Misambu 35 - Mukanda wa Nzambi Dihungila Dikulukulu ne Dihungila Dihia-dihia 2003

Badi Balomba Luhandu kudi Bena Lukuna Babo

¹ Yehowa, ufuilakane ne badi bafuilangana nʼanyi; uluishe badi baluangana nʼanyi.

² Ukuate ngabu mukese ne ngabu munene, ujuke biebe bua kunkuatshisha.

³ Hatula difuma ne tshisola bua kukanda nʼabi badi bangihata. Ambila muoyo wanyi ne, Meme ndi luhandu luebe.

⁴ Badi bakeba muoyo wanyi bafuishibue bundu, bakeheshibue. Badi bahangidisha malu mabi a kungenzela, bahingashibue ne babuandakashibue.

⁵ Bikale biabo bu bisote ku mpala kua luhehele, hatshidi muanjelo wa Yehowa ubihata.

⁶ Nshila wabo ikale ne mîdima ne busenu, hatshidi muanjelo wa Yehowa ubihata.

⁷ Bualu bua hanakadi tshiyi ne tshilumbu, bakunsokokela bukuondo buabo mu dijimba; hanakadi tshiyi ne tshilumbu, bakumbuila muoyo wanyi tshina.

⁸ Dibutuka dimukuate mu mpukahuka; bukuondo buandi buasokokeye bumukuate yeye muine; abuele biandi mu dibutuka adi mene.

⁹ Ka muoyo wanyi newikale ne disanka mu Yehowa, neusanke mu luhandu luandi.

¹⁰ Mifuba yanyi yonso neyambe ne, Yehowa, udi bu wewe nganyi? Wewe udi usungila muena makenga kudi muntu udi umuhita bukole, udi usungila muntu udi muena makenga ne muhele kudi muntu udi mumunyenge.

¹¹ Bantemu badi bena tshikisu badi bajuka; badi bankonka bua malu andi tshiyi mumanye.

¹² Badi bampingashila malu mabi ku malu mimpe; banshiya ne muoyo munyingalala.

¹³ Kadi meme hanyi, hakadibo ne disama, nakaluata bilulu bikayabala; nakakengesha muoyo wanyi ne kujila kua bia kudia; kutendelela kuanyi nekuhingane mu tshiadi tshianyi nkayatshi.

¹⁴ Nakendakana ne majia bu munakadi mua kudila mulunda wanyi anyi muanʼetu; nakinama mutu wanyi bua kudila bu munakadi kuashila mamu wanyi muadi.

¹⁵ Kadi hanakalenduka, bakasanka, bakadisangisha kaba kamue; bena bunsonge ne bantu banakadi tshiyi mumanye bakadisangisha hamue bua kungenzelabo bibi, bakampenda kabayi mua kulekela.

¹⁶ Bu mudi baseki badi ne dikamakama benza bua kuhetabo tshituha tshia mampa, bakandiangena ku menu abo.

¹⁷ Mukelenge, neutangile bualu ebu hatuhu musangu bule bishi? Usungile muoyo wanyi musûke ku kubutula kuabo, usungile muoyo wanyi muine kudi nyama ya ntambue.

¹⁸ Nenkusakidile mu disangisha dinene dia bantu; nenkutumbishe munkatshi mua tshisumbu tshinene tshia bakole.

¹⁹ Kuitabushi bua badi nʼanyi lukuna bualu bua bunsonge buabo basanke ku mutu kuanyi. Kuitabushi bua badi bankina handi tshiyi ne bualu banjibe disu.

²⁰ Bualu bua kabena bamba mei a ditalala, kadi badi bahangidisha mei a mashimi bua kusonguelabo nʼau bantu badi bashikame talalâ mu buloba.

²¹ E, badi babulula mukana muabo bitongatonga bua kunseka; badi bamba ne, Eyo, eyo, mesu etu akukumona!

²² Yehowa, wewe wakumona bualu ebu; kuhuwu nansha. Mukelenge, kuikadi nʼanyi kule.

²³ Udisonsole, utabale bua kukosa nsambu yanyi biakane; bua kunkuatshisha mu tshilumbu tshianyi, Nzambi wanyi ne Mukelenge wanyi.

²⁴ Yehowa Nzambi wanyi, unkosele tshilumbu tshianyi bu mudi buakane buebe; bobo kabasanki bualu buanyi.

²⁵ Kabambi mu mitshima yabo ne, Eyo, ebu mbualu butudi basue. Kabambi ne, Tuakumumina.

²⁶ Badi basanka bualu bua dikenga dianyi bafuishibue bundu, babuandakashibue, buonso buabo hohamue. Badi badibandisha ku mpala kuanyi baluatshishibue bundu ne dikeheshibua.

²⁷ Badi basanka bua bualu buanyi buakane bele mbila ne bikale ne disanka. E bambe biabo matuku onso ne, Yehowa atumbishibue, yeye mene udi usanka mu diakalengele dia muntu udi umukuatshila mudimu.

²⁸ Ka ludimi luanyi nebambile bantu bua buakane buebe ne bua butumbi buebe dinda tô ne ku dilolo.