Lewitiki 6 - Mukanda wa Nzambi Dihungila Dikulukulu ne Dihungila Dihia-dihia 2003

¹ Yehowa wakambila Mose ne,

² Biasambuka muntu ku mikenji bua kuenzela Yehowa bualu bubi, ne bienzeleye muena mutumba nʼandi bualu bubi ne bintu biakafileye mu bianza biandi anyi hendululeye nʼabi mushinga anyi bibeye bintu biandi, anyi biakengesheye muena mutumba nʼandi,

³ anyi bianguleye tshintu tshiakajimishabo kudi mukuabo mumudinge bua bualu ebu ne muditshiheye ne mashimi, bienzeye malu mabi â onso,

⁴ bienzeye bibi, bikaleye muhile, yeye neahingishe bintu biakibeye anyi tshintu tshiakanyengeye ku bukole anyi bintu biakufileye mu bianza biandi anyi bintu biakadi bijimina biakuanguleye

⁵ anyi tshintu tshiakaditshiheye nʼatshi ne mashimi, neahingishe tshintu atshi ne tshituha tshitanu ha mutu katshi, neatshihingishe kudi muenʼatshi mu dituku didibo bamuhisha.

⁶ Yeye neafile mulambu wa disambuka dia mikenji kudi Yehowa, tshimpanga tshidi katshiyi ne tshialua tshia mushinga ûdi witabusha kudi muakuidi bu mulambu wa disambuka dia mikenji,

⁷ muakuidi neafile mulambu wa kumubuikidila nʼau bubi kudi Yehowa ne bubi buakenzeye nebuikale bubuikidibue.

Mikenji ya Milambu

⁸ Yehowa wakambila Mose ne,

⁹ Elela Alona ne bana bandi balume mukenji ne, Eu udi mukenji wa mulambu wa kuosha ha kahia, mulambu wa kuosha newikale ha nkunyi ha tshioshelu butuku buonso tô ne dinda, kahia nekikalehu butuku buonso, kakajimi nansha.

¹⁰ Muakuidi nealuate bilulu biandi bia lin ne mihanu ya lin, neangate butue bua kahia kakosha mulambu wa ha tshioshelu, neabuteke hehi ne tshioshelu.

¹¹ Neavule bilulu ebi, nealuate bilulu bikuabo, neatuale butue ku butshika bua tshitudilu ku muaba mutoke.

¹² Kahia ka ha tshioshelu kakajimi nansha, muakuidi neatekehu nkunyi dinda ne dinda, nealonge mulambu wa kuosha ha tshioshelu, neoshe dianyi dia mulambu wa kuvuisha nʼau ditalala.

¹³ Kahia katemene ha tshioshelu ku dituku ne ku dituku, kakajimi nansha.

¹⁴ Eu udi mukenji wa mulambu wa bukula bana balume ba Alona nebaufile ku mesu kua Yehowa ku mpala kua tshioshelu.

¹⁵ Yeye neambule dianza dia bukula bubotesha tente budi busangisha ne manyi ne musenga wa manananshi, neabuoshe ha tshioshelu bu tshintu tshidi tshima dihembu, bu tshivulukidi kudi Yehowa.

¹⁶ Tshituha tshidi tshishale netshikale kudi Alona ne bana bandi balume bu tshintu tshia kudia, bobo nebadie tshituha tshidi katshiyi ne luevene mu muaba wa tshijila, mu luhangu lua ntenta wa kusambakena.

¹⁷ Kabalambi tshituha atshi ne luevene. Nakabaha tshituha tshia mulambu wanyi wa kuosha ha kahia, tshintu tshidi tshitambe tshijila bu mulambu wa kubuikila nʼau bubi bua bantu ne mulambu wa disambuka dia mikenji.

¹⁸ Bana balume ba Alona bonso nebatshidie, bu tshituha tshiabo mu bikondo biabo bionso munkatshi mua mulambu ya kuoshila Yehowa ha kahia, muntu yonso udi ulenga bintu ebi tshianza neikale muntu wa tshijila.

¹⁹ Yehowa wakambila Mose ne,

²⁰ Eu udi mulambu wa Alona ne bana bandi balume udibo bafila kudi Yehowa mu dituku didibo bela manyi ha mutu tshia dikumi tshia épha wa bukula bubotesha bu mulambu wa bukula, neafile tshituha dinda ne tshituha tshikuabo dilolo.

²¹ Nebabusangishe ne manyi mu dilonga, ne hashikishabo kubulamba, nebafile bituha bidi bilamba kudi Yehowa bu tshintu tshidi tshitua dihembu.

²² Muakuidi wa munkatshi mua bana balume ba Alona, udibo bela manyi ha mutu bua kuhianeye mudimu wandi, neaufile kudi Yehowa bu muakelabo mukenji tshiendelele, neboshe mulambu eu mujima.

²³ Mulambu wonso udi muakuidi ufila nebawoshe ne kahia, kabadi mulambu eu.

²⁴ Yehowa wakambila Mose ne,

²⁵ Wambile Alona ne bana bandi balume ne, Eu udi mukenji wa mulambu wa kubuikila nʼau bubi bua bantu mu muaba udibo bashihela mulambu wa kuosha ha kahia nebashihe mulambu wa kubuikila nʼau bubi bua bantu ku mesu kua Yehowa, eu udi mulambu mutambe wa tshijila.

²⁶ Muakuidi udi ufila mulambu wa kubuikila nʼau bubi, yeye neaudie, neaudie mu muaba wa tshijila mu luhangu lua ntenta wa kusangakena.

²⁷ Tshintu tshionso tshidi tshituangane ne munyinyi au netshikale tshia tshijila, hamiaminabo mashi a mulambu, biamatshilau ha tshmialu, wewe neutshisukule mu muaba wa tshijila.

²⁸ Kadi tshivuadi tshia dima tshidibo baulambila nebatshishihe, biaulambilabo mu tshivuadi tshia tshiamu tshia mitaku, nebatshisukule bimpe ne mai.

²⁹ Bana balume bonso ba bakuidi nebaudie, etshi ntshintu tshitambe tshijila.

³⁰ Kabadi mulambu wa kubuikila nʼau bubi udibo balue nʼau ne mashi mu ntenta wa kusangakena bua kubuikila nʼau bubi bua bantu mu muaba wa tshijila, nebawoshe ne kahia.