Misambu 17 - Mukanda wa Nzambi Dihungila Dikulukulu ne Dihungila Dihia-dihia 2003

Badi Balomba Bulami bua Nzambi ku Mpala kua Bena Lukisu

¹ Yehowa, unvua bualu budi buakane; teleja matshu ebe ku kudila kuanyi; teleja matshu ebe ku kulomba kuanyi kudi kuhatuka ku mishiku idi kayiyi ne lubombo.

² Dikosa dia nsambu yanyi difume kuebe kûdi mushikame; mesu ebe atangile bualu budi buakane.

³ Wewe wakuteta mutshima wanyi; wewe wakulua kundi mu butuku; wewe wakunteta, kukumangana ne meji mabi. Mukana muanyi kabidi kamuena muamba malu mabi.

⁴ Mu bikadilu bia bantu nakudimuka, bualu bua dî dia ku mishiku yebe, bua tshilondi nshila ya bena dibutuka.

⁵ Bienzedi bianyi biakulamata nshila yebe bikole, makasa anyi kâkuselemuka.

⁶ Nzambi, ndi nkubikila, bualu bua wewe newitabe kundi. Teleja matshu ebe kundi, unvua dî dianyi.

⁷ Lesha luse luebe ludi lutukemesha, wewe udi Usungila badi bakeba tshinyemenu ku tshianza tshiebe tshia bukole bua kuhanduka kudi badi bajuka bua kubaluisha.

⁸ Undame bu kamonyi ka disu diebe; unsokoke muinshi mua mundidimbi wa mahuahua ebe,

⁹ kudi bantu babi badi bankengesha, kudi bena lukuna banyi badi bannyunguluka ku nseke yonso bakeba kunshiha,

¹⁰ Bakukanda mitshima yabo bua kabikadi ne luse, badi bamba mei a diambu mukana muabo.

¹¹ Miaba yonso itudi basue kuenda bakutunyungulukaku mpindiu, badi bateka mesu abo kutudi bua kutuhonesha hanshi,

¹² mbu mudi nyama wa ntambue hadiye ne lukuka lua kukuata tshintu, ne bu mudi muana wa nyama wa ntambue walamina mu miaba misokoma.

¹³ Yehowa, ujuke biebe, wimane ku mpala kuandi, umuele hanshi; usungile muoyo wanyi kudi muntu mubi ne muele webe wa nvita.

¹⁴ Yehowa, unsungile kudi bantu ne tshianza tshiebe, kudi bantu badi ne luseke luabo lua muoyo anu ha buloba ebu, ne bena mafu awakûsha tente ne bintu bia mu tshibutshilu tshiebe. Bana hadibo balela badi bûkuta, badi bashila bana babo bakese bintu bidi bishala ha mutu.

¹⁵ Kadi meme hanyi, mu kubingishibua kuanyi, nemmone mpala webe: nengikale ne disanka dikumbane hanatabala ne hanatangila tshifuanyikishi tshiebe.