Matayi 19 - Mukanda wa Nzambi Dihungila Dikulukulu ne Dihungila Dihia-dihia 2003

Yesu udi uya ma Yudaya kabidi

¹ Hakashikisha Yesu kuamba mei â, wakumuka mu Galela, wakalua mu luseke lua Yudaya ludi dishia dia Yadene;

² bisumbu binene bia bantu biakamulonda, yeye wakabakolesha.

Yetu adi wamba buala bua kashiha kua dibaka

³ Bafalese bakalua kudiye, bakamuteta munda ne, Biumusha muntu mukashi wandi bua malu onso, neashihe mukenshi, anyi?

⁴ Yeye wakandamuna ne, Nuenu kanuakubala ne, Ku tshibangidilu mufuki wakabafuka mulume ne mukashi,

⁵ mufuki wakamba biandi ne, Bua bualu ebu mulume neashîe tatu wandi ne baba wandi, nealamate kudi mukashi wandi; bubidi buabo nebalue mubidi umue?

⁶ Nunku kabena bantu babidi kabidi, badi mubidi umue. Bua bualu ebu muntu kahanduludi tshidi tshibumbakanya kudi Nzambi.

⁷ Bakamukonka kabidi ne, Bualu kai Mose wakamba ne, Bamuhe mukanda wa kushiha dibaka, bamumushe?

⁸ Yeye wakabambila ne, Bualu bua bukole bua mitshima yenu Mose wakitabusha bua nuenu numushe bakashi benu; kadi ku tshibangidilu kakuakadi nunku.

⁹ Ndi nuambila kabidi ne, Wumusha mukashi wandi kabui bua masandi, habakeye mukashi mukuabo, yeye udi wenda masandi; biabaka mulume mukashi mumusha nunku, yeye udi wenda masandi.

¹⁰ Bayidi bandi bakamuambila ne, Bikala bualu bua mulume ne mukashi wandi nunku, kubaka mukashi kakuena kuimpe.

¹¹ Kadi yeye wakabambila ne, Bantu bonso kabena bamanye mua kuitabusha dî adi, anu bantu badi bahebue bukole bua kuditabusha.

¹² Batungu bakuabo badiku, bamamuʼabo bakabalela nunku; batungula bakuabo badiku, bantu bakabatungula; batungula bakuabo badiku, bakaditungula bualu bua bukelenge bua mu diulu. Udi mumanye mua kuitabusha dî adi aditabushe.

Yesu udi usankisha bana bakese

¹³ Bakalua ne bana bakese kudiye bua yeye kubalenga tshianza tshiandi ne bua kubalombeleye Nzambi; kadi bayidi bakabasamina.

¹⁴ Yesu wakamba ne, Nuitabushe bua bana bakese kulua kundi, kanubakandi; bualu bua bukelenge bua mu diulu mbua badi bu bana.

¹⁵ Yeye wakabalenga bianza; wakumukaku.

Nsongalume mubanshi udi ukeba muoyo wa tshiendelele

¹⁶ Muntu wakalua kudiye, wakamba ne, Muyishi, nengenze bualu buimpe kai, mpete muoyo wa tshiendelele?

¹⁷ Yesu wakamuambila ne, Udi unkonkela bua bualu buimpe tshinyi? Umue udiku udi muimpe; kadi biwasua kubuela mu muoyo, enza mikenshi ya Nzambi.

¹⁸ Yeye wakakonka Yesu ne, Mikenshi kai? Yesu wakamba ne, Kushihi muntu, kuendi masandi, kuibi, kudingidi muntu,

¹⁹ unemeke tatuʼebe ne mamuʼebe, Sua mukuenu bu mûdi mudisue.

²⁰ Nsongalume wakamuambila ne, Nakenzenza malu â onso; bualu kai budi hunshala?

²¹ Yesu wakamuambila ne, Biwasua kuikala muimpe, ya biebe, uhane biudi nʼabi, ubihe bantu bahele, newikale ne bintu mu tshibutshilu tshia mu diulu, ulue kundonda.

²² Kadi hakunvua nsongalume dî edi, wakaya biandi mubungame, bualu bua yeye wakadi ne bintu bia bungi.

²³ Yesu wakambila bayidi bandi ne, Bulelela, ndi nuambila ne, Ha kubuela kua muntu mubanshi mu bukelenge bua mu diulu mbualu bukole.

²⁴ Ndi nuambila kabidi ne, Kubuela kua kamelu mu disu dia kashingi kudi kutamba kubuela kua muntu mubanshi mu bukelenge bua Nzambi butekete.

²⁵ Hakunvua bayidi dî edi, bakatamba kukema, bakamukonka ne, Ahu udi mumanye mua kusungidibua nganyi?

²⁶ Yesu wakabajosha talalâ, wakabambila ne, Bantu kabena bamanye mua kuenza bualu ebu, kadi Nzambi udi mumanye mua kuenza malu onso.

²⁷ Petelo wakamuandamuna ne, Ahu tuetu, tuakushia malu etu onso, tuakukulonda, tuetu netuhete tshinyi?

²⁸ Yesu wakabambila ne, Bulelela, ndi nuambila ne, Mu dituku dialedibua bintu bionso tshiakabidi, hashikama Muana wa muntu mu nkuasa wa butumbi buandi, nuenu kabidi bakundonda, nenushikame mu nkuasa dikumi ne ibidi, nulumbuluisha bisamba dikumi ne bibidi bia Isalele.

²⁹ Muntu yonso wakushia nsubu yandi, anyi bana babo balume anyi bana babo bakashi, anyi tatuʼandi, anyi baba wandi, anyi bana bandi, anyi madimi andi, bualu bua dina dianyi yeye neahete masanka misangu lukama matambe a diambedi, neahiane muoyo wa tshiendelele kabidi.

³⁰ Kadi ba bungi badi ku mpala katataka nebikale ku nyima, badi ku nyima katataka nebikale ku mpala.