Matayi 15 - Mukanda wa Nzambi Dihungila Dikulukulu ne Dihungila Dihia-dihia 2003

Yesu udi uhela Bafalese ne bafundi

¹ Bafalese ne bafundi ba ku Yelushalema bakalua kudi Yesu, bakamuebesha ne,

² Bayidi bebe badi babengela kutumikila bilele bia bankambua betu tshinyi? Ha kudia kabena bowa bianza.

³ Yeye wakabandamuna ne, Nuenu kabidi nudi nubengela kutumikila mukenshi wa Nzambi bualu bua bilele bienu tshinyi?

⁴ Nzambi wakamba ne, Unemeke tatuʼebe ne mamuʼebe; yeye wakamba kabidi ne, Udi wamba mei mabi bua tatuʼandi anyi mamuʼandi afue biandi bulelela.

⁵ Kadi nuenu nudi nuamba ne, Muntu yonso udi wambila tatuʼandi anyi mamuʼandi ne, Tshintu tshiwakadi kuangata tshidi tshiha Nzambi,

⁶ kena unemeka tatuʼandi. Nuenu nuakuona dî dia Nzambi bualu bua bilele bienu,

⁷ Nuenu bena lubombo, bulelela, Yeshaya wakamba bualu buenu ne,

⁸ Bantu aba badi bannemeka ne mishiku yabo, Kadi mitshima yabo kayena kundi, idi kule.

⁹ Badi bantendelela tshianana, Badi bayisha bantu diyisha dia mikenshi ya bantu.

¹⁰ Yeye wakabikila tshisumbu tshia bantu kudiye, wakabambila ne, Unvuai, mimanye bimpe.

¹¹ Tshintu tshidi tshibuela mukana mua muntu katshiena tshimubihisha, tshidi tshiluhuka mukana muandi ntshidi tshimubihisha.

¹² Hashishe, bayidi bandi bakalua kudiye, bakamuebesha ne, Kuena mumanye biebe ne, Bafalese bakulenduka, hakunvuabo dî edi, anyi?

¹³ Kadi yeye wakandamuna ne, Nebajule mutshi wonso udi kawi mutentula kudi Tatu wanyi udi mu diulu.

¹⁴ Nubalekele, badi balombodi bafofo, Bialombola mufofo munga mufofo, bubidi buabo nebahone mu dina.

¹⁵ Petelo wakamuandamuna ne, Utujingulula lusumuinu elu.

¹⁶ Yesu wakabakonka ne, Nuenu kanuena bajingulule tô ne katataka, anyi?

¹⁷ Kanuena bamanye ne, Tshidi tshibuela mukana tshiyaya munda, nebatshiuhe, anyi?

¹⁸ Kadi bintu bidi bihatuka mukana biakufuma mu mutshima, mbiobi bidi bibihisha muntu.

¹⁹ Bualu bua meshi mabi ne kushiha kua bantu ne masandi ne tshiendenda ne buibi ne mashimi ne kuhenda Nzambi bidi biluhuka mu mutshima;

²⁰ malu â adi abihisha muntu; kudi kudia bidia ne bianza bidi kabi biowa kakuena kubihisha muntu.

Yesu udi ukolesha muana mukashi wa Muena Suliafoinike

²¹ Yesu wakumukaku, wakaya mu nseke ya Tulo ne Sidona.

²² Monai, mukashi Muena Kanâna wakaluhuka mu luseke elu, wakela dî bikole ne, Mukelenge, muana wa Davidi, unfue luse, muana wanyi wa bakashi udi ukenga bikole bualu bua demon udi munda.

²³ Kadi Yesu kakamukudimuna dî. Bayidi bandi bakalua kudiye, bakamutendekena ne, Umuhingashe, bualu bua yeye udi utulonda wela dî diandi bikole.

²⁴ Yeye wakandamuna ne, Nakutumibua anu kudi mikoko mijimine ya nsubu wa Isalele.

²⁵ Kadi mukashi wakalua, wakamukukuila ne, Mukelenge unkuatshishe,

²⁶ Yeye wakandamuna ne, Kambimpe bia kuangata bidia bia bana kubielela mbua.

²⁷ Mukashi wakamba ne, Bulelela, Mukelenge, kadi mbua itu yadia nkototo idi imata munshi mua mesa a banfumu bai.

²⁸ Yesu wakamuandamuna ne, Wewe mukashi, ditabusha diebe didi dinene; nebakuenzele bualu bûdi musue. Ne muanʼandi wa bakashi wakakoleshibua ha diba adi mene.

Yesu udi ukolesha bantu ba bungi

²⁹ Yesu wakumukaku, wakalua hehi ne dishiba dia Galela, wakabanda ku mukuna, wakashikama.

³⁰ Bisumbu binene bia bantu biakalua kudiye, bakadi ne balema babo ne bafofo ne tumama ne batshibuke ne bakuabo ba bungi, bakabateka ku makasa andi, yeye wakabakolesha;

³¹ nunku bantu bakakema, hakamonabo tumama tuakula, ne batshibuke balulama, balema benda, ne bafofo batabala, bakatumbisha Nzambi wa Isalele.

Yesu udi idisha bantu binunu binai

³² Yesu wakabikila bayidi bandi, wakabambila ne, Ndi ne bantu luse, bualu bua bobo bakusomba nʼanyi matuku asatu, kabena ne tshia kudia; tshiena musue kubatuma ne nsala, kabayi kuhanga mu nshila.

³³ Bayidi bandi bakamukonka ne, Mu muaba eu wa tshihela netuhete mitanda ya bidia ya bungi ya kûkutshisha bantu bungi nunku kudi kunyi?

³⁴ Yesu wakabakonka ne, Nudi ne mitanda bungi munyi? Bakamba ne, Idi muanda mutekete, ne tushiha tukese.

³⁵ Yeye wakambila bantu ne, Shikamai hanshi;

³⁶ wakamema mitanda muanda mutekete ne mishiha; wakatendelela Nzambi, wakabitshibula, wakabifila mu bianza bia bayidi, bayidi bakaha bantu.

³⁷ Buonso buabo bakadia, bakûkuta; bakangula bihesa bia bidia biakashala bisaka muanda mutekete biule tente.

³⁸ Bantu bonso bakadia bakadi balume binunu binai, ne bakashi ne bana.

³⁹ Wakatuma bantu kuabo; wakabuela mu buatu, wakalua mu nseke ya Magadana.