Matayi 11 - Mukanda wa Nzambi Dihungila Dikulukulu ne Dihungila Dihia-dihia 2003

¹ Hakashikisha Yesu kuyisha bayidi bandi dikumi ne babidi mikenshi yandi, yeye wakumukaku bualu bua kuyisheye bantu mu misoko yabo ne bua kubambileye bualu bua Nzambi.

Yone Mubanji udi utuma bayidi bandi bua kukonkabo Yesu

² Hakunvua Yone mu nsubu wa lukanu lumu lua malu akadi Kilisto wenza, wakutuma bayidi bandi

³ bua kumukonka ne, Wewe nyeye ulualua, anyi tuindile mukuabo?

⁴ Yesu wakabandamuna ne, Yai bienu, nuambile Yone malu anudi nunyua ne anudi numona;

⁵ bafofo badi batabala, balema badi benda, bena nsudi badi balengeshibue, bena mahaha badi bunvua, bafue badi babishibua ku lufu, badi bambila bahele lumu luimpe lua Nzambi,

⁶ Muntu yonso udi kai ulenduka bua bualu buanyi udi ne disanka.

⁷ Hakaya bayidi ba Yone, Yesu wakabanga kuambila bisumbu bia bantu bualu bua Yone ne, Nuakuyila mu tshihela bua kutangila tshintu kai? Bua kutangila disele didibo banyungisha kudi luhehele, anyi?

⁸ Nuakuyila bua kutangila tshintu kai? Bua kutangila muntu muluate bilulu binefuke, anyi? Badi baluata bilulu binefuke batu bikala mu nsubu ya banfumu.

⁹ Kadi nuakuyila tshinyi? Bua kutangila muprofete, anyi? E, ndi nuambila ne, Yeye udi mutambe muprofete.

¹⁰ Eu nyeye wakafundabo ne, Monai, ndi ntuma mukenshi wanyi ku mpala kuebe, Yeye nealongolole nshila webe ku mpala kuebe.

¹¹ Bulelela, ndi nuambila ne, Munkatshi mua bakalelabo kudi bakashi kamuakubika mukuabo mutambe Yone Mubanji; kadi udi mutambe bonso bukese mu bukelenge bua mu diulu udi mumutambe yeye.

¹² Ku matuku a Yone Mubanji tô ne katataka bukelenge bua mu diulu budi bubuedibua ku bukole, banyengi badi babunyenga ku bukole.

¹³ Baprofete ne mikenshi ya Mose biakamba malu adi kâi manze kulua tô ne hakalua Yone.

¹⁴ Binuasua kumuitabusha, eu udi Eliya, ukadi ha kulua biandi.

¹⁵ Udi ne matshu unvue biandi.

¹⁶ Nenfuanyikishe bantu ba tshikondo etshi bu tshinyi? Badi bu bana bakese badi bashikama mu bisalu, badi babikila balunda babo ne,

¹⁷ Tuakunuelela nshiba, kanuena baje, tuakudila, kamina badikume mu biadi.

¹⁸ Yone wakalua kai udia bidia, kai unua matuvu; badi bamba ne, Udi ne demon munda.

¹⁹ Muana wa muntu wakulua udia bidia, unua maluvu; badi bamba ne, Yeye udi muena mudi, udi mukuatshiki wa maluvu, udi mulunda wa basangishi ba mulambu ne wa bantu babi. Bienzedi bia lungenyi bidi bilujadika.

Yesu udi wela badi bamuhidia mulau

²⁰ Yesu wakabanga kuela misoko yakadiye wenza malu andi a bungi a kukema mulau, bualu bua bena misoko kabakukudimuna mitshima yabo.

²¹ Wewe Kolazina, mulau ulualua kûdi! Wewe Bete-saïda, mulau ulualua kûdi! Bualu bua bu malu a kukema akenjibua munkatshi muenu, menjibue mu Tulo ne mu Sidona, bakadi kukudimuna mitshima yabo kale, baluate bilulu bikayabala, balale mu butue.

²² Kadi ndi nuambila ne, Halua dituku dia kulumbulula, bujitu bua dikenga dienu nebutambe bua Tulo ne bua Sidona.

²³ Ne wewe Kapênuma, nebakubandishe mu diulu, anyi? Neuhueke biebe mu Muaba wa Bafue; bualu bua bu malu a kukema akenjibua munkatshi muebe, menjibue mu Sodoma, wakadi kushala tô ne katataka.

²⁴ Kadi ndi nuambila ne, Halua dituku dia kulumbulula, bujitu bua dikenga diebe nebutambe bua dikenga dia buloba bua Sodoma.

²⁵ Dituku adi Yesu wakandamuna dî, wakamba ne, Tatu Wanyi, Mukelenge wa diulu ne wa buloba, ndi nkusakidila bualu bua wewe wakusokoka bena meshi ne bena budimu malu â, wakuasokolola kudi bana bakese;

²⁶ bulelela, Tatu, bua bualu ebu buakadi buimpe ku mesu kuebe.

²⁷ Tatu wanyi wakafila bintu bionso mu bianza bianyi; kakuena muntu udi mumanye Muana, anu Tatu; kakuena muntu udi mumanye Tatu, anu Muana ne udi Muana musue kulesha Tatu.

²⁸ Luai kundi, bonso badi ne mu dimu mukole, badi ne bujitu bunene, meme nenuhe dikisha.

²⁹ Angatai mutshi wanyi wa tshikokedi ha nshingu yenu, nuyile malu kundi; bualu bua meme ndi ne kalolo ne kanemu mu mutshima wanyi; nunku nenusangane dikisha mu mitshima yenu.

³⁰ Bualu bua mutshi wanyi wa tshikokedi udi muakane ne bujitu buanyi budi buhehele.