Misambu 141 - Mukanda wa Nzambi Dihungila Dikulukulu ne Dihungila Dihia-dihia 2003

Badi Balomba bua Kusungidibua ku Malu Mabi

¹ Yehowa, ndi nkubikila; ulue kundi lukasa. Teleja matshu ebe ku dî dianyi handi nkubikila.

² Kulomba kuanyi kuikale ku mpala kuebe bu muhuya wa musenga wa manananshi, ne kuolola kua bianza bianyi kuikale bu mulambu udibo bafila dilolo.

³ Yehowa, uteke mutentekedi bua kukanda mukana muanyi; ulame tshibi tshia ku mishiku yanyi.

⁴ Kuinyiki mutshima wanyi ku bualu bubi, ne mu kuenza kuanyi kua bienzedi bibi handi ndamata kudi benji ba malu mabi. Tshidi bianyi bia kudia biabo bilengele.

⁵ Muntu muakane antute, muanda eu newikale luse kundi; ambele biandi, kubela kuandi nekuikale bu manyi ha mutu hanyi; mutu wanyi kaubengi manyi au; bua ntshidi ndomba bua malu mabi abo.

⁶ Hedibue bakokeshi babo hanshi ha mabue, nebunvue mei anyi, bua adi mashemakane.

⁷ Bu mudi muntu ubundulula buloba, ubuhanda ne lukasu, mbu mudi mifuba yetu mimuangalashibue ku mushiku wa Muaba wa Bafue.

⁸ Kadi mesu anyi adi kûdi wewe, Yehowa Mukelenge; ndi nkueyemena wewe; kushiyi muoyo wanyi hatuhu.

⁹ Undame bua tshikuatshibu mu bukuondo buakungandabo, ne mu mateyi a benji ba malu mabi.

¹⁰ Bantu babi bakuatshibue mu makuondo abo bobo, handi mpanduka.