Lewitiki 18 - Mukanda wa Nzambi Dihungila Dikulukulu ne Dihungila Dihia-dihia 2003

Kabendi Masandi

¹ Yehowa wakambila Mose ne,

² Wambile Bena Isalele ne, Meme ndi Yehowa, Nzambi wenu.

³ Kanuenji bilele bia mu buloba bua Ejipitu bunuakadi bashikame, kanuenji bilele bia mu buloba bua Kanâna bundualua kunuha, kanulondi mikenji yabo.

⁴ Nuenu nuenze mei anyi ne mikenji yanyi, nubilonde meme ndi Yehowa, Nzambi wenu.

⁵ Nuenu nutumikile mei anyi ne mikenji yanyi, bienza muntu nunku, neikale ne muoyo. Meme ndi Yehowa.

⁶ Kuyi ha buihi ne muanʼenu bua kumuvula bilulu biandi, meme ndi Yehowa.

⁷ Kuvudi tatuʼebe anyi mamuʼebe bilulu, yeye udi mamu webe, kumuvudi bilulu.

⁸ Kuvudi mukashi wa tatuʼebe bilulu, yeye udi bu tatu mene.

⁹ Kuvudi muanʼenu mukashi bilulu, bikaleye muana wa tatuʼebe anyi muana wa mamuʼebe udi muledibue mu nsubu muenu, anyi muaba mukuabo.

¹⁰ Kuvudi muana mukashi wa muana webe mulume, anyi muana mukashi wa muana webe mukashi bilulu, bobo badi bu wewe mene.

¹¹ Kuvudi muana mukashi wa mukashi wa tatuʼebe bilulu, yeye udi muanʼenu mukashi.

¹² Kuvudi tatuʼebe mukashi bilulu, yeye udi muanʼabo ne tatuʼebe.

¹³ Kuvudi mamuʼebe mukuabo bilulu, yