Misambu 34 - Mukanda wa Nzambi Dihungila Dikulukulu ne Dihungila Dihia-dihia 2003

Kutumbisha Nzambi bua Luhandu lua ku Makenga

¹ Nenvudishile Yehowa disanka bikondo bionso, kumutumbisha kuanyi nekuikale mukana muanyi misangu yonso.

² Muoyo wanyi neutumbile mu Yehowa; badi bahuekele nebunvue lumu elu, nebasanke.

³ Tumbishai nʼanyi Yehowa, tunemeke bietu dina diandi diatshimue.

⁴ Nakakeba Yehowa, ne yeye wakitaba kundi, wakansungila ku malu onso anakatshina.

⁵ Bantu bakatangila kudiye bakadi ne mpala yabo mikenke ne disanka; mpala yabo kayena ikuatshika bundu tshiendelele.

⁶ Muena dikenga eu wakadila kudiye, ne Yehowa wakamunvuila, wakamusungila ku makenga andi onso.

⁷ Muanjelo wa Yehowa udi wasa tshitudilu tshiandi tshinyunguluke badi bamutshina, udi ubasungila.

⁸ Teta, ulabule, unvue ne, Yehowa udi muakane; disanka didi kudi muntu udi unyemena kudiye!

⁹ Nuenu bansanto bandi, nutshine Yehowa; bualu bua badi bamutshina kabena bakengela tshintu.

¹⁰ Bana balume ba nyama ya ntambue badi bakengela bia kudia, nzala idi ibasuma; kadi badi bakeba Yehowa kabena bakengela tshintu tshimpe tshimue.

¹¹ Luai bienu, nuenu bana banyi ba balume, telejai matshu enu kundi; nennuyishe mudi ditshina dia Yehowa.

¹² Muntu kai udiku udi unanga muoyo, udi musue matuku andi alehe bua yeye amonemu diakalengele?

¹³ Kanda ludimi luebe bua kaluambi malu mabi, kanda mishiku yebe bua kayambi mei a kudinga nʼau.

¹⁴ Umuka ku malu mabi, enza malu mimpe; ukebe ditalala, udilonde.

¹⁵ Mesu a Yehowa adi kudi bakane, ne matshu andi adi buashi ku kudila kuabo.

¹⁶ Mpala wa Yehowa udi mutangisha kudi benji ba malu mabi bua kubakengesha, bua kujimisheye tshivulukidi tshiabo ha buloba.

¹⁷ Bantu bakane badi badila dikuatshisha, Yehowa udi ubunvuila, udi ubahandula mu makenga abo onso.

¹⁸ Yehowa udi ha buihi ne bantu badi ne mitshima idi itamba kunyingalala, udi Usungila badi ne mitshima ya majia.

¹⁹ Makenga a muntu muakane adi a bungi; kadi Yehowa udi umusungila ku buonso buau.

²⁰ Yeye udi ulama mifuba yanyi yonso; kakuena umue wai udi utshibuka.

²¹ Malu mabi neashihe muntu mubi; badi ne bantu bakane lukuna nebahishibue.

²² Yehowa udi uhikula mioyo ya badi bamukuatshila mudimu; kakuena umue wa badi banyemena kudiye wahishibua.