Misambu 29 - Mukanda wa Nzambi Dihungila Dikulukulu ne Dihungila Dihia-dihia 2003

Dî dia Yehowa mu Tshihuhu

¹ Samunai Yehowa, nuenu ba mu diulu, samunai Yehowa ne mei a butumbi buandi ne bukole buandi.

² Samunai Yehowa ne butumbi budi buakanangane ne dina diandi; tendelelai Yehowa, nuvuale bienu bivualu bilengele bia tshijila.

³ Di dia Yehowa didi ha mai; Nzambi wa butumbi udi ukungusha mikungulu ya nvula, Yehowa mene udi uyikungusha ha mutu ha mai mangi.

⁴ Dî dia Yehowa didi dî dikole, dî dia Yehowa didi diule tente ne butumbi.

⁵ Di dia Yehowa didi ditshibula mitshi ya cèdre, e, Yehowa udi utshibula mitshi ya cèdre ya mu Lebanona bituha.

⁶ Yeye udi utuhisha mukuna wa Lebanona bu mudi muana wa ngombe utuhika, udi utuhisha mukuna wa Sileona bu mudi muana wa mbowa utuhika.

⁷ Di dia Yehowa didi dihenyisha miele ya nvula bu ndimi ya kahia.

⁸ Di dia Yehowa didi dizakasha tshihela, Yehowa udi uzakasha tshihela tshia Kadesha.

⁹ Dî dia Yehowa didi dilelesha ngulungu bana, didi diubula mitshi ya metu, divuisha metu matuhu. Mu ntempelo wandi bonso badi bela mbila ne, Mutumbishai!

¹⁰ Yehowa wakashikama mu nkuasa wa butumbi mu tshikondo tshia nvula munene; e, Yehowa udi mushikame bu Mukelenge tshiendelele.

¹¹ Yehowa neaheshe bantu bandi bukole, Yehowa neasankishe bantu bandi ne ditalala.