Misambu 31 - Mukanda wa Nzambi Dihungila Dikulukulu ne Dihungila Dihia-dihia 2003

Badi Beyemena Nzambi

¹ Yehowa, ndi nnyemena kûdi; kuitabushi bua meme kufuishibua bundu kashidi, unsungile bua buakane buebe.

² Teleja matshu ebe kundi, umpandishe lubilu! Wikale dibue dia luhandu kundi, wikale musoko wa ngumbu ya nvita bua kunsungila!

³ Bualu bua wewe udi dibue dianyi ne ngumbu yanyi ya nvita; nunku, bualu bua dina diebe wikale mulombodi wanyi, undombele mu nshila.

⁴ Umpatule mu bukuondo buakungandabo mu musokoko, bualu bua wewe udi ngumbu yanyi ya nvita.

⁵ Ndi nteka muoyo wanyi mu bianza biebe; wewe wakumpikula, Yehowa, wewe Nzambi udi ulamata ku bushuwa.

⁶ Ndi nkina badi banemeka bintu bia hatuhu bidi bidinga bantu; kadi ndi ngeyemena Yehowa.

⁷ Nengikale ne disanka, nensanke bua luse luebe lujalame, bualu bua wakumona dikenga dianyi, wakumanya malu adi amatshisha mu muoyo wanyi;

⁸ ne kuakunfila mu bianza bia udi nʼanyi lukuna; wakujadika makasa anyi mu muaba munene.

⁹ Unfuile luse, Yehowa, bualu bua ndi mu dikenga; mesu anyi adi mondoke ne tshinyanu bualu bua kanyinganyinga, muoyo wanyi ne mubidi wanyi bidi bienza nunku kabidi.

¹⁰ Bualu bua muoyo wanyi udi ufika kunshikidilu kuau ne kanyinganyinga, ne bidimu bianyi biakuhita mu kuhumuna. Bukole buanyi budi buhanga bua bubi buanyi, mifuba yanyi idi mifingutuke.

¹¹ Nakulua muntu wa kubishabo tshihendu kudi badi nʼanyi lukuna, nakutamba kulua tshihendu kudi bena mutumba nʼanyi, ne bu tshintu tshia kubakuatshisha buowa kudi bilongo bianyi. Badi batangila ha bule ha nsubu badi banyema.

¹² Badi bampua muoyo mu mitshima yabo, bu mudibo bahua muntu mufue muoyo. Nakulua bu luesu ludi luhandike.

¹³ Bualu bua ndi ngunvua dinunganyi dia mei a bunsonge a bantu ba bungi — buowa ku nseke yonso — hadibo badisangisha hohamue bua kungelela tshifufu, hadibo basangisha dî bua kunyengabo muoyo wanyi.

¹⁴ Kadi ndi ngeyemena kudi, Yehowa, ndi ngamba ne, Wewe udi Nzambi wanyi.

¹⁵ Bikondo bianyi bidi mu bianza biebe; umpandishe mu bianza bia badi nʼanyi lukuna, kudi badi bankengesha.

¹⁶ Mpala webe atemene muntu webe, unsungile bua luse luebe lujalame.

¹⁷ Yehowa, kuitabushi bua meme kufuishibua bundu, bualu bua ndi nkubikila. Bantu babi bafuishibue bundu, bahueke, babuwe talalâ, mu Muaba wa Bafue.

¹⁸ Mishiku idi yamba mashimi ilue tumama, idi idiula bantu bakane ne dikamakama, ne mu diambu ne dihetu.

¹⁹ Ke mudi buimpe buebe bukumbane, buwakubutshila badi bakutshina, buwakuenzela badi banyemena kûdi, buwakubenzela ku mesu kua bukua bantu!

²⁰ Wewe udi ubasokoka mu tshisokomenu tshiebe ku bifufu bidi bantu babelela. Udi ubalama mu musokoko mu tshitandatanda ku matandu adi ahatuka ku ndimi yabo.

²¹ Yehowa avudishibue disanka, bualu bua wakundesha luse luandi lujalame ludi lunkemesha hanakadi mu musoko wa ngumbu ya nvita.

²² Meme hanyi nakamba mu ditshina dianyi ne, Nakumushibua ku mesu kuebe, kadi wewe wakunvua di dia kutendekena kuanyi, hanakadila kûdi.

²³ Nangai Yehowa, nuenu bansanto bandi bonso. Yehowa udi ulama badi bananukila kumueyemena, kadi udi ufuta muntu udi wenza malu a diambu difutu didi dikumbana.

²⁴ Nuikale ne bukole, ne mitshima yenu ikale ne dikima, nuenu bonso badi bindila Yehowa!