Lewitiki 27 - Mukanda wa Nzambi Dihungila Dikulukulu ne Dihungila Dihia-dihia 2003

Mikenji ya Bintu Bidibo Bajidila Yehowa

¹ Yehowa wakambila Mose ne,

² Wambile Bena Isalele ne, Biasua mundi kushikisha kuditshiha kua kudifila kuandi, wewe neubale bungi bua bintu bidiye ufila kudi Yehowa.

³ Wewe neubale bungi bua bintu kudi mundi mulume udi ne bidimu makumi abidi tô ne ku bi dimu makumi asambombo bu nshekele ya argent makumi atanu bu nshekele udibo bafila mu nsubu wa tshitendelelu.

⁴ Bikaleye muana wa bakashi, neubale nshekele makumi asatu.

⁵ Bikaleye muana wa balume udi ne bidimu bitanu tô ne ku bidimu makumi abidi, neubale nshekele makumi abidi, ne bikaleye muana wa bakashi, nshekele dikumi.

⁶ Bikaleye muana wa balume wa ngondo umue tô ne ku bidimu bitanu, neubale nshekele itanu, ne bikaleye muana wa bakashi, nshekele isatu.

⁷ Bikaleye mulume udi uhita bidimu makumi asambombo, wewe neubale nshekele dikumi ne itanu, ne bikaleye mukashi, nshekele dikumi.

⁸ Bikaleye muhele kayi ne bungi bua bintu biwakamubadila, nunku nebamushikike ku mpala kua muakuidi, ne muakuidi neatuangane nʼandi mushinga, muakuidi neatuangane ne muena kuditshiha mushinga ku bungi bua bintu bidiye nʼabi.

⁹ Bialueye ne nyama udibo bafila bu mulambu kudi Yehowa, bintu bionso bidibo baha Yehowa nebikale bintu bia tshijila.

¹⁰ Kamushintakashi nansha, nyama muimpe ku nyama mubi anyi nyama mubi ku nyama muimpe, biashintakasheye nyama ku nyama mukuabo, nyama eu ne nyama wakashintakasheye handi nebikale bia tshijila.

¹¹ Bialueye ne nyama mubi udibo kabayi mua kudia bu mulambu kudi Yehowa, yeye neateke nyama ku mpala kua muakuidi,

¹² ne muakuidi neatuangane handi mushinga bikala nyama muimpe anyi mubi, nyama neikale wa mushinga wakadiye ne muakuidi.

¹³ Biasueye kumuhikula, yeye neasakidile tshituha tshitanu ha mutu ha mushinga wandi.

¹⁴ Biajidila mundi Yehowa nsubu wandi, muakuidi neatuangane nʼandi mushinga, bikala nsubu muimpe anyi mubi, nsubu neikale ne mushinga wakatueye ne muakuidi.

¹⁵ Biasua muena nsubu kuhikula nsubu wandi, yeye neasakidile tshituha tshitanu tshia mushinga wa nsubu ha mutu hau, ne nsubu neikale wandi.

¹⁶ Biajidila muntu Yehowa tshituha tshia budimi bua buhianyi buandi, wewe neutuangane nʼandi mushinga ku bungi bua bintu bidiye mukunemu, biakuneye homer wa orge, mushinga wai newikale nshekele ya argent makumi atanu.

¹⁷ Biajidileye budimi buandi ku tshidimu tshia disanka dinene, mushinga wabu newikale bu muakatuanganabo.

¹⁸ Kadi biajidileye budimi buandi ku nyima kua tshidimu tshia disanka dinene, muakuidi neamubadile mushinga bu bungi bua bidimu bidi bishala tô ne halua tshidimu tshia disanka dinene, nebamuhuekeshile mushinga wakasanganabo.

¹⁹ Biasua muntu wakajidila budimi kubuhikula, yeye neasakidile tshituha tshitanu ha mutu ha mushinga wakasanganabo, ne budimi nebuikale buandi.

²⁰ Kadi biahidieye kuhikula budimi, anyi bikaleye muhanyishe muntu mukuabo budimi, kabena mua kubuhikula kabidi,

²¹ kadi halua tshidimu tshia disanka dinene hahingashabo budimi mu bia nza bia banfumu babu, budimi ebu nebuikale bua tshijila kudi Yehowa, nebuikale mu bianza bia muakuidi.

²² Biajidileye Yehowa budimi buakasumbeye budi kabuyi bua buhianyi buandi,

²³ muakuidi neamubadile mushinga uwakatuangana nʼandi ku tshidimu tshia disanka dinene, yeye neafue mushinga uwakatuangana handi dituku adi bu tshintu tshia tshijila kudi Yehowa.

²⁴ Mu tshidimu tshia disanka dinene budimi nebuhingane kudi wakabuhana, kudi muena budimi mene.

²⁵ Neubale mushinga wa bintu bionso bu mushinga wa nshekele wa mu nsubu wa tshitendelelu guéras makumi abidi idi nshekele umue.

²⁶ Muntu kena mua kujidila Yehowa muanʼa bute wa nyama, nansha muana wa ngombe nansha muana wa mukoko etshi ntshintu tshia Yehowa.

²⁷ Bikala nyama kayi muakane, yeye neamuhikule bu mudi mushinga webe, neasakidile tshituha tshitanu ha mutu, bikaleye kayi umuhikula, wewe neumuhane bu mudi mushinga webe.

²⁸ Kabena mua kuhana anyi kuhikula tshintu tshia tshijila tshiakajidilabo kudi Yehowa, nansha tshintu tshia muntu anyi tshia nyama anyi tshia budimi bua buhianyi buandi bintu ebi bidi bitambe tshijila kudi Yehowa.

²⁹ Kabena mua kuhikula muntu mujidile munkatshi mua bantu bua kuhishibua, nebamushihe.

³⁰ Tshintu tshionso tshia dikumi tshia buloba anyi tshia bintu biakakuama mu buloba anyi tshia mamuma a mitshi, etshi ntshintu tshia Yehowa, ntshintu tshia tshijila kudi Yehowa.

³¹ Biasua muntu kuhikula tshituha tshia tshintu tshia dikumi, yeye neasakidile tshituha tshitanu ha mutu hatshi.

³² Tshintu tshionso tshia dikumi tshia ngombe anyi tshia mikoko bidibo babala netshikale tshintu tshia tshijila kudi Yehowa.

³³ Yeye kena ukeba mua kutangila ne tshintu tshidi tshimpe anyi tshidi tshibi, yeye kena mua kutshishintakasha nansha, biabishintakasheye, tshintu etshi ne tshintu tshiakashintakasheye nʼatshi nebikale bia tshima, kabena mua kubihikula.

³⁴ Ei mmikenji yakelela Yehowa Bena Isalele mukana mua Mose mu mukuna wa Sinai.