Matayi 8 - Mukanda wa Nzambi Dihungila Dikulukulu ne Dihungila Dihia-dihia 2003

Yesu udi ulengesha muena nsudi

¹ Hakahuekeye ha mukuna, bisumbu binene bia bantu biakamulonda.

² Muena nsudi wakalua kudiye, wakamukukuila, ne, Mukelenge, biwasua, udi mumanye mua kundengesha.

³ Yesu wakolola tshianza tshiandi, wakamulenga ne, Ndi musue, wikale mulengeshibue. Nsudi yandi yakashika lukasa.

⁴ Yesu wakamuambila ne, Kuambidi muntu bualu ebu, uye biebe, udileshe kudi muakuidi wa Nzambi, ufile tshiakamba Mose bu tshimanyishilu ku mesu kua bantu.

Yesu udi ushikisha disama dia muntu wa kapitene ka masalayi lukama

⁵ Hakabueleye mu Kapênuma, kapitene ka masalayi lukama wakalua kudiye, wakamutendekena ne,

⁶ Mukelenge, muntu wanyi udi mulale mu nsubu, udi ne disama dia kaneke, udi ukenga bikole.

⁷ Yesu wakamuambila ne, Nendue kushikisha disama diandi.

⁸ Kapitene wakamuandamuna ne, Mukelenge, meme tshiena muntu mimene mua wewe kubuela mu nsubu muanyi; wewe wamba anu dî diebe, Buntu wanyi neasangale.

⁹ Meme kabidi ndi ku nyima kua bakuabo, ndi ne masalayi ku nyima kuanyi; ntu ngambila edi disalayi ne, Ya, yeye waya; ntu ngambila dikuabo ne, Lua, yeye walua; ntu ngambila Buntu wanyi ne, Enza bualu ebu, yeye wenza.

¹⁰ Hakunvua Yesu dî diandi, yeye wakakema, wakambila bakadi bamulonda ne, Bulelela, Udi nuambila ne, Munkatshi mua Bena Isalele mene mene tshiakusanganamu ditabusha dinene nunku.

¹¹ Ndi nuambila ne, Bantu ba bungi nebalue ku esete ne ku wesete, nebadie bidia ne Abalahama ne Isaka ne Yakoba mu bukelenge bua mu diulu;

¹² kadi nebimashe bana ba mu bukelenge ha bula mu mîdima; muadi newikalemu ne kusumakana menu.

¹³ Yesu wakambila kapitene ka masalayi ne, Ya biebe; bualu bua wewe wakuitabusha, nebakuenzele tshiwakulomba. Muntu wandi wakasangala ha diba adi mene.

Yesu udi ukolesha muku wa Petelo mukashi

¹⁴ Hakabuela Yesu mu nsubu wa Petelo, wakamonamu muku wandi mukashi mulale hanshi ne disama dia mubidi kahia.

¹⁵ Yesu wakalenga ku tshianza tshia mukashi, kahia kakamulekela; yeye wakabika, wakamulongoluela bia kudia.

¹⁶ Hakamba diba kuhueka, bakalua ne bantu ba bungi bakadi bakuatshike ne bademon kudiye; wakumusha nyuma mibi ne dî diandi, wakakolesha bena mabedi bonso;

¹⁷ bua kushikisha dî diakamba muprofete Yeshaya ne, Yeye wakuangata matekete etu, wakutuala mabedi etu.

Yesu udi uteta bayidi bandi bakuabo munda

¹⁸ Hakatangila Yesu bisumbu bia bantu bamunguile, yeye wakamba ne, Tuyai dishia dia dishiba.

¹⁹ Mufundi wakalua kudiye, wakamuambila ne, Muyishi nenkulonde kuonso kuwaya.

²⁰ Yesu wakamuambila ne, Mibuabua idi ne mena ai, nyunyu ya mulu idi ne masua ai; kadi Muana wa muntu kena ne ha kuladika mutu wandi.

²¹ Muyidi wandi mukuabo wakambila Yesu ne, Mukelenge, witabusha bua meme nye diambedi bua kujikisha tatu wanyi.

²² Kadi Yesu wakamuambila ne, Ndonda meme, shîa bafue bajike bafue babo.

Yesu adi ubatamisha mavuala

²³ Hakabueleye mu buatu, bayidi bandi bakamulonda.

²⁴ Tshihuhu tshikole tshiakalua ha dishiba, mavuala akabuikila buatu; kadi Yesu wakadi mulale tulu.

²⁵ Bobo bakalua kudiye, bakamubisha ne, Mukelenge, utusungile, tudi tufua.

²⁶ Yeye wakabambila ne, Nuenu bena ditabusha dikese, nudi nutshinyina tshinyi? Hashishe, yeye wakabika, wakabuikila luhehele ne mai a dishiba, muaba au wakatalala talalâ.

²⁷ Bantu bakakema ne, Eu udi muntu kai? Luhehele ne mai a dishiba bidi bimunvuila.

Ku Gadala Yesu udi umusha bademon munda mua bantu

²⁸ Hakafikeye dishia mu luseke lua Bena Gadala, bantu babidi bakadi bakuatshike ne bademon bakalua kusangila ne Yesu, bakaluhuka mu majambu, bakadi bafuna bulobo, bantu kabakamanya mua kuhitshilaku.

²⁹ Bakela dî bikole ne, Wewe Muana wa Nzambi, tudi nʼebe bualu kai? Wewe wakulua kutukengesha diambedi dituku dia dikenga dietu kadî dianze kulua, anyi?

³⁰ Tshisumbu tshia ngulube ya bungi tshiakadi kuakua, yakadi idia mashinde.

³¹ Bademon bakamutendekena ne, Biwatumusha, ututuma mu tshisumbu tshia ngulube.

³² Yeye wakabambila ne, Yai bienu. Bakaluhuka, bakabuela munda mua ngulube; tshisumbu tshionso tshiakanyemena lubilu ku tshibungubungu, yakahona mu dishiba, yakafila mu mai.

³³ Badishi ba ngulube bakanyema, bakaya ku musoko, bakamba malu onso ne bualu buakulua kudi badi bakuatshike ne bademon.

³⁴ Bantu bonso ba mu musoko bakalua kusangila ne Yesu; hakamumonabo, bakamutendekena ne, Umuka ku luseke luetu.