Misambu 32 - Mukanda wa Nzambi Dihungila Dikulukulu ne Dihungila Dihia-dihia 2003

Disanka dia Dijimisha dia Bubi

¹ Disanka didi kudi muntu udi ne ditomboka diandi diumushibue, ne udi ne bubi buandi bubuikidibue!

² Disanka didi kudi muntu udi Yehowa kayi ubadila dihambuka diandi dia ku buakane, ne udi kayi ne lubombo mu mutshima wandi!

³ Hanakadi muhuwe, mifuba yanyi yakafingutuka bualu bua kutua kuanyi kua mikemu dinda tô ne ku dilolo.

⁴ Bualu bua munya ne butuku tshianza tshiebe tshiakanemena bujitu hamʼbidi hanyi; tshitelele tshianyi tshiakulua bu munanga wa mushihu.

⁵ Nakatonda bubi buanyi kûdi, tshiakasokoka dihambuka dianyi ku buakane. Nakamba ne, Nentonde matomboka anyi kudi Yehowa; ne wewe wakandekelela dihila dia bubi buanyi.

⁶ Bua bualu ebu muntu yonso udi unanga Nzambi akulombe mu tshikondo tshidiye mumanye mua kukusangana; bulelela, halua mai manene kuhasalala, kaena afika ha buihi nʼandi.

⁷ Wewe udi tshisokomenu tshianyi; neundame bua tshikadi ne dikenga; neunnyunguluke ne misambu ya luhandu.

⁸ Nenkuyishe lungenyi, nenkuleshe nshila udi ne bua kuendela, nenkuhe meji hatshidi disu dianyi kudi.

⁹ Kanuikadi bu kabalu anyi bu nyama wa mpunda bidi kabiyi ne lungenyi, bidi ne bua kukandibua ne lukanu mukana muabi ne mionshi ya kubilombola nʼai, anyi kabiena bilua ha buihi nʼebe.

¹⁰ Muntu mubi udi ne tunyinganyinga tua bungi, kadi muntu udi weyemena Yehowa udi munyunguluka ne luse lijalame.

¹¹ Nuikale ne disanka mu Yehowa, nusanke bikole, nuenu bantu bakane; elai mbila bua disanka dienu, buonso buenu badi bakane mu mitshima yenu!