Misambu 106 - Mukanda wa Nzambi Dihungila Dikulukulu ne Dihungila Dihia-dihia 2003

Buhidia bua Bena Isalele

¹ Tumbishai Yehowa! Nusakidile Yehowa, bualu bua yeye udi muimpe; bua luse luandi ludi lujalame tshiendelele.

² Udi mua kuambila bantu bua bienzedi binene bia Yehowa nganyi? Anyi udi mua kubalesha butumbi buandi buonso nganyi?

³ Disanka didi kudi badi balonda kulumbulula kuakane, ne badi benza malu makane misangu yonso.

⁴ Yehowa, unvuluke hawalesha bantu bebe luse, ulue kunkuatshisha ne luhandu lûdi ubaha,

⁵ bua utangile bianyi diakalengele dia bantu bawakusungula, bua nsanke bianyi mu disanka dia tshisamba tshiebe, bua ntumbe bianyi diatshimue ne ba mu buhianyi buebe.

⁶ Tuakuenza bibi bu muakenza batatu betu; tuakuenza malu a tshishiku, tuakuenza malu mabi.

⁷ Batatu betu bakadi mu Ejipitu kabakalama malu ebe a kukema mu mitshima yabo. Kabakavuluka divulangana dia luse luebe lujalame, kadi bakatombokela Nzambi Mutambe Bunene wa mu diulu ku Mai Manene Makunze.

⁸ Kadi yeye wakabasungila bualu bua dina diandi, bua kumanyisheye bantu bua bukole buandi bunene.

⁹ Wakabela Mai Manene Makunze kabidi ne akakama; nunku wakabalombola bua kubahitshisha mu mai a ndondo bu muakadibo mua kuhita ha buloba bûme.

¹⁰ Ka wakabasungila mu bianza bia wakabakina, wakababikila mu bukole bua bakadi nʼabo lukuna,

¹¹ Mai akubuikila bakengeshi babo, kakuakadi umue wabo wakashala.

¹² Hashishe, bakitabusha mei andi, bakimba misambu ya kumutumbisha nʼai.

¹³ Bakahua bienzedi biandi muoyo lukasa; kabakindila dî diandi.

¹⁴ Kadi bakasamina muoyo ne lukuka lukole mu tshihela; bakatela Nzambi mu tshihela tshia lusenga.

¹⁵ Yeye wakabaha tshintu tshiakalombabo, kadi wakatuma tshinyanu mu mitshima yabo.

¹⁶ Bakadi ne Mose mukau kabidi mu tshitudilu; bakadi ne Alona, muntu wa tshijila wa Yehowa, mukau muomumue.

¹⁷ Buloba buakabulula mukana muabu, buakamina Datana, buakabuikila ba mu tshisumbu tshia Abilama.

¹⁸ Kahia kakatema munkatshi mua tshisumbu tshiabo; ludimi lua kahia luakosha bantu babi.

¹⁹ Bakenza kana ka ngombe ku Holeba, bakatendelela luhingu luakatulabo.

²⁰ Bakashintakasha wabo wa butumbi ku tshifuanyikishi tshia ngombe utu wadia mashinde.

²¹ Bakahua Nzambi Musungidi wabo muoyo, wakabenzela malu manene mu Ejipitu,

²² wakabenzela bienzedi bia kukema mu boloba bua Hama ne malu akamatshisha bantu buowa ku Mai Manene Makunze.

²³ Nunku yeye wakamba ne, Nembabutule; bualu buakadiye kuenza, kadi Mose, muntu wandi musungula, wakimana hankatshi habo ne Nzambi bua kukudimuneye tshiji tshiandi bua kababutudi.

²⁴ Hashishe, bakahetula buloba abu buimpe, kabakitabusha dî dia mulayi wandi.

²⁵ Kadi bakatontolola mu nsubu yabo ya ntenta, kabakunvua dî dia Yehowa.

²⁶ Nunku yeye wakabisha tshianza tshiandi bua kuditshiha bua bualu buabo ne, Nembahoneshe mu tshihela,

²⁷ nentangadishe tunkanunuma tuabo munkatshi mua bisamba bia bantu ba bende, nentumuangalashe mu maloba au.

²⁸ Bakadilamika kudi Bâla-Peô; bakadia milambu mifila kudi bafue.

²⁹ Nunku bakakuatshisha Yehowa tshiji bua bienzedi biabo, ne tshihuhu tshiakamueneka munkatshi muabo.

³⁰ Hashishe, Pinehasa wakajuka, wakashikisha tshilumbu, nunku tshihuhu tshiakalekeshibua.

³¹ Bualu ebu buakabadibua kudiye bu buakane ku tshikondo ku tshikondo tô ne tshiendelele.

³² Bakakuatshisha Yehowa tshiji kabidi ku mai a Meliba, ne muanda eu wakakebela Mose dikenga bua bualu buabo.

³³ Bualu bua bakanyingalasha mutshima wandi, ne wakamba biandi mei akadi kâyi ne meji ku mishiku yandi.

³⁴ Kabakabutula bena buloba abu bu muakabambila Yehowa,

³⁵ kadi bakabuelakana ne ba mu bisamba abi bia bantu, bakayila mua kuenza bu muakadibo benza.

³⁶ Bakakuatshila mpingu yabo mudimu, yakalua buteyi kudibo.

³⁷ Bulelela, bakashihela bademon bana babo baledibue, balume ne bakashi, bu milambu.

³⁸ Bakatatshisha mashi a bantu bakadi kabayi ne tshilumbu hanshi, akadi mashi a bana babo baledibue, balume ne bakashi, bakashihelabo mpingu ya mu Kanâna bu milambu. Buloba buakanyanguka ne mashi.

³⁹ Nunku bakadibihisha ku bienzedi biakenzabo, bakalonda malu a masandi mu bienzedi biabo.

⁴⁰ Bua malu â tshiji tshia Yehowa tshiakatemena bantu bandi bua kuba kengesha, yeye wakakenuka ba mu buhianyi buandi.

⁴¹ Wakabafila mu bianza bia bisamba bia bantu ba bende; bantu bakadi nʼabo lukuna bakabakokesha.

⁴² Bena lukuna babo kabidi bakabakengesha, ne bakinamishibua muinshi mua bukole buabo.

⁴³ Yeye wakabahandisha misangu ya bungi, kadi bakamutombokela ne malu akahangidishabo, ne bakahuekeshibua hanshi bualu bua malu abo a tshishiku.

⁴⁴ Kadi yeye wakamona dikenga diabo hakunvueye muadi wabo.

⁴⁵ Wakavuluka tshihungidi tshiandi bua bualu buabo, wakakudimuna mutshima wandi bu mudi divulangana dia luse luandi lujalame.

⁴⁶ Yeye wakabayuisha bantu ba kufuidibua luse kudi bonso bakadi babakuata mu buhika.

⁴⁷ Utusungile, wewe Yehowa Nzambi wetu, utûmushe munkatshi mua bisamba bia ba bende bua kutusangisha hamue, bua tuetu tusakidile dina diebe dia tshijila, ne bua tutumbile mu butumbi buebe.

⁴⁸ Yehowa, Nzambi wa Isalele, avudishibue disanka, ku tshibangidilu tô ne kunshikidilu! Bantu bonso bambe biabo ne, Amen! Tumbishai Yehowa!