Marke 1 - Mukanda wa Nzambi Dihungila Dikulukulu ne Dihungila Dihia-dihia 2003

Yone Mubatiji

¹ Tshibangidilu tshia lumu luimpe lua Yesu Kilisto, Muana wa Nzambi.

² Bu mudi muprofete Yeshaya mufunde ne, Ndi ntuma mukenshi wanyi ku mpala kuebe, Yeye nealongolole nshila webe;

³ Di dia muntu udi wela lubila mu tshihela ne, Longololai nshila wa Mukelenge, Nululamishe nshila yandi;

⁴ Yone wakalua, wakadi ubatiza mu tshihela wambila bantu bualu bua dibanza dia kukudimuna kua mitshima ne mibi yabo ijimishibue.

⁵ Bantu ba mu luseke luonso ma Yudaya ne bonso ba mu Yelushalema bakumuka, bakaya kudiye; bakabatijibua kudiye mu musulu wa Yadene, batonda mibi yabo.

⁶ Yone wakadi muluate tshilulu tshia mioso ya kamelu, wakadi ne mukaba wa tshiseba mu tshimono tshiandi, wakadi udia mikumbi ne buitshi.

⁷ Yeye wakamba bualu bua Nzambi ne, Udi ulua ku nyima kuanyi udi muntambe meme, tshiena ne buakane bua kuzonzama mua kusulula mionshi ya bisabata biandi.

⁸ Nakunubatiza mu mai, kadi yeye neanubatize mu Nyuma Muimpe.

Yesu udi ubatijibua

⁹ Matuku au Yesu wakafuma ku Nazaleta wa Galela, wakabatijibua kudi Yone mu musulu wa Yadene.

¹⁰ Hakumukeye mu mai, wakamona diulu dibululuka, ne Nyuma bu nyunyu wa nkutshi umutulukila;

¹¹ dî diakafuma mu diulu ne, Wewe udi Muana wanyi munanga, wewe udi unsankisha bimpe.

Satana udi uteya Yesu

¹² Ha diba adi Nyuma wakamutuma mu tshihela.

¹³ Yeye wakadi mu tshihela matuku makumi anai, bamuteya kudi Satana; yeye wakadi ne nyama ya mu tshisuku; banjelo bakadi bamukuatshisha ne biakadiye nʼabi bualu.

Yesu udi wambila Bena Galela bualu bua Nzambi

¹⁴ Hakakuatabo Yone, Yesu wakalua mu Galela, wenda wambila bantu lumu luimpe lua Nzambi,

¹⁵ wakamba ne, Matuku akukumbana, bukelenge bua Nzambi budi hehi; kudimunai mitshima yenu, nuitabushe lumu luimpe.

Yesu udi ubikila Petelo ne Andele

¹⁶ Hakadi Yesu uhitshila ha buihi ne dishiba dia Galela, yeye wakamona Simona ne Andele muanʼabo ne Simona, bela kahamba mu mai, bualu bua bobo bakadi bilembi.

¹⁷ Yesu wakabambila ne, Luai ku nyima kuanyi, nenuvuishe bilembi bia bantu.

¹⁸ Bakashîa tuhamba hanshi lukasa, bakamulonda.

¹⁹ Hakayeye tshituha, wakamona Yakobo muana wa Zebedayo, ne muanʼabo Yone, bakadi mu buatu balukulula tuhamba tuabo.

²⁰ Ha diba adi yeye wakababikila; bakashîa tatuʼabo Zebedayo mu buatu ne bena mu dimu; bakamulonda.

Yesu udi umusha nyama wa bukoya munda mua muntu mu Kapênuma

²¹ Bakaya mu Kapênuma; dituka dia Lumingu lua Bayuda yeye wakabuela mu nsunagoga, wakabayisha

²² Diyisha diandi diakabakemesha, bualu bua yeye wakabayisha bu muena mei, kakadi bu bafundi.

²³ Mu nsunagoga wabo muakadi muntu muikale ne nyuma wa bukoya munda; wakela dî dikole ne,

²⁴ Wewe Yesu Muena Nazaleta, budi nʼebe bualu kai? Wewe wakulua bua kutushiha, anyi? Ndi mukumanye, wewe udi Wa Tshijila wa Nzambi.

²⁵ Yesu wakamubela ne, Hua, Umuka munda muandi.

²⁶ Nyuma wa bukoya wakamuhaluisha, wakela dî diandi bikole, wakahatuka munda muandi.

²⁷ Bakakema bonso, bakakonkangana ne, Etshi ntshinyi? Diyisha dihia-dihia; yeye udi ne bukole bua kuela nyuma ya bukoya dî, imunvuile.

²⁸ Lumu luandi luakaya mu luseke luonso lua Galela ne ku nyima kualu.

Yesu udi ukolesha muku wa Petelo mukashi

²⁹ Hakaluhukabo mu nsunagoga, bakabuela mu nsubu wa Simona ne Andele; Yakobo ne Yone bakadi nʼabo.

³⁰ Muku wa Simona mukashi wakadi mulale hanshi ne disama dia mubidi kahia; bakambila Yesu bualu buandi;

³¹ wakalua biandi, wakamukuata ku tshianza, wakamubisha; disama dia mubidi kahia diakamulekela, wakabalongoluela bia kudia.

Yesu udi umusha bademon munda mua bantu, udi ushikisha masama a bakuabo

³² Hakabuela diba, bakatua kudiye ne babedi bonso ne bakadi bakuatshike ne bademon.

³³ Bantu bonso ba musoko bakunguila ku tshibi.

³⁴ Wakashikisha masama a ba bungi bakadi ne mabedi mangi, wakumusha bademon ba bungi; yeye kakitabusha bademon bakule, bualu bua bobo bakamumanya.

Yesu udi utendelela Nzambi, udi wambila Bena Galela bualu bua Nzambi

³⁵ Hatshiatshia, butuku kabui buanze kutshia, yeye wakabika, wakaluhuka, wakaya mu tshihela, wakatendelelaku Nzambi.

³⁶ Simona ne bakuabo bakadi nʼandi bakamulonda ku nyima;

³⁷ bakamusangana, bakamuambila ne, Bantu bonso badi bakukeba.

³⁸ Yeye wakabambila ne, Tuyai bietu kukuabo mu minga misoko idi ha buihi, mbambileku bualu bua Nzambi; nakuluila bualu ebu.

³⁹ Yeye wakaya mu nsunagoga yabo ya mu luseke luonso lua Galela, ubambila bualu bua Nzambi, umusha bademon.

Yesu udi ulengesha muena nsudi

⁴⁰ Muena nsudi wakalua kudiye, wakamutendekena, wakamutuila binu, wakamuambila ne, Biwasua kuenza nunku, udi mumanye mua kundengesha.

⁴¹ Luse luakamukuata, wakolola tshianza, wakamulenga, wakamuambila ne, Ndi musue, wikale mulengeshibue.

⁴² Nsudi yakamulekela lukasa, wakalengeshibua.

⁴³ Yesu wakamukandika, wakamuhatula lukasa,

⁴⁴ wakamuambila ne, Kuambidi muntu bualu ebu; uye biebe, udileshe kudi muakuidi, ufile biakamba Mose bu tshimanyishilu ku mesu kua bantu bualu bua kulengeshibua kuebe.

⁴⁵ Kadi yeye wakaluhuka, wakabanga kumanyisha bantu, wakatangalasha bualu ebu; nunku Yesu kakamanya mua kubuela mu musoko bamumone kudi bantu, yeye wakadi anu mu bihela; bantu ba nseke yonso bakalua kudiye.