Matayi 26 - Mukanda wa Nzambi Dihungila Dikulukulu ne Dihungila Dihia-dihia 2003

Badi ne Yesu lukuna badi bamuelela tshifufu bua kumushiha

¹ Hakashikisha Yesu kuamba mei â onso, wakambila bayidi bandi ne,

² Nudi bamanye ne, Hahita matuku abidi, Kuhita kua Yehowa nekulue, nebafile Muana wa muntu bua kumushihabo ku mutshi mutshiamakane.

³ Dituku adi bakuidi banene ba Nzambi ne bakulu ba bantu bakadisangisha mu nsubu wa muakuidi munene, dina diandi Kayafa;

⁴ bakasangisha dî diabo bua kukuata Yesu mu busokoko, ne bua kumushiha.

⁵ Kadi bakamba ne, Kabenji nunku mu matuku a disanka dia kuhita kua Yehowa, bua diyoyo kadijuki munkatshi mua bantu.

Malia wa ku Betania udi wela Yesu mananashi ha mutu

⁶ Hakadi Yesu mu Betania, mu nsubu wa Simona muena nsudi,

⁷ mukashi wakalua kudiye ne mulondo wa alabasta, mu mulondo muakadi mananashi a mushinga mutambe bukole, wakamuelau ha mutu handi, hakadiye mushikame udia bidia.

⁸ Hakamona bayidi bualu ebu, bakadi ne tshishi, bakamba ne, Bakunyangila mananashi nunku bua tshinyi?

⁹ Bakadi kunjiana ku bintu bia bungi bia kuha bantu bahele.

¹⁰ Hakamanya Yesu dî edi diakambabo, yeye wakabambila ne, Nudi nutatshishila mukashi tshinyi? Yeye wakungenzela bimpe.

¹¹ Nudi ne bahele matuku onso munkatshi muenu, kadi kanuena nʼanyi meme matuku onso.

¹² Yeye wakungela mananashi â hamʼbidi hanyi, Wakenza nunku bua kundongolola ha kunjikabo.

¹³ Bulelela, ndi nuambila ne, Mu miaba yonso ya ha buloba buonso yambabo lumu elu luimpe, nebambe kabidi bualu buakuenza mukashi eu, buikale tshivulukidi tshiandi.

Yudasa Isakaliote udi utungila Yesu tshitungu

¹⁴ Mukuabo wa bayidi dikumi ne babidi, dina diandi Yudasa Isakaliote, wakaya kudi bakuidi banene ba Nzambi,

¹⁵ wakamba ne, Nenumpe tshinyi, nmufile mu bianza bienu? Bakidikisha bujitu bua bituha bia mpalata makumi asatu, bakamuhabi.

¹⁶ Ku dituku adi yeye wakakebakeba mua kumufila mu bianza biabo.

Badi balongoluela Yesu ha kudileye bidia bia Kuhita kua Yehowa ne bayidi bandi

¹⁷ Hakalua dituku dia kumudilu dia disanka dia bidia bidi kabi biela luevene, bayidi bakahia kudi Yesu, bakamukonka ne, Udi musue tulongolole ha wewe kudila Kuhita kua Yehowa kudi kunyi?

¹⁸ Yeye wakamba ne, Yai mu tshimenga kudi mulume unuasangila nʼandi, numuambile ne, Muyishi udi wamba ne, Dituku dianyi diakulua, nendile bidia bia Kuhita kua Yehowa mu nsubu muebe ne bayidi banyi.

¹⁹ Bayidi bakenza bu muakabambila Yesu; bakalongolola Kuhita kua Yehowa.

Tshishikidilu tshia Kuhita kua Yehowa

²⁰ Hakabuela diba, Yesu wakadi mushikame udia bidia ne bayidi bandi dikumi ne babidi;

²¹ hakadibo badia, yeye wakamba ne, Bulelela, ndi nuambila ne, Muanʼenu mukuabo neantungile tshitungu!

²² Mitshima yabo yakatamba kunyingalala, bakabanga kumukonka ku muntu ku muntu ne, Mukelenge, mmeme, anyi?

²³ Yeye wakandamuna ne, Wakutua nʼanyi bidia mu dilonga dimue neantungile tshitungu.

²⁴ Muana wa muntu udi uya bu muakamufundabo; kadi mulau neulue kudi udi utungila Muana wa muntu tshitungu; biakadi bimpe bu muntu eu kai muledibue.

²⁵ Yudasa, mumutungidi, wakamukonka ne, Labi, mmeme, anyi? Yesu wakamuambila ne, Nguewe wakuamba.

