Matayi 27 - Mukanda wa Nzambi Dihungila Dikulukulu ne Dihungila Dihia-dihia 2003

Balumbuludi badi bafila Yesu mu bianza bia Pilato

¹ Hakatshia butuku, bakuidi banene bonso ne bakulu ba bantu bakasangisha dî diabo ne, Tushihai Yesu;

² bakamusuika, bakaya nʼandi, bakamufila mu bianza bia ngovena Pilato.

Mutshima wa Yudasa udi unyingalala tshianana

³ Hashishe, mutshima wa Yudasa, mumutungidi, wakatamba kunyingalala, hakamoneye ne, Bakumuhisha, wakahingana ne bituha bia mpalata makumi asatu kudi bakuidi banene ne kudi bakulu,

⁴ wakamba ne, Nakuenza bibi bualu bua nakutungila muntu tshitungu udi kai ne bualu. Kadi bobo bakamuambila ne, Ebu mbualu buetu, anyi? Mbualu buebe.

⁵ Wakimasha bituha bia mpalata hanshi mu ntempelo, wakumuka biandi, wakaya wakadiowa.

⁶ Bakuidi banene bakangata bituha bia mpalata, bakamba ne, Kuteka bintu ebi mu tshibutshilu tshia Nzambi kudi kushiha mukenshi, bualu bua bidi mushinga wa mashi.

⁷ Bakasangisha di diabo, bakasumba nʼabi muaba wakadi wa mufumbi wa bifuadi bualu bua kujikahu bantu ba bende.

⁸ Ebu mbualu budibo babikila muaba au ne, Muaba wa mashi, tô ne katataka.

⁹ Nunku bakashikisha dî diakambabo kudi muprofete Yelemiya ne, Bakangata bituha bia mpalata makumi asatu, muakatuabo mushinga wandi, bu mushinga wandi wakatuabo kudi Bena Isalele;

¹⁰ bakabifila bua kusumba muaba wakadi wa mufumbi wa bifuadi, bu muakadi dî dia Mukelenge.

Pilato udi ukonka Yesu

¹¹ Yesu wakimana ku mpala kua ngovena Pilato; ngovena wakamukonka ne, Wewe udi Mukelenge wa Bena Yuda, anyi? Yesu wakamuambila ne, Bûdi wamba mbulelela.

¹² Hakamubanda bakuidi banene ba Nzambi ne bakulu, yeye kakabandamuna dî.

¹³ Pilato wakamukonka ne, Kuena unvua malu a bungi adibo bakubanda, anyi?

¹⁴ Yeye kakamuandamuna nasha di dimue; ngovena wakatamba kukema.

Yesu anyi Balaba?

¹⁵ Mu disanka dia Kuhita kua Yehowa ngovena wakadi ne tshilele tshia kulekelela bantu muena lukanu umue wakulombabo.

¹⁶ Matuku au bakadi ne muena lukanu wa lumu lunene, dina diandi Balaba.

¹⁷ Hakadisangishabo hohamue, Pilato wakabakonka ne, Nudi basue meme nulekelele nganyi? Balaba, anyi Yesu udibo babikila ne, Kilisto?

¹⁸ Yeye wakamanya ne, Bobo bakumufila bualu bua mukau.

¹⁹ Hakadiye ushikama mu nkuasa wa bulumbuludi, mukashi wandi wakamutumina dî ne, Kubuedi mu bualu bua muntu muakane eu; lelu nakutamba kukenga mu tshilota bua bualu buandi.

²⁰ Bakuidi banene ba Nzambi ne bakulu bakenzesha bisumbu bia bantu ne, Nulombe Balaba, nushihe Yesu.

²¹ Kadi ngovena wakabakonka ne, Badi babidi, nudi basue meme nulekelele nganyi? Bobo bakitaba ne, Balaba.

²² Pilato wakabakonka ne, Ngenzele Yesu, udibo babikila ne, Kilisto, tshinyi? Bonso bakitaba ne, Bamushihe ku mutshi mutshiamakane.

²³ Wakabakonka ne, Kadi yeye wakuenza bualu bubi kai? Bakatamba kuela mbila ne, Bamushihe ku mutshi mutshiamakane.

²⁴ Hakatangila Pilato ne, Nakushikila, diyoyo dikadi ha kujuka, yeye wakangata mai, wakuha bianza ku mesu kua bantu bonso, wakamba ne, Tshiena ne mashi a muntu muakane eu bualu, mbualu buenu.

²⁵ Bantu bonso bakandamuna ne, Mashi andi ikale hamʼbidi hetu ne ha bana betu.

²⁶ Hashishe, yeye wakabalekela Balaba; kadi yeye wakakuma Yesu, wakamufila bua kumushihabo ku mutshi mutshiamakane.

Badi babuesha Yesu tshifulu tshia meba ku mutu, badi baya nʼandi bua hanashiha

²⁷ Hashishe, masalayi a ngovena akaya ne Yesu mu nsubu munene wa ngovena, akadisangisha tshisumbu tshiau tshionso kuakadi Yesu.

²⁸ Akamuvula bilulu, akamuluatshisha tshikowelu tshikunze.

²⁹ Akaluka tshifulu tshia meba tshia bukelenge, akamuasatshi ku mutu, akateka mulangala mu tshianza tshiandi tshia balume; akatua binu hanshi ku mpala kuandi, akamuseka ne, Muoyo, Mukelenge wa Bena Yuda.

³⁰ Akamutuila lute, akangata mulangala, akamukuma nʼau mu mutu wandi.

³¹ Hakashikishau kuseka Yesu, akamuvula tshikowelu tshikunze, akamuluatshisha bilulu biandi, akaya nʼandi bua kumushiha ku mutshi mutshiamakane.

³² Hakaluhukau akasangana Muena Kule ne, dina diandi Simona, akamuenzesha ku bukole bua kutualeye mutshi mutshiamakane wa Yesu.

Badi bashiha Yesu ka mutshi mutshiamakane

³³ Hakaluabo ku muaba, dina diau Gologota, kukudimuna kua muaku ne, Muaba wa Kabalubalu ka Mutu,

³⁴ bakamuha nvinyo musangisha ne bintu bia bululu ne, Unue; hakamulabuleye, wakahidia mua kunua.

³⁵ Hakamukuminabo milonda mu bianza ne ku makasa ku mutshi mutshiamakane, bakabanyangana bilulu biandi, bela nʼabi nshobo;

³⁶ bakashikama, bakamulamaku.

³⁷ Bakateka ha mutu handi bubandi buakamabandabo bufunda ne: Eu udi Yesu mukelenge wa Bena Yuda.

³⁸ Hashishe, bakakumina diakamue nʼandi banyengi babidi milonda mu bianza ne ku makasa ku mitshi mitshiamakane, mukuabo ku tshianza tshiandi tshia balume, munga ku tshianza tshiandi tshia bakashi.

³⁹ Bahitshi ba mu nshila bakamuhenda, bakakuha mitu yabo,

⁴⁰ bakamba ne, Wewe muhudi wa ntempelo ne mumuibaki wa matuku asatu udisungile: biwikala Muana wa Nzambi, utuluke ku mutshi mutshiamakane.

⁴¹ Bakuidi banene ba Nzambi ne bafundi ne bakulu bakamuseka nunku, bakamba ne,

⁴² Yeye wakadi usungila bakuabo, kena mumanye mua kudisungila. Yeye udi Mukelenge wa Isalele; atuluke biandi ku mutshi mutshiamakane, netumuitabushe.

⁴³ Yeye udi weyemena Nzambi; Nzambi amusungile, bikaleye mumusue; hualu bua yeye wakamba ne, Ndi Muana wa Nzambi.

⁴⁴ Ne banyengi kabidi bakadi nʼandi ha mitshi mitshiamakane bakamuhenda nunku.

Lufu tua Yesu Kilisto

⁴⁵ Mîdima yakadi ha buloba buonso munda munya tô ne diba ha isatu.

⁴⁶ Hakafika diba ha isatu, Yesu wakela dî diandi bikole ne, Eloi, Eloi, lama sabakatani? Kukudimuna kua muaku ne, Nzambi wanyi, Nzambi wanyi, wakundekela tshinyi?

⁴⁷ Bakuabo bakadi bimaneku, hakunvuabo dî edi, bakamba ne, Muntu eu udi Ubikila Eliya.

⁴⁸ Mukuabo wakaya lukasa, wakangata musukulampampa, wakaûisha tente ne nvinyo wakadi ne buanji, wakaubuesha ku mulangala, wakaha Yesu ne, Nua.

⁴⁹ Bakuabo bakamba ne, Lekela, tumone Eliya ne walua bua kumusungila.

⁵⁰ Yesu wakela dî diandi bikole kabidi, wakahuola muoyo wandi.

⁵¹ Monai, tshilulu tshiakadi tshikudika mu ntempelo tshiakahandika bihesa bibidi ku mutu kuatshi tô ne kunshi, buloba buakakanka; mabue akahandika;

⁵² nkita yakabuluka; mibidi ya bungi ya bantu ba tshijila bakadi balale tulu mu lufu yakabishibua;

⁵³ hakabika Yesu bakaluhuka mu nkita, bakabuela mu musoko wa tshijila, bakamueneka kudi ba bungi.

⁵⁴ Kapitene ka masalayi lukama ne bakadi nʼandi balama Yesu, hakamonabo buloba bukanka ne malu makuabo akenjibua, bakatamba kutshina, bakamba ne, Bulelela, eu wakadi Muana wa Nzambi.

⁵⁵ Bakashi ba bungi bakadiku, bakadi batangidile ha bule, bobo bakadi Bena Galela, bakalua balonda Yesu bua kumukuatshisha;

⁵⁶ munkatshi mua bakashi aba muakadi Maha wa ku Magadala, ne Malia mamu wa Yakobo ne Yose, ne mamu wa bana ba Zebedayo.

Badi bajika Yesu

⁵⁷ Hakamba diba kuhueka, muntu mubanshi wa ku Alimataya, dina diandi Yosefe, wakalua, yeye kabidi wakadi muyidi wa Yesu.

⁵⁸ Muntu eu wakaya kudi Pilato, wakalomba tshitalu tshia Yesu. Pilato wakamba dî diandi ne, Bamuhetshi.

⁵⁹ Yosefe wakangata tshitalu, wakatshinyengela ne tshilulu tshitoke tshia line,

⁶⁰ wakatshiladika mu lukita luandi luhia-luhia, luakadiye mumane kumbula mu dibue; wakabungulusha dibue dinene, wakaditeka ku mushiku wa mbelu wa lukita, wakaya biandi.

⁶¹ Malia wa ku Magadala wakadiku, ne Malia mukuabo, bakadi bashikame batangile buludiludi bua lukita.

⁶² Hakatshiabu, dituku dia ku mpala kua Dilongolola, bakuidi banene ba Nzambi ne Bafalese bakadisangisha kudi Pilato,

⁶³ bakamba ne, Mukelenge, tudi bavuluke di dia muena mashimi au hakadiye ne muoyo ne, Hahita matuku asatu, nembike kabidi.

⁶⁴ Wewe amba di diebe ne, Balame lukita bimpe tô ne ku dituku disatu, nunku bayidi bandi kabalu kumuiba, bambila bantu ne, Yeye wakubika ku lufu; bienzabo nunku, dihanga dia ku mpala neditambe dia ku nyima bunene.

⁶⁵ Pilato wakabambila ne, Nuenu nudi ne balami, yai bienu, milulame ne lungenyi luonso lunudi nʼalu.

⁶⁶ Bakaya biabo, bakalama lukita bimpe, bakateka tshimanyishilu ku dibue, balami bakadi nʼabo.