Lewitiki 9 - Mukanda wa Nzambi Dihungila Dikulukulu ne Dihungila Dihia-dihia 2003

Alona Udi Ufila Milambu

¹ Hakahita matuku muanda mukulu, Mose wakabikila Alona ne bana bandi balume ne bakulu ba Bena Isalele,

² wakambila Alona ne, Angata kana ka ngombe bu mulambu wa kubuikila nʼau bubi ne tshimpanga, bidi kabiyi ne tshitema, bu mulambu wa kuosha ha kahia, ubifile ku mesu kua Yehowa.

³ Wambile Bena Isalele ne, Nuangate mpumbu wa mbushi bu mulambu wa kubuikila nʼau bubi, nusungulule kana ka ngombe ne kana ka mukoko bia tshidimu tshimue, bidi kabiyi ne tshitema, bu mulambu wa kuosha ha kahia,

⁴ angata kabidi mulume wa ngombe ne tshimpanga bu mulambu wa kuvuisha nʼau ditalala bua kubishiha ku mesu kua Yehowa ne mulambu wa bukula busangisha ne manyi, bualu bua Yehowa neamueneke kunudi lelu.

⁵ Bobo bakalua ne bintu biakamba Mose ku mpala kua ntenta wa kusambakena, bantu bonso bakalua ha buihi, bakimana ku mpala kua Yehowa.

⁶ Mose wakamba ne, Ebu mbualu buakamba Yehowa bua nuenu nuenze, ne butumbi bua Yehowa nebumueneke kunudi.

⁷ Mose wakambila Alona ne, Semena ha buihi ne tshioshelu, ufile mulambu webe wa kubuikila nʼau bubi ne mulambu webe wa kuosha ha kahia, udibuikidile bubi buebe ne bubi bua bantu, ufile mulambu wa bantu kabidi bua kubabuikidila nʼau bubi buabo bu muakamba Yehowa.

⁸ Nunku Alona wakalua ha buihi ne tshioshelu, wakashihela kana ka ngombe ka mulambu wa kubuikila nʼau bubi buandi.

⁹ Bana balume ba Alona bakamulesha mashi, yeye wakatua munu wandi mu mashi, wakâlaba ku nsengu ya ku tshioshelu, wakalongolola mashi ku tshitaku tshia tshioshelu,

¹⁰ kadi yeye wakosha dianyi ne tumuma ne lukutu lua mutshima bia mulambu wa kubuikila nʼau bubi ha tshioshelu, bu muakambila Yehowa Mose.

¹¹ Wakosha munyinyi ne tshiseba ku butshika bua tshitudilu.

¹² Wakashiha mulambu wa kuosha ha kahia, ne bana balume ba Alona bakamulesha mashi ne yeye wakâmiamina ku tshioshelu.

¹³ Bakamulesha mulambu wa kuosha, tshituha ne tshituha ne mutu, yeye wakabisha ha tshioshelu.

¹⁴ Wakuvuwa bintu bia munda ne bioku, wakabisha ha tshioshelu ha mutu ha mulambu wa kuosha.

¹⁵ Wakalua ne mulambu wa bantu, wakangata mbushi wa mulambu wa kubuikila bubi bua bantu, wakamushiha, wakamufila bu mulambu wa kubuikila nʼau bubi, bu muakenzeye mulambu wa diambedi.

¹⁶ Wakalua ne mulambu wa kuosha ha kahia, waka ufila bu muakadi mukenji.

¹⁷ Wakalua ne mulambu wa bukula, wakabuambula dianza tente, wakabuosha ha tshioshelu hehi ne mulambu udibo bosha ne dinda.

¹⁸ Wakashiha mulume wa ngombe ne tshimpanga kabidi, bu mulambu wa kuvuisha nʼau ditalala kudi bantu, bana balume ba Alona bakamulesha mashi akamiamineye ku tshioshelu,

¹⁹ ne dianyi dia mulume wa ngombe ne dia tshimpanga ne mukila udi ne dianyi ne dianyi didi ha mutu ha bintu bia munda ne tumuma ne lukutu lua mutshima,

²⁰ bakateka dianyi ha biadi, ne yeye wakosha dianyi ha tshioshelu,

²¹ kadi Alona wakanyukula biadi ne tshibelu tshia ku tshianza tshia balume bu mulambu wa kunyukula ku mesu kua Yehowa, bu muakamba Mose.

²² Alona wakolola bianza biandi kudi bantu, wakabandisha disanka, yeye wakahueka kuakadiye ufila mulambu wa kubuikila nʼau bubi ne wa kuosha ha kahia ne ya kuvuisha nʼai ditalala.

²³ Mose ne Alona bakabuela mu ntenta wa kusangakena, bakaluhuka, bakavudishila bantu disanka, butumbi bua Yehowa buakamueneka kudi bantu bonso.

²⁴ Kahia bakahatuka kudi Yehowa, kakosha mulambu ne dianyi biakadi ha tshioshelu, hakakatangila bantu bonso, bakela mbila, bakatua mpala hanshi.