Matayi 28 - Mukanda wa Nzambi Dihungila Dikulukulu ne Dihungila Dihia-dihia 2003

Dibika dia Yesu ku lufu ne malu makuabo a dituku adi

¹ Dituku diabo dia kuikisha diakamba kushika; hakabanga butuku kutshia bua dituku dia kumudilu dia lumingu, Malia wa ku Magadala ne Malia mukuabo bakalua kutangila lukita.

² Monai, buloba buakakanka bikole; muanjelo wa Mukelenge wakahueka hanshi mufume mu diulu, wakalua, wakumusha dibue, wakashikamahu.

³ Mpala wandi wakadi bu muele wa nvula, bilulu biandi biakadi bitoke tô bu neje;

⁴ balami bakamutshina, bakazakala, bakalua bu bantu bafue.

⁵ Muanjelo wakandamuna bakashi ne, Kanuntshinyi; ndi mumanye ne, Nudi nukeba Yesu, wakashihabo ku mutshi mutshiamakane.

⁶ Yeye kena kunoko, wakubika bu muakambeye. Luai, numone muakadiye mulale.

⁷ Yai bienu lubilu, nuambile bayidi bandi ne, Yeye wakubika ku lufu; monai, neadianjile ku mpala kuenu mu Galela, nenumumoneku; nakunuambila bualu ebu.

⁸ Bakumuka lukasa ku lukita ne buowa ne disanka dinene, bakaya lubilu bua kumanyisha bayidi bandi.

⁹ Yesu wakasangila nʼabo, wakabela muoyo. Bakalua kudiye, bakamukuata ku makasa, bakamukukuila.

¹⁰ Hashishe, Yesu wakabambila ne, Kanutshinyi; yai bienu, nuambile bana betu ne, Yai mu Galela, nenunmoneku.

¹¹ Hakadibo baya, balami bakuabo bakalua mu musoko, bakambila bakuidi banene malu onso.

¹² Hakasangishabo ne bakulu, hakahungabo dî, bakaha masalayi mpalata ya bungi,

¹³ bakambila ne, Nuambe ne, Hatuakadi balale tulu, bayidi bandi bakalua butuku, bakamuiba.

¹⁴ Biunvua ngovena tshilumbu etshi, netumuitabushishe, neanusungile, kawena ne bualu.

¹⁵ Masalayi akangata mpalata, akenza bu muakâmbilabo; lumu elu, bakalutangadisha munkatshi mua Bena Yuda tô ne katataka.

Yesu udi ma Galela: mukenshi wandi Munene

¹⁶ Bayidi dikumi ne umue bakaya mu Galela, ku mukuna wakabambila Yesu.

¹⁷ Hakamumonabo, bakaulukukuila; kadi bakuabo bakela mpata.

¹⁸ Yesu wakalua kudibo, wakabambila ne, Bakumana kumpa bukokeshi buonso mu diulu ne ha buloba.

¹⁹ Bualu bua meme ndi ne bukokeshi ebu, yai bienu, nuvuishe ba bisamba bionso bayidi, nubabatize mu dina dia Tatu ne mu dia Muana ne mu dia Nyuma Muimpe;

²⁰ nubayishe mua kuenza malu onso anakanuambila; ne monai, ndi nʼenu matuku onso tô ne kunshikidilu kua tshikondo etshi.