Misambu 25 - Mukanda wa Nzambi Dihungila Dikulukulu ne Dihungila Dihia-dihia 2003

Badi Balomba Bulombodi ne Dijimisha dia Mibi ne Bulami

¹ Yehowa, ndi muambule mutshima wanyi kûdi.

² Nzambi wanyi, nakukueyemena wewe; kuitabushi bua banfuishe bundu; kuitabushi bua bena lukuna banyi bampite bukole.

³ Bulelela, nansha umue wa badi bakuindila neafuishibue bundu; nebafuishe badi benzela bantu malu a bunsonge hatuhu bundu.

⁴ Yehowa, ummanyishe bienzedi biebe! unyishe nshila yebe.

⁵ Undombele biebe mu bulelela buebe, unyishe; bualu bua wewe udi Nzambi wa luhandu luanyi; ndi nkuindila wewe dinda tô ne ku dilolo.

⁶ Yehowa, uvuluke luse luebe ne dinanga diebe dijalame, bualu bua biakadiku kale tô ne mpindiu.

⁷ Kuvuluki malu mabi anakenza mu bunsongalume buanyi, anyi matomboka anyi; Yehowa, bu mudi luse luebe lujalame, unvuluke bualu bua buimpe buebe.

⁸ Yehowa udi muimpe ne muakane; nunku udi uyisha bantu babi nshila wa bobo kuendela.

⁹ Udi ulombola badi ne mitshima mihuekele mu malu adi makane; udi uyisha badi ne mitshima mihuekele nshila wandi

¹⁰ Nshila yonso ya Yehowa idi ya luse lujalame ne lulamatu kudi badi batumikila tshihungidi tshiandi ne mikenji yandi.

¹¹ Bualu bua dina diebe, Yehowa, umbuikidile bubi buanyi, bualu bua budi bunene.

¹² Muntu kai udi utshina Yehowa? Yehowa neamumanyishe nshila udiye ne bua kusungula.

¹³ Muoyo wandi muine newikale ne diakalengele, ne tunkanunuina tuandi netuhiane buloba.

¹⁴ Bulunda bujalame bua Yehowa budi kudi badi bamutshina, ne yeye udi ubamanyisha tshihungidi tshiandi.

¹⁵ Mesu anyi atu atangila kudi Yehowa misangu yonso, bualu hua yeye neahatule makasa anyi mu bukuondo.

¹⁶ Ukudimuke bua kuntangila, undeshe luse luebe; bualu bua ndi nkayanyi ne ndi ne dikenga.

¹⁷ Uholeshe tunyinganyinga tua mu mutshima wanyi, ne umpatule mu makenga anyi.

¹⁸ Wele meji a dinyingalala dianyi ne a dikenga dianyi, ne umbuikidile mibi yanyi yonso.

¹⁹ Wele meji a bena lukuna banyi, mudibo ba bungi, ne mudibo bankina ne lukuna lukole.

²⁰ Ulame muoyo wanyi, umpandule; kuitabushi hua meme kufuishibua bundu, bualu bua ndi munyemene kûdi.

²¹ Lulamatu luanyi kûdi ne buakane buanyi bindame; bualu bua ndi nkuindila.

²² Nzambi, uhikule Bena Isalele, ubahandule mu makenga abo onso.