Matayi 9 - Mukanda wa Nzambi Dihungila Dikulukulu ne Dihungila Dihia-dihia 2003

Yesu udi uhingana mu Kapênuma

¹ Yesu wakabuela mu buatu, wakasabuka, wakalua mu musoko muandi.

² Bakalua ne muntu wakadi ne disama dia kaneke mulale ha bulalu; bakatangila Yesu ditabusha diabo, wakambila muena kaneke ne, Muanʼanyi, kolesha mutshima webe, mibi yebe idi mijimishibue.

³ Bafundi bakuabo bakamba munda munda ne, Muntu eu udi uhenda Nzambi.

⁴ Yesu wakamanya meshi abo, wakamba ne, Nudi nuelangana meshi a bualu bubi munda muenu bua tshinyi?

⁵ Tshidi tshitambe butekete ntshinyi, kuambila muena kaneke ne, Mibi yebe idi mijimishibue, anyi kumuambila ne, Bika, enda biebe?

⁶ Kadi bua nuenu mimanye ne, Muana wa muntu udi ne bukole, hatshidiye ha buloba bua kujimisheye mibi (yeye wakambila muena kaneke ne), Bika biebe, ambula bulalu buebe, uye ku nsubu kuebe.

⁷ Yeye wakabika, wakaya ku nsubu kuandi.

⁸ Kadi bakatangila bantu bualu ebu, bakatshina, bakatumbisha Nzambi, bualu bua yeye wakaha bantu bukole nunku.

Yesu udi Ubikila Matayo

⁹ Hakadi Yesu umukaku, wakamona muntu, dina diandi Matayo, mushikame ku tshilambuidi, wakamuambila ne, Undonde; yeye wakabika, wakamulonda.

Yesu udi ubela Bafalese

¹⁰ Hakadiye ushikama udia bidia mu nsubu, basangishi ba mulamba bakalua, ne bantu babi kabidi, bakashikama ku mesa ne Yesu ne bayidi bandi.

¹¹ Hakamona Bafalese bualu ebu, bakambila bayidi bandi ne, Muyishi wenu udi udila ne basangishi ba mulambu ne bantu babi tshinyi?

¹² Hakunvua Yesu dî diabo, yeye wakamba ne, Badi ne bukole kabena ne muondahi bualu, anu badi ne mabedi.

¹³ Yai bienu nuyile dî edi ne, Ndi musue luse, tshiena nsua nyama minshihela; meme tshiakuluila bua kubikila badi bakane, nakuluila bua kubikila badi babi.

¹⁴ Hashishe, bayidi ba Yone bakahia kudi Yesu ne, Tuetu ne Bafalese tutu tuajila bia kudia misangu ya bungi, kadi bayidi bebe kabatu bajila bia kudia bualu kai?

¹⁵ Yesu wakabambila ne, Balunda ba mubaki wa mukashi badi bamanye mua kudila muadi hatshidi mubaki wa mukashi nʼabo, anyi? Kadi matuku nealue abanyengabo mubaki wa mukashi, nebajile bia kudia matuku au.

Lusumuinu lua tshivualu ne tua mitondo ya biseba

¹⁶ Bantu kabatu batelelula tshihesa tshia tshilulu tshidi katshi tshifuatalale ha tshivualu tshikulukulu; nunku tshihesa tshiakamba kubuikila disoso netshidibalulule, nunku netshidivundishe.

¹⁷ Nunku kabidi bantu kabatu bela maluvu mahia-mahia mu milondo ya biseba bikulukulu; bienzabo nunku, biseba nebihandike, maluvu neaye hanshi, ne biseba nebifue; kadi bantu batu heta maluvu mahia-mahia mu biseba bihia-bihia, ne bubidi buabi nebishale.

Yesu udi ushikisha disama dia mukashi wakadi ne mashi ahatuka, udi ubisha muana mukashi wa mukelenge Yailo

¹⁸ Hakadi Yesu ubambila mei â, mukelenge wa nsunagoga wakalua, wakamukukuila ne, Muanʼanyi mukashi ukadi mufue; kadi ulue biebe, umulenge tshianza tshiebe, neikale ne muoyo.

¹⁹ Yesu wakabika, biandi, wakamulonda ne bayidi bandi.

²⁰ Monai, mukashi wakalua ku nyima kua Yesu, wakadi ne disama dia mashi ahatuka bidimu dikumi ne bibidi, wakalenga tshianza tshiandi ku mubangu wa tshivualu tshia Yesu;

²¹ mukashi wakadi wamba munda ne, Binalenga ku tshivualu tshiandi, nenkoleshibue.

²² Yesu wakatshinguluka, wakamumona, wakamuambila ne, Muanʼanyi, kolesha mutshima webe, kuitabusha kuebe kuakukusungila. Ha diba adi mene mukashi au wakakoleshibua.

²³ Hakaya Yesu mu nsubu wa mukelenge, hakamoneye bena nshiba ne tshisumbu tshia bantu bateka mutoyi,

²⁴ yeye wakamba ne, Shiai mpunga, muana kena mufue, udi mulale tulu. Bakamuseka.

²⁵ Hakumushabo tshisumbu tshia bantu, Yesu wakabuela, wakamukuata ku tshianza, muana wakabi.

²⁶ Lumu lua bualu abu luakatangadika mu luseke alu luonso.

Yesu udi wondaha bafofo babidi

²⁷ Hakadi Yesu umukaku, bafofo babidi bakamulonda bela dî diabo ne, Wewe muana wa Davidi, utufue luse.

²⁸ Hakalueye mu nsubu, bafofo bakatua kudiye, Yesu wakabambila ne, Nudi nuitabusha ne, Meme udi mumanye mua kuenza bualu ebu, anyi? Bakamuandamuna ne, E, Mukelenge.

²⁹ Hashishe, wakabalenga ku mesu abo, wakamba ne, Bualu bunuenzekele bu mudi ditabusha dienu.

³⁰ Mesu abo akabuluka. Yesu wakabakandika ne, Muntu mukuabo kamanyi bualu ebu.

³¹ Kadi bobo bakaluhuka, bakatangalasha lumu luandi mu luseke alu luonso.

Yesu udi wondaha kamama

³² Hakadibo baluhuka, bakalua kudiye ne kamama kakuatshike ne demon.

³³ Hakumusheye demon, kamama kakakula; bantu bakakema ne, Diambedi kabakanza kutangila bualu nunku mu Isalele.

³⁴ Kadi Bafalese bakamba ne, Yeye udi umusha bademon ne bukole bua mukelenge wa bademon.

Yesu udi ne bantu bajimine lule

³⁵ Yesu wakendakana mu bimenga bionso ne mu misoko mikese, uyisha bantu mu nsunagoga yabo, ubambila bualu bua lumu luimpe lua bukelenge bua mu diulu, ukolesha bantu bakadi ne mabedi ne matekete onso.

³⁶ Kadi hakatangileye bisumbu bia bantu, wakadi nʼabo luse, bualu bua bobo bakadi batata, bakadi bamuangalake bu mikoko idi kayi ne mulami.

³⁷ Yeye wakambila bayidi bandi ne, Bulelela, bintu bia kunowa bidi bia bungi, kadi bena mudimu badi banya-banya.

³⁸ Nunku, nulombe Mukelenge wa bintu bia kunowa, atume biandi bena mudimu mu kunowa kuandi.