Matayi 12 - Mukanda wa Nzambi Dihungila Dikulukulu ne Dihungila Dihia-dihia 2003

Yesu udi Mukelenge wa dituku dia Lumingu

¹ Mu matuku au Yesu wakadi uhitshila mu madimi a blé, dituku dia Lumingu lua Bayuda; bayidi bandi bakadi ne nsala, bakabanga kutshibula miehu yai, bakadia.

² Kadi Bafalese, hakatangilabo bualu ebu, bakamuambila ne, Tangila, bayidi bebe batshidi benza bualu budi bujila dituku dia Lumingu.

³ Kadi yeye wakabambila ne, Kanuakubala bualu buakenza Davidi, hakadiye ne nsala, ne bakuabo bakadi nʼandi, anyi?

⁴ Bualu bua yeye wakabuela mu nsubu wa mbi, wakadia bidia bilesha biakadi tshijila kudiye ne kudi bakuabo bakadi nʼandi, anu bakuidi ba Nzambi bakadi babidia.

⁵ Kanuakubala kabidi mu luseke lua mikenshi ya Mose, anyi, ne bakuidi ba Nzambi badi bashiha tshijila tshia dituku dia Lumingu mu ntempelo, kaba! ne dihila?

⁶ Kadi meme ndi nuambila ne, Udi mutambe ntempelo udi aha.

⁷ Bu nuenu bamanye dî edi ne, Ndi musue luse, tshiena nsua nyama minshihela, kanuakadi kuhisha badi kaba! ne dihila.

⁸ Bualu bua Muana wa muntu udi mukelenge wa dituku dia Lumingu.

Dituka dia Lumingu Yesu udi ukolesha tshianza tshia muntu tshiakadi tshiume

⁹ Yeye wakumukaku, wakabuela mu nsunagoga wabo;

¹⁰ monai, muntu wakadi ne tshianza tshiume. Bakakonka Yesu ne, Kuondaha bantu dituku dia Lumingu kudi kushiha mukenshi, anyi? Bakasua kumubanda.

¹¹ Yeye wakabambila ne, Muntu kai wa munkatshi muenu, udi ne mukoko umue, biahonau mu dina dituku dia Lumingu, kena ûkuata bua kûhatula?

¹² Mushinga wa muntu udi mutambe wa mukoko misangu bungi munyi? Nunku kuenza kua bualu buimpe dituku dia Lumingu kakuena kushiha mukenshi.

¹³ Hashishe, yeye wakambila muntu ne, Olola tshianza tshiebe. Yeye wakatshiolola; tshiakadi tshiakane kabidi bu tshinga tshianza.

¹⁴ Kadi Bafalese bakumuka, bakamuelela tshifufu bua kumushiha.

Yesu udi wambila bantu bualu buakufundabo kale

¹⁵ Hakamanya Yesu bualu ebu, wakumukaku; bantu ba bungi bakamulonda; yeye wakabakolesha bonso,

¹⁶ wakabambila bikole ne, Kanunmanyishi kudi bantu;

¹⁷ bua dî diakambabo kudi muprofete Yeshaya dishikishibue ne,

¹⁸ Tangila, muntu wanyi unakusungula; Wanyi munanga udi usankisha mutshima wanyi; Nenteke Nyuma wanyi hamʼbidi handi; Yeye neambile bisamba bia bende malu mimpe.

¹⁹ Yeye kena utanda, kena wela mbila, Muntu kena unvua dî diandi mu misesu.

²⁰ Yeye kena utshibula disele didi diamba kukoseka, Kena ujima kalulu ka muinda kadi kafuima muinshi Tô ne hatumeye malu andi mimpe bua kuhita malu mabi.

²¹ Bisamba bia bende nebitekemene dina diandi.

Yesu udi umusha demon munda mua muntu

²² Bakalua kudi Yesu ne muntu mukuatshike ne demon, wakadi mufofo ne kamama kabidi; yeye wakamuondaha, nunku kamama kakadia, kakatabala.

²³ Bisumbu bionso biakakema, biakamba ne, Eu ke muana wa Davidi, anyi?

²⁴ Kadi hakunvua Bafalese dî edi, bakamba ne, Muntu eu kena udiumushila bademon, anu mu dina dia Belezebula, mukelenge wa bademon.

²⁵ Yeye wakamanya meshi abo, wakabambila ne, Bukelenge buonso budi buhanduluke nebufue; musoko wonso ne nsubu yonso udi uhanduluka kabiena bijalama.

²⁶ Bikala Satana umusha Satana, yeye udi muhanduluke; bukelenge buandi budi bumanye mua kujalama munyi?

²⁷ Bingikala ngumusha bademon mu dina dia Belezebula, bana benu badi babumusha mu dina dia nganyi? Nunku bobo nebikale balumbuludi benu,

²⁸ Kadi bingikala ngumu sha bademon mu dina dia Nyuma wa Nzambi, bukelenge bua Nzambi buakumana kulua kunudi.

²⁹ Muntu kai udi mumanye mua kubuela mu nsubu wa muena bukole bua kuhaula bintu biandi kai muanze kusuika muena bukole? Hashishe, neahaule bia mu nsubu wandi.

³⁰ Udi kai nʼanyi udi umpidia; udi kai usangisha nʼanyi bintu, udi ubitangalasha.

³¹ Ebu budi bualu bundi nuambila ne, Nebajimishile bantu mibi yabo yonso ne bihendu biabo bidibo bahenda nʼabi Nzambi, kadi kabena babajimishila bihendu bidibo bahenda nʼabi Nyuma.

³² Muntu yonso wahetula Muana wa muntu, nebamujimishile bubi buandi; kadi wahetula Nyuma Muimpe kabena bamujimishila bubi buandi nasha mu tshikondo etshi nasha mu tshikondo tshialua.

Mei adi ahatuka mukana adi bualu bukole

³³ Nasha nuamba ne mutshi udi muimpe ne mamuma au adi mimpe, nasha nuamba ne mutshi udi mubi ne mamuma au adi mabi; bua mamuma adi amanyisha mudi mutshi wau.

³⁴ Nuenu bana ba nyoka, nudi babi, nudi bamanye mua kuamba mei mimpe munyi? Bua mukana mudi muamba anu malu adi matambe kuvulangana mu mutshima.

³⁵ Muntu muimpe udi uhatula bintu bimpe mu tshibutshilu tshiandi tshimpe; muntu mubi udi uhatula bintu bibi mu tshibutshilu tshiandi tshibi.

³⁶ Ndi nuambila ne, Halua dituku dia kulumbulula, nebalumbuluishe bantu bua mei onso a tshianana akadibo bamba.

³⁷ Mei ebe neakubingishe, mei ebe kabidi neakuhishe.

Tshimanyinu tshia Yona-Yesu udi wamba bua lufu luandi ne bua dibika diandi

³⁸ Bafundi bakuabo ne Bafalese bakamuandamuna ne, Muyishi, tudi basue kutangila tshimanyinu tshia bualu buebe.

³⁹ Kadi yeye wakabandamuna ne, Ba mu tshikondo tshibi ne tshia masandi, badi bakeba tshimanyinu; kabena babaha tshimanyinu tshikuabo anu tshia muprofete Yona.

⁴⁰ Bu muakadi Yona munda mua munyinyi mimene wa mu mai minya isatu ne mafuku asatu, nunku Muana wa muntu neikale munda mua buloba minya isatu ne mafuku asatu.

⁴¹ Mu dituku dia kulumbulula, Bena Ninewe nebimane ne bantu ba tshikondo etshi, nebabahishe; bua bobo bakakudimuna mitshima yabo, hakuvuabo mei a Yona; monai, udi mutambe Yona udi aha.

⁴² Mu dituku dia kulumbulula mukelenge mukashi wa ku sude neabike ne bantu ba tshikondo etshi, neabahishe; bua yeye wakalua biandi kunfudilu kua buloba bua kunvua lungenyi lua Solomo; monai, udi mutambe Solomo udi aha.

Kudikudimuna kua mutshima kudi tshianana

⁴³ Haluhuka nyuma wa bukoya munda mua muntu, nyuma udi wendakana mu miaba idi kayi mai, ukeba ha kuikisha, kena ubamona.

⁴⁴ Hashishe, yeye udi wamba munda munda ne, Nempingane mu nsubu wanyi unakuluhuka; halueye, udi usangana nsubu hatuhu, mukomba, mulengesha.

⁴⁵ Hashishe, yeye udi uya biandi, udi wangata minga nyuma mibi muanda mutekete idi mimutambe yeye bubi, idi ibuelamuidi ishikama; malu a muntu au a hashishe adi atamba a diambedi bubi. Bualu ebu nunku nebulue kudi bantu ba tshikondo tshibi etshi.

Bantu balualua bahia-bahia mu bualu bua Yesu

⁴⁶ Hakatshidiye wambila bisumbu bia bantu mei andi, mamuʼandi ne bana babo bakadi bimane ha mbelu, bakeba kumuambila dî.

⁴⁷ Muntu wakamuambila ne, Mamuʼebe ne bana benu badi bimane ku mbelu, bakeba kukuambila dî.

⁴⁸ Kadi yeye wakakonka wakumumanyisha ne, Mamu wanyi nganyi? Bana betu mbanganyi?

⁴⁹ Wakoluela bayidi bandi tshianza, wakamba ne, Monai mamu wanyi ne bana betu!

⁵⁰ Muntu yonso wenza bu mudi Tatu wanyi wa mu diulu musue yeye udi muanʼetu mulume ne muanʼetu mukashi ne mamu wanyi.