Yesu udi utangidila bualu bua kudia bidia ne maluvu, bimanyinu bia mubidi wandi ne mashi andi

²⁶ Hakadibo badia, Yesu wakamema bidia, wakatendelela Nzambi, wakabitshibula, wakaha bayidi bandi, wakamba ne, Angatai, diai bienu; ebi bidi mubidi wanyi.

²⁷ Wakamena luhanza, wakasakidila Nzambi, wakabaha ne, Nuai buonso buenu;

²⁸ bualu bua elu ludi mashi anyi a dihungila, akamatshila bantu ba bungi bualu bua kubajimishila mibi yabo.

²⁹ Ndi nuambila ne, Tshiena nua maluvu kabidi tô ne halua dituku dinanua nʼenu maluvu mahia-mahia mu bukelenge bua Tatu wanyi.

Yesu udi wambila Petelo ne bayidi bakuabo bu muamuhidiabo

³⁰ Hakimbabo musambu, bakaluhuka, bakaya ku mukuna wa Oleve.

³¹ Yesu wakabambila ne, Buonso buenu nenulenduke bua bualu buanyi butuku ebu: bua bakafunda ne, Nenshihe mulami wa mikoko, tshisumbu tshiai netshitangadike.

³² Kadi hanabika, nenye ku mpala kuenu mu Galela.

³³ Petelo wakamuandamuna ne, Bialenduka bakuabo bonso, meme tshiena ndenduka tshiendelele,

³⁴ Yesu wakamuambila ne, Bulelela, ndi nkuambila ne, Butuku ebu mene, tshitala katshi tshianze kusama, wewe neumpidie misangu isatu.

³⁵ Petelo wakamuambila ne, Bikala bualu bunkuata bua kufua nʼebe, tshiena nkuhidia. Bayidi bonso bakamba muomumue.

Yesu udi unyingalala mu Getesemane

³⁶ Hashishe, Yesu wakalua nʼabo mu muaba wakadibo babikila ne, Getesemane, yeye wakambila bayidi bandi ne, Shikamai aha, meme nenye eku bua kutendelela Nzambi.

³⁷ Wakaya biandi ne Petelo ne bana babidi ba Zebedayo, wakabanga kunyingalala mutshima, mutshima wandi wakatamba kunema.

³⁸ Yeye wakabambila ne, Mutshima wanyi udi utamba kunyingalala, lufu nduntonda; nushale aha, nuikale nʼanyi tshitabala.

³⁹ Wakaya biandi ku mpala tshituha, wakatua mpala hanshi, wakatendelela Nzambi, wakamba ne, Tatu wanyi, biwamanya mua kuenza nunku, luhanza elu lûmuke kundi; kadi bualu buenjibua bu mûdi musue, kabuenjibu bu mundi musue,

⁴⁰ Wakalua kudi bayidi, wakabasangana balale tulu, wakambila Petelo ne, Nuenu kanuakumanya mua kuikala nʼanyi tshitabala tshituha tshimue tshia diba bualu kai?

⁴¹ Nudimuke, nutendelela Nzambi; nunku kanuhonyi mu mateyi; mutshima udi musue nunku, kadi mubidi udi mutekete.

⁴² Wakaya tshiakabidi, wakatendelela Nzambi, wakamba ne, Tatu wanyi, bikala luhanza elu kalui lumanya mua kumuka kundi, bikala bualu bunkuata bua kulunua, bualu buenjibue bu mûdi musue.

⁴³ Yeye wakalua kabidi, wakabasangana balale tulu, bualu bua mesu abo akadi maneme ne tulu.

⁴⁴ Yeye wakabashîa kabidi, wakaya, wakatendelela Nzambi tshiakasatu, wakadi wamba mei momumue.

⁴⁵ Hashishe, yeye wakalua kudi bayidi, wakabambila ne, Nudi nulala nuikisha! Diba diakufika, Muana wa muntu udi mufila mu bianza bia bantu babi.

⁴⁶ Bikai, tuye; tangilai, muntungidi udiku.

Badi bakuata Yesu

⁴⁷ Hakatshidiye wamba nunku, Yudasa, mukuabo wa mu ba dikumi ne babidi, wakalua ne tshisumbu tshinene tshia bantu, bakadi ne miele ne bibonge, bafume kudi bakuidi banene ne bakulu ba bantu.

⁴⁸ Mutungidi wa Yesu wakabaha tshimanyinu ne, Unatuangana nʼandi mishiku, nyeye; numukuate.

⁴⁹ Yeye wakalua lukasa kudi Yesu, wakamuambila ne, Labi, muoyo; wakatuangana nʼandi mishiku.

⁵⁰ Yesu wakamuambila ne, Mulunda wanyi, enza bualu buwakuluila. Hashishe, bakahia, bakalenga Yesu bianza, bakamukuata.

⁵¹ Mukuabo wa bakadi ne Yesu wakolola tshianza, wakatula muele, wakataha muntu wa muakuidi munene, wakamukosa ditshu.

⁵² Yesu wakamuambila ne, Hingasha muele webe mu muaba wau; bualu bua bonso badi bangata muele nebashihibue ku muele.

⁵³ Udi welangana meshi ne, Meme tshiena mumanye mua kulomba Tatu wanyi, yeye ampe banjelo batambe binunu makumi muanda mutekete ne bibidi, anyi?

⁵⁴ Mei a mu Mukanda wa Nzambi ne, Bualu ebu nebulue, ahu neashike bishi?

⁵⁵ Hashishe, Yesu wakakonka tshisumbu tshia bantu ne, Nuakulua ne miele ne bibonge bua kunkuata bu mudibo bakuata munyengi munyi? Nakadi nshikama ku dituku ne ku dituku mu ntempelo, nyisha bantu, kanuakantuala.

⁵⁶ Kadi malu â onso akulua bua kushikisha mei akafunda baprofete mu Mukanda wandi. Hashishe, bayidi bandi bonso bakamushia, bakanyema.

Badi balua ne Yesu kudi Kayafa ne kudi balumbuludi

⁵⁷ Bakuatshi ba Yesu bakaya nʼandi kua Kayafa, muakuidi wa Nzambi munene, bafundi ne bakulu ba bantu bakadi badisangisheku.

⁵⁸ Kadi Petelo wakamulonda ha bule ha bule tô ne ku luhangu lua muakuidi munene, wakabuelamu, wakashikama hamue ne tuhalai, bua kutangila hashikidila bualu.

⁵⁹ Bakuidi banene ne balumbuludi bonso bakakeba bamonyi ba mashimi, bua kubandabo Yesu bua kumushiha;

⁶⁰ bamonyi ba bungi bakalua, kadi kabakasangana Yesu ne bualu. Kadi ku nyima babidi bakalua,

⁶¹ bakamba ne, Muntu eu wakamba ne, Ndi mumanye mua kubumbula ntempelo wa Nzambi ne mua kumuihata kabidi matuku asatu.

⁶² Muakuidi munene wakimana, wakambila Yesu ne, Wewe kuena wamba dî? Bualu ebu budi munyi budi bamonyi aba bakubanda?

⁶³ Kadi Yesu wakahua. Muakuidi munene wakamuambila ne, Ndi nkutshihisha mu dina dia Nzambi udi ne muoyo, udi biebe Kilisto Muana wa Nzambi, anyi?

⁶⁴ Yesu wakamuambila ne, Muomu; kadi ndi numanyisha ne, Ku dituku adi nenumone Muana wa muntu mushikame ku tshianza tshia balume tshia Bukole, ulua biandi ha matutu a mu diulu.

⁶⁵ Hashishe, muakuidi munene wakadihandila bilulu biandi, wakamba ne, Yeye wakuamba dî dia kuhenda Nzambi; ludi ne bualu bua bamanyi kabidi kudi kunyi? Nuakunvua tshihendu tshiandi;

⁶⁶ nudi nuamba tshinyi? Bakandamuna ne, Mbimpe bamushihe.

⁶⁷ Hashishe, bakamutuila mate mu mesu, bakamukuma bisusu, bakuabo bakamukuma mikumu,

⁶⁸ bakamuebesha ne, Wewe Kilisto, utuambile wakukukuma nganyi?

Petelo udi uhidia Yesu

⁶⁹ Petelo wakadi mushikame ku bula mu luhangu; mukashi muenji wa mudimu wakalua kudiye, wakamuambila ne, Wewe kabidi wakadi ne Yesu, Muena Galela.

⁷⁰ Kadi yeye wakayila ku mesu kua buonso buabo ne, Tshiena mumanye tshiudi wamba.

⁷¹ Hakayeye ku mbelu kua luhangu, mukashi mukuabo muenji wa mudimu wakamumona, wakambila bakadi bashikameku ne, Muntu eu wakadi ne Yesu wa mu Nazaleta.

⁷² Yeye wakayila kabidi, wakaditshiha ne. Tshiena mumanye muntu eu.

⁷³ Hakahita tshituha tshihi, bakadi bimane ha buihi bakalua, bakambila Petelo ne, Bulelela, wewe udi wabo, bualu bua muaku webe udi ukusokolola.

⁷⁴ Yeye wakabanga kudiela milau ne kuditshiha ne, Tshiena mumanye muntu eu. Hakambeye dî edi, tshilala tshiakasama.

⁷⁵ Petelo wakavuluka di diakamba Yesu ne, Tshilala katshi tshianze kusama, wewe neumpidie misangu isatu. Yeye wakaluhuka, wakadila bikole.