Matayi 18 - Mukanda wa Nzambi Dihungila Dikulukulu ne Dihungila Dihia-dihia 2003

Yesu udi wambila bayidi bandi buala bua kanemu

¹ Ha diba adi bayidi bakalua kudi Yesu, bakamuebesha ne, Mu bukelenge bua mu diulu udi mutambe bakuabo nganyi?

² Yeye wakabikila muana mukese, wakamuteka munkatshi muabo,

³ wakamba ne, Bulelela, ndi nuambila ne, Binuikala kanui nukudimuna mitshima yenu, binuikala kanui nulua bu bana bakese, kanuena nubuela mu bukelenge bua mu diulu bulelela.

⁴ Wadihuekesha bu muana eu mukese, yeye udi mutambe bakuabo mu bukelenge bua mu diulu.

⁵ Witabusha muana mukese nunku mu dina dianyi udi ungitabusha meme;

⁶ kadi bialenduisha muntu umue wabo wa mu bantu aba bahuekele badi bangitabusha, biakadi bimpe kumusuika dibue dinene dia kuhela nʼadi mu nshingu muandi, kumuina mu bunene bua mai manene.

⁷ Dikenga dilualua kudi bantu bualu bua malu adi abalenduisha. Bushua, malu adi alenduisha bantu adi alua, kadi mulau neulue kudi mulenduishi.

⁸ Biakulenduisha tshianza tshiebe, anyi dikasa diebe, watshikosa, watshimasha; bua wewe kubuela mu muoyo ne tshilema ne kuzobela kudi kutamba bua wewe kuimashibua mu kahia ka tshiendelele ne bianza bibidi ne makasa abidi.

⁹ Biakulenduisha disu diebe, waditula, wadimasha; bua wewe kubuela mu muoyo ne disu dimue kudi kutamba bua wewe kuimashibua mu Ngena wa kahia ne mesu abidi.

¹⁰ Nudimuke, kanulenguludi muana umue wa mu bana aba bakese; ndi nuambila ne, Mu diulu matuku onso banjelo babo batu batangila Tatu wanyi udi mu diulu ku mesu.

¹² Nudi nuelangana meshi a tshinyi? Bikala muntu ne lukama lua mikoko, hajimina mukuabo, yeye kena ushîa minga makumi tshitema ne tshitema, kena uya mu mikuna bua kukebeye udi muhambuke, anyi?

¹³ Biaumoneye, bulelela, ndi nuambila ne, Disanka diandi kudi wakadi muhambuke neditambe disanka diandi kudi makumi tshitema ne tshitema yakadi kayi mihambuke.

¹⁴ Nunku Tatu wenu wa mu diulu kena musue muana umue wa mu bana aba bakese afue.

Yesu udi wambila bayidi bandi lungenyi lua bantu bandi benze, babenzela bakuabo bibi

¹⁵ Bakuenzela muanʼenu bibi, uye biebe, umuleshe bubi buandi, wewe ne yeye nkayenu; bitabusheye dî diebe, wewe wakamuvuisha muanʼenu kabidi.

¹⁶ Biahidieye kunvua dî diebe, uye ne muntu umue anyi bantu babidi, nunku mei onso neajalame kudi bamonyi babidi anyi basatu.

¹⁷ Biahidieye kunvua mei abo, ambila bena ekelesia bualu ebu; biahidieye kunyua mei a bena ekelesia, ikale biandi ku mesu kuebe bu muntu wa bende anyi musangishi wa mulambu.

¹⁸ Bulelela, ndi nuambila ne, Mu diulu nebasuike tshinuasuika ha buloba, mu diulu nebasuike tshinuasulula ha buloba,

¹⁹ Bualu bukuabo, ndi nuambila ne, Bikala babidi benu basangisha dî diabo bua tshintu tshionso tshialombabo Tatu wanyi wa mu diulu neabenzele mualombabo.

²⁰ Ndi bianyi munkatshi mua bantu babidi anyi basatu badi badisangisha mu dina dianyi.

Yese udi umanyisha bayidi bandi bualu bua kujimishila bantu bakuabo mibi yabo

²¹ Hashishe, Petelo wakalua, wakakonka Yesu ne, Mukelenge, muanʼetu neangenzele bibi misangu bungi munyi inamulekela bubi buandi? Misangu muanda mutekete, anyi?

²² Yesu wakamuambila ne, Tshiena nkuambila ne, Tô ne ku misangu muanda mutekete, ndi nkuambila ne, Tô ne ku makumi muanda mutekete misangu muanda mutekete.

²³ Ke mudi bukelenge bua mu diulu bufuana mukelenge mukuabo wakasua kubadika bintu biandi biakadi mu bianza bia bahika bandi.

²⁴ Hakabangeye kubala bintu, bakalua ne mukuabo wakadi ne dibanza dia lubombo lua ntalanta.

²⁵ Kadi bualu bua yeye kakadi ne bia kumana nʼabi dibanza, mukelenge wandi wakamba ne, Bamuhane ne mukashi wandi ne bana bandi ne bintu biandi bionso, bua kumana dibanza.

²⁶ Bua bualu ebu muhika wakadishinda mukudimane, wakamukukuila ne, Mukelenge, kungenzedi bualu lukasa, nenkufute dibanza dionso.

²⁷ Mukelenge wandi wakadi ne luse, wakamulekela, wakamulekelela dibanza.

²⁸ Kadi muhika au wakaluhuka mu nsubu, wakasangana muhika nʼandi wakadi nʼandi dibanza dia lukama lua ndenalio; wakamukuata, wakamufiekela mu nshingu ne, Futa dibanza dianyi katataka.

²⁹ Muhika nʼandi wakadishinda mukudimane, wakamusengelela ne, Kungenzedi bualu lukasa, nenkufute.

³⁰ Kadi yeye wakahidia, wakaya, wakamuela mu nsubu wa lukanu ne, Ashalemu tô ne hafuteye dibanza.

³¹ Hakamona banga bahika nʼandi bualu buakenzeye, mitshima yabo yakanyingalala bikole, bakalua, bakamanyisha mukelenge wabo malu onso akenjibua.

³² Hashishe, mukelenge wandi wakamubikila ne, Wewe udi muhika mubi, nakukulekela dibanza adi dionso, bualu bua wewe wakuntendekena;

³³ munyi wewe kabidi kufu muhika nʼebe luse bu munakukufua wewe luse?

³⁴ Mukelenge wandi wakadi ne tshishi; wakamufila mu bianza bia bakengeshi ne, Ashalemu tô ne hafuteye dibanza dionso.

³⁵ Tatu wanyi wa mu diulu neanuenzele muomumue kabidi, binuikala kanui nulekelela mukuenu yonso mibi yandi mu mitshima yenu.