Misambu 105 - Mukanda wa Nzambi Dihungila Dikulukulu ne Dihungila Dihia-dihia 2003

Malu a Kukema Akenzela Yehowa Bena Isalele

¹ Nusakidile bienu Yehowa, nubikile dina diandi, numanyishe bienzedi biandi munkatshi mua bukua bantu.

² Numuimbile misambu, numuimbile misambu ya kumutumbisha nʼai, nuyikilangane bua malu andi onso a kukema.

³ Nutumbile mu dina diandi dia tshijila; mitshima ya badi bakeba Yehowa isanke.

⁴ Kebai bienu Yehowa ne bukole buandi, kebai mpala wandi matuku onso.

⁵ Nuvuluke bienu bienzedi bia kukema biakenzeye, malu andi a kukema ne dilumbulula dia mukana muandi,

⁶ nuenu tunkanuniuna tua Abalahama muntu wandi, nuenu bana ba Yakoba, bantu bakasunguleye.

⁷ Yeye udi Yehowa Nzambi wetu; dilumbulula diandi diakenjibua mu buloba buonso.

⁸ Udi uvuluka tshihungidi tshiandi kashidi, ndi mene diakajadikeye tô ne ku bikondo tshinunu,

⁹ tshihungidi tshiakahungeye ne Abalahama, mmutshihu wandi wakaditshiheye kudi Isaka.

¹⁰ Wakajadika kudi Yakoba bu mukenji ne kudi Isalele bu tshihungidi tshia tshiendelele.

¹¹ Wakamba ne, Nenkuhe buloba bua Kanâna, bua kuikalabu tshituha tshia nuenu kuhiana.

¹² Hakadibo bantu banya-banya bua bungi buabo, e, hakadibo bantu banya-banya be, ne hakashikamabo mu buloba bu benyi;

¹³ hakendakanabo ku tshisamba ne ku tshisamba, ne ku bukelenge bumue tô ne ku bantu bakuabo ba bende.

¹⁴ Yeye kakitabusha bua muntu umue kubenzela bibi. E, wakabela bakelenge bualu buabo.

¹⁵ Wakamba ne, Kanulengi bantu banyi bedibue manyi ha mutu tshianza, kanuenzedi baprofete banyi bibi.

¹⁶ Wakabikila tshiole bua kuluatshi ha buloba abu; wakumusha tshintu tshionso tshiakeyemenabo bua kuheta bia kudia.

¹⁷ Wakatuma muntu bua kudianjileye ku mpala kuabo, Yosefe mene wakahanyibua bu muhika.

¹⁸ Bakasamisha makasa andi ne nkanu yakasuikabo nʼai, bakamuela lukanu lua tshiamu tshifike;

¹⁹ dî dia Yehowa diakamuteta tô ne hakafika tshikondo tshia malu akambeye.

²⁰ Mukelenge wakatuma dî bua kumusulula, mukokeshi wa bantu mene wakamulekesha.

²¹ Wakamuyisha mukelenge ku mutu kua nsubu wandi, ne mukokeshi wa bintu biandi bionso.

²² Bua kulesheye baminyampala bu muakadiye musue, ne bua kuyisheye bakulu bandi meji.

²³ Isalele kabidi wakabuela mu Ejipitu; Yakoba wakashikama mu buloba bua Hama.

²⁴ Yehowa wakavudisha bantu bandi bua kukumbanabo ba bungi, wakabavuisha bantu bahite bena lukuna babo bukole.

²⁵ Wakakudimuna mitshima ya bantu aba bua kuikalabo ne bantu bandi lukuna, bua kuenzela bakuatshi bandi ba mudimu malu a budimu.

²⁶ Wakatumaku Mose muntu wandi, ne Alona wakasunguleye.

²⁷ Bobo bakabalesha bimanyinu biandi munkatshi muabo, bakenza malu a kukema mu buloba bua Hama.

²⁸ Wakatuma mîdima, wakayosha mufitu mu buloba; ne bakatombokela mei andi.

²⁹ Wakakudimuna mai a misulu yabo bua kuluau mashi, wakashiha minyinyi yabo ya mu mai.

³⁰ Buloba buabo huakûla tente ne biula, bibuele mu nsubu ya bakelenge babo mene.

³¹ Wakamba dî diandi, njiji yakalua mu bisumbu bia bungi, ne nkusu yakamueneka mu nseke yonso ya buloba buabo.

³² Wakabaha mabue a nvula akabalokela bu nvula, ne miele ya nvula yakahenya mu buloba buabo.

³³ Wakashiha mionshi yabo ya nyinyo kabidi, ne mitshi yabo ya nngi, wakatshibula mitshi yakadi mu buloba buabo.

³⁴ Wakela dî diandi, mikumbi yakalua, bana ba mikumbi bakadi kabayi mua kubadibua bakahia.

³⁵ Yakadia midioko yonso ya mu buloba buabo, yakadia bia kudia biakadi buloba buabo budiundisha.

³⁶ Wakashihesha banʼa bute bonso ba mu buloba buabo, bana aba mene bakadianjilabo kulela mu buloba buabo.

³⁷ Ka yeye wakaluhula Bena Isalele batuala biabo biamu bia argent ne or; kakuakadi muntu umue munkatshi mua bisamba biabo wakalenduka.

³⁸ Ba mu Ejipitu bakadi ne disanka hakaya bantu aba; bualu bua buowa buakamana kubakuata bualu buabo.

³⁹ Yeye wakababaluluila ditutu bu tshibuikidi, ne kahia ka kubatemena butuku.

⁴⁰ Bakamulomba ne yeye wakabaha nkuadi, wakabukutshisha ne bidia bia mu diulu.

⁴¹ Yeye wakahanda dibue, mai akahumukamu; akahueka mu miaba miume bu musulu.

⁴² Bualu bua wakavuluka biandi dî diandi dia tshijila, ne Abalahama muntu wandi.

⁴³ Wakaluhula bantu bandi ne disanka, bantu bakasunguleye mene bimba biabo misambu.

⁴⁴ Wakabaha maloba a bisamba bia bantu ba bende; bakadiangatshila bintu biakaheta bantu ba bende ku mudimu wabo mukole.

⁴⁵ Bua kulondabo mei akabambileye; ne bua kutumikilabo mikenji yandi. Tumbishai Yehowa!