Misambu 104 - Mukanda wa Nzambi Dihungila Dikulukulu ne Dihungila Dihia-dihia 2003

Yehowa Udi Ulama Bifukibua Biandi

¹ Mutshima wanyi, uvudishile Yehowa disanka! Wewe Yehowa, Nzambi wanyi, udi mutambe buneme! Udi muluate buneme ne butumbi,

² wewe udi uluata munya bu tshitalu; udi uvungulula bia mu diulu bu tshilulu tshikudika.

³ Udi ujadika makunshi a nsubu wandi wa mulu mu mai, udi uvuisha matutu bu dikalu diandi, udi wendakana ha mahuahua a luhehele.

⁴ Udi uvuisha mpehele bu ba-messager bandi, ne ndimi ya kahia bu bakuatshi bandi ba mudimu.

⁵ Wakajadika buloba ha bishimikidi biabu, bua kabunyungi tô ne kashidi.

⁶ Wakabiluatshisha ne mai a ndondo bu tshivualu, mai akûla ha mutu ha mikuna.

⁷ Hawakabela mai, akanyema; hakunvuau tshiona tshia mukungulu webe, akumukaku lukasa,

⁸ mikuna mile yakabanda kulu, bibanda biakahueka hanshi to ne ku muaba uwakubilongoluela.

⁹ Wakasungula mai mukalu wakadiu kâyi mua kusambuka, bua kâhinganyi kabidi bua kubuikila buloba.

¹⁰ Udi utuma mishimi idi ihatula mai mu mpongo, misulu idi ihueka munkatshi mua mikuna.

¹¹ Idi inuisha nyama yonso ya mu mpata mai, nyama ya mpunda ya mu tshisuku idi Imana nyota yai.

¹² Nyunyu ya mulu idi ne masua ai hehi nʼai, idi idila munkatshi mua matamba a mitshi.

¹³ Udi utuma mai ha mikuna mafume ku nsubu wandi wa mulu. Buloba budi bûle tente ne mamuma a ku mudimu webe.

¹⁴ Udi umeneshila bimuna mashinde, udi umeneshila bantu midioko bua kuyidiundishabo. Mbua bamanye mua kuhatula bia kudia mu buloba,

¹⁵ ne nyinyo idi isankisha mutshima wa muntu, ne manyi adi akenkesha mpala wandi, ne bidia bidi bikolesha mutshima wandi.

¹⁶ Mitshi ya Yehowa idi miule tente ne tshitelele, mmitshi ya cêdre ya mu Lebanona yakatentuleye.

¹⁷ Nyunyu idi yibakamu masua ai, kasongo nyunyu kadi ne nsubu waku mu mitshi ya cyprès.

¹⁸ Mikuna mile idi bua mbushi ya tshisuku; mabue adi tshinyemenu tshia nyama ya nsenji.

¹⁹ Wakufika biandi ngondo bua kutahulula ngandi bidimu; diba didi dimanye tshikondo tshia kubueladi.

²⁰ Udi uvuisha biebe mîdima, butuku budi biula, halua nyama yonso ya muitu kuhatuka bua kubombelelai.

²¹ Bana ba nyama ya ntambue badi badila tshintu tshia kukuatabo, badi bakeba bia kudia biabo kudi Nzambi.

²² Diba didi dibanda, badi bumuka bua kuyabo, badi balala mu mena ai.

²³ Bantu badi baluhuka bua kuya ku midimu yabo ne bua kuyenza, tô ne habuela diba.

²⁴ Yehowa, mona mudi bungi bua mishindu ya midimu yebe! Wewe wakenza buonso buai ne lungenyi luebe; buloba budi bûle tente ne bintu biwakafuka.

²⁵ Kuakua kudi mai manene, adi manene ne adi ne butshiama bunene, mudi bintu bidi kabiyi mua kubadibua biendakanamu, nnyama mikese ne nyama minene kabidi.

²⁶ Aha hadi hahita matu manene, ne nyama munene udimu uwakafuka bua kunayamu.

²⁷ Bintu ebi bionso bidi bikutekemena, bua wewe kubiha bia kudia biabi mu tshikondo tshiabi.

²⁸ Wewe udi ubihabi, bidi bibisangisha; udi ubulula tshianza tshiebe, bidi biukuta ne bintu bimpe.

²⁹ Udi usokoka mpala webe, bidi bitshina; udi ubiumushila muhuya wabi, bidi bifua ne bidi bihingana ku dinfuenkenya diabi kabidi.

³⁰ Udi utumaku Nyuma webe, bidi bifukibua; udi wandamuna mpala wa buloba tshiakabidi bulue buhia-buhia.

³¹ Butumbi bua Yehowa buikaleku tshiendelele; Yehowa asanke mu bienzedi biandi.

³² Udi umona buloba, budi buzakala; udi ulenga mikuna tshianza, idi ihatula muishi wa kadilu.

³³ Nengimbile Yehowa misambu hantshidi ne muoyo; nengimbile Nzambi wanyi misambu ya kumutumbisha nʼai hantshidiku.

³⁴ Meji andi ngela bua bualu buandi amusankishe, bua meme ndi nsanka mu Yehowa.

³⁵ Benji ba malu mabi bajimine, bumushibue mu buloba, bantu babi kabikadiku kabidi! Mutshima wanyi, uvudishile Yehowa disanka! Tumbishai Yehowa!