Misambu 26 - Mukanda wa Nzambi Dihungila Dikulukulu ne Dihungila Dihia-dihia 2003

Kudibingisha ne, Ndi Muakane

¹ Yehowa, unkosele tshilumbu tshianyi ne kulumbulula kuakane, bualu bua nakuenda mu buakane buanyi, nakueyemena Yehowa tshiyi ndembakana.

² Tangila munda muanyi, Yehowa, untete; untete mu mutshima wanyi ne mu meji anyi.

³ Bualu bua luse luebe lujalame ludi ku mesu kuanyi, ne ndi ngenda mu bulelela buebe.

⁴ Tshiena mushikame ne bantu badi balonda malu a mashimi, tshiena mbuelakana ne badi basokoka malu mabi abo mu lubombo.

⁵ Ndi nkina disangisha dia benji ba malu mabi, tshiena mushikame ne bantu babi.

⁶ Ndi ngowa bianza bianyi tshiyi ne tshilumbu; nunku, Yehowa, ndi nyunguluka tshioshelu tshiebe;

⁷ bua meme kunvuisha bantu dî dia kusakidila, ne bua kubambila bienzedi biebe bionso bia kukema.

⁸ Yehowa, ndi nnanga muaba ûdi mushikame mu nsubu muebe, ne muaba udi butumbi buebe bushikame.

⁹ Kumushi muoyo wanyi musûke ne bantu babi diatshimue, kumushi muoyo wanyi diatshimue ne bantu badi bakeba kumatshisha mashi,

¹⁰ badi ne malu mabi mu bianza biabo adibo bahangidisha, ne badi ne bianza biabo bia balume biule tente ne mbueshilu.

¹¹ Kadi meme hanyi ndi ngenda mu buakane buanyi; umpikule, unfuile luse.

¹² Dikasa dianyi didi dimana mu muaba muhunga; nenvudishile Yehowa disanka mu masangisha a bantu bandi.