Matayi 10 - Mukanda wa Nzambi Dihungila Dikulukulu ne Dihungila Dihia-dihia 2003

Yesu udi uyisha bayidi bandi, udi ubamuangalashe

¹ Yeye wakabikila bayidi bandi dikumi ne babidi, wakabaha bukole bua kuhitabo nʼabu nyuma ya bukoya, ne bua kuyumushabo munda mua bantu, ne bua kukoleshabo nʼabu bantu bakadi ne masama ne matekete a mishindu yonso.

² Mena a bapostolo dikumi ne babidi adi nunku: Wa kumudilu Simona, udibo babikila ne, Petelo, ne muanʼabo Andele; Yakobo muana wa Zebedayo, ne muanʼabo Yone;

³ Filipo, ne Bâtolomayo; Toma, ne Matayo wakadi musangishi wa mulambu; Yakobo muana wa Alafayo, ne Tadayo;

⁴ Simona, Muena Kananayo, ne Yudasa Isakaliote, wakamutungila tshitungu.

⁵ Yesu wakamuangalasha bantu aba dikumi ne babidi, wakalayangana nʼabo ne, Kanuyi mu nshila wa ku bisamba bia bende, kanubuedi mu musoko wa Bena Samalea;

⁶ kadi nuye kudi mikoko idi mijimine ya nsubu wa Isalele.

⁷ Hanutshidi nuya, nubambile ne, Bukelenge bua mu diulu budi hehi.

⁸ Nukoleshe badi ne mabedi, mibishe bafue, nulengeshe bena nsudi, numushe bademon; nuakuangata bualu ebu tshianana, nubahebu tshianana.

⁹ Kanuditekedi ngolo ne tshiamu tshia argent ne tshiamu tshia mitaku mu mikaba yenu.

¹⁰ Kanuangatshi tshibombo tshia kuya nʼatshi mu nshila, kanuangatshi bikowelu bibidi ne bisabata bikuabo ne tshihangu, bualu bua muena mudimu udi ne buakane bua kuheta bidia biandi.

¹¹ Hanuabuela mu tshimenga anyi mu musoko mukese, nukebe bantu bimpe badimu, nushikamemu tô ne hanumukamu.

¹² Hanutshidi nubuela mu nsubu, nuele bena nsubu muoyo.

¹³ Bikala nsubu muimpe, ditalala dienu diluemu; kadi bikala nsubu kai muimpe, ditalala dienu dihingane kunudi.

¹⁴ Muntu udi kai unuitabusha, udi kai unvua mei enu, hantshidi nuluhuka mu nsubu au anyi mu musoko au, nututule nsenga idi mu makasa enu.

¹⁵ Bulelela, ndi nuambila ne, Halua dituku dia kulumbulula, bujitu bua dikenga dia musoko au nebutambe bua buloba bua Sodoma ne Amola.

¹⁶ Monai, ndi nutuma bu mikoko idi munkatshi mua nkashama; nuikale ne budimu bu bua nyoka ne bu nyunyu ya nkutshi idi kayi iluishangana.

¹⁷ Nudimukile bantu; bualu bua bobo nebanuele kudi balumbuludi babo, nebanukume mu nsunagoga yabo;

¹⁸ bulelela, nebaye nʼenu ku mesu kua bangovena ne ku mesu kua banfumu bua bualu buanyi, nenuikale bu tshimanyishilu ku mesu kuabo ne ku mesu kua bisamba bia bende.

¹⁹ Kadi hanufilabo nunku, kanulambi kuelangana meshi ne, Netuambe munyi? Netuambe tshinyi? Nebanuhe buakuamba ha diba adi.

²⁰ Bualu bua nuenu kanuena nuamba, Nyuma wa Tatu wenu udi wamba munda muenu.

²¹ Muanʼabo ne mutu neafile muanʼabo ku lufu, tatu neafile muanʼandi, bana nebatombokele batatuʼabo ne bamamuʼabo, nebabashiheshe.

²² Bantu bonso nebikale nʼenu lukuna bua dina dianyi; kadi wananukila tô ne kunshikidilu neasungidibue.

²³ Kadi hanukengeshabo mu musoko eu, nunyemene ku mukuabo; bulelela, ndi nuambila ne, Muana wa mutu nealue diambedi kanui banze kuenda mu misoko yonso ya Isalele.

²⁴ Muyidi kena ku mpala kua muyishi wandi, muhika kena ku mpala kua nfumu wandi.

²⁵ Mbimpe bia muyidi ikale bu mudi muyishi wandi, ne muhika ikale bu mudi nfumu waudi. Bikalabo babikile muena nsubu ne, Belezebula, nebatambe kubikila ba mu nsubu muandi muomumue.

²⁶ Nunku kanubatshinyi; bualu bua bintu bionso bidi bibuikila nebibuluibue; bidi bisokoka nebisokoloke.

²⁷ Nuambe mu munya malu andi nuambila mu mîdima; nuambe ha mitu ha nsubu malu anudi nunvua mu matshu.

²⁸ Kanutshinyi badi bashiha mubidi, kadi kabena bamanye mua kushiha muoyo; kadi nutshine udi mumanye mua kujimisha muoyo ne mubidi kabidi mu Ngena.

²⁹ Kabatu bahana mishamisha ibidi ku dikuta dikese, anyi? Mushamusha umue kawena uhona hanshi, anu hitabusha Tatu wenu.

³⁰ Nsuki ya ku mitu yenu mene mene idi mibala yonso.

³¹ Nunku kanutshinyi, mushinga wenu udi mutambe wa mishamisha ya bungi.

³² Muntu yonso wangitabusha ku mesu kua bantu, meme nemuitabushe kabidi ku mesu kua Tatu wanyi udi mu diulu.

³³ Kadi muntu yonso wampidia ku mesu kua bantu, meme nennuhidie kabidi ku mesu kua Tatu wanyi udi mu diulu.

³⁴ Kanuedianganyi meshi ne, Meme nakuluila bua kutuma ditalala ha buloba, tshiakuluila bua kutuma ditalala, nakuluila bua kutuma muele wa nvita.

³⁵ Nakuluila bua kuelesha muntu ne tatu wandi mpata, ne muana mukashi ne mamuʼandi mpata, ne mukashi wa muanʼandi ne mamuʼandi-muenu mpata.

³⁶ Badi mu nsubu nebikale ne muena nsubu lukuna.

³⁷ Muntu udi ne tatu wandi anyi baba wandi dinanga ditambe didiye nʼadi kundi meme kena ukumbana bua kuikaleye muyidi wanyi; muntu udi ne muanʼandi mulume anyi muanʼandi mukashi dinanga ditambe didiye nʼadi kundi meme kena ukumbana bua kuikaleye muyidi wanyi.

³⁸ Muntu udi kai wangata mutshi wandi mutshiamakane, udi kai undonda meme, kena ukumbana bua kuikaleye muyidi wanyi.

³⁹ Muntu udi uheta muoyo wandi neaujimishe; muntu udi ujimisha muoyo wandi bua bualu buanyi neauhete.

⁴⁰ Wanuitabusha udi ungitabusha meme, wangitabusha meme udi witabusha wakuntuma.

⁴¹ Witabusha muprofete mu dina dia muprofete, neahete difutu dia muprofete; witabusha muntu muakane mu dina dia muntu muakane neahete difutu dia muntu muakane.

⁴² Muntu yonso wahesha umue wa mu bantu aba bahuekele nasha dikoho dia mai matalala a kunua mu dina dia muyidi, bulelela, ndi nuambila ne, Yeye kena uhanga difutu diandi.