu tshiendelele.

³⁰ Mukana mua muntu muakane mudi muamba mei a lungenyi, ludimi luandi ludi luamba kulumbulula kuakane.

³¹ Mukenji wa Nzambi wandi udi mu mutshima wandi; biendedi biandi kabiena biselemuka.

³² Muntu mubi udi utentekela muntu muakane, udi ukeba kumushiha.

³³ Yehowa kena umushiya mu tshianza tshiandi, kena witabusha bua bamuhishe haluabo kumulumbuluisha.

³⁴ Windile Yehowa, ulamate nshila wandi, yeye neakubandishe bua wewe kuhiana buloba. Habutulabo bantu babi, wewe neumone muanda eu.

³⁵ Nakumona muntu mubi muikale ne bukole buandi bua bungi, mudituntumushe bu mutshi mubishi udi udiunda mu buloba buau,

³⁶ kadi nakahitshilaku, ne mona, yeye kakadiku; e, hanakamukeba, tshiakamanya mua kumusangana.

³⁷ Tangila muntu udi ne mutshima mutoke bimpe, mona muntu udi muakane; bualu bua tunkanunuma netuikale kudi muena ditalala.

³⁸ Kadi batomboki nebabutudibue, buonso buabo mene. Tunkanunuina tua bantu babi netujimishibue.

³⁹ Kadi luhandu lua bantu bakane ludi lufuma kudi Yehowa; yeye udi tshinyemenu tshiabo halua tshikondo tshia dikenga.

⁴⁰ Yehowa udi ubakuatshisha, udi ubasungila; udi ubabandisha mu bianza bia bantu babi, udi ubasungila, bualu bua badi banyemena kudiye.