Misambu 146 - Mukanda wa Nzambi Dihungila Dikulukulu ne Dihungila Dihia-dihia 2003

Badi Batumbisha Nzambi bua Bienzelu Biandi Biakane

¹ Tumbishai Yehowa! Wewe muoyo wanyi, utumbishe Yehowa!

² Nentumbishe Yehowa hantshidi ne muoyo; nengimbile Nzambi wanyi misambu ya kumutumbisha nʼai ntshidiku.

³ Kanueyemenyi baminyampala, anyi muana wa muntu, unudi kanuyi mua kusangana dikuatshisha kudiye.

⁴ Muhuya wandi udi uhatuka, udi uhingana kabidi ku dinfuenkenya diandi; mu dituku dine adi malu akadiye uhangidisha adi ajimina.

⁵ Disanka didi kudi muntu udi ne dikuatshisha diandi kudi Nzambi wa Yakoba, udi ne ditekemena diandi mu Yehowa Nzambi wandi,

⁶ wakafuka diulu ne buloba, mai manene ne bintu bionso bidimu, udi ulama bushuwa buandi tô ne tshiendelele.

⁷ Udi ulumbuluila badi bakengeshibue ne kulumbulula kuakane; udi uhesha badi ne nzala bia kudia. Yehowa udi ulekesha bena lukuna;

⁸ Yehowa udi utabasha mesu a bafofo; Yehowa udi ubisha bantu badi biname hanshi; Yehowa udi unanga bantu bakane.

⁹ Yehowa udi ulama benyi, udi ukuatshisha bana ba nshiya ne bakashi ba mu lufuila: kadi udi ukonyangasha nshila wa bantu babi.

¹⁰ Yehowa neakokeshe tô ne kashidi; Siona, Nzambi webe neakokeshe tô ne bikondo bionso. Tumbishai Yehowa!