Misambu 138 - Mukanda wa Nzambi Dihungila Dikulukulu ne Dihungila Dihia-dihia 2003

Badi Basakidila Yehowa bua Diakalengele Diandi

¹ Ndi nkusakidila ne mutshima wanyi mujima, nenkuindile misambu ya kukutumbisha nʼai ku mpala kua nzambi ya hatuhu.

² Nenkutendelele ne mutu wanyi muinyika mutume ku ntempelo webe wa tshijila, neasakidile dina diebe bua luse luebe lujalame ne bua lulamatu luebe lua bushuwa. Bualu bua wakutumbisha dina diebe ne dî diebe ha mutu ha malu onso.

³ Mu dituku dinakukubikila, wewe wakitaba kundi, wakankolesha bikole mu muoyo wanyi.

⁴ Yehowa, bakelenge bonso ba ha buloba nebakusakidile, bualu bua bakunvua mei a mukana muebe.

⁵ Bulelela, nebimbe misambu bua bienzedi bia Yehowa, bua butumbi bua Yehowa budi bunene.

⁶ Yehowa udi muhandishibue mulu, kadi udi umona bantu bahuekele; udi mumanye badi ne dihetu hatshidibo kule.

⁷ Nansha bingenda munkatshi mua makenga, wewe neusangashe muoyo wanyi. Udi wolola tshianza tshiebe bua kukanda tshiji tshia badi nʼanyi lukuna, tshianza tshiebe tshia balume tshidi tshinsungila.

⁸ Yehowa neamane malu adiye uhangidisha bua bualu buanyi. Yehowa, luse luebe ludi lujalame tô ne tshiendelele. Kulekedi mudimu uwakenza ne bianza biebe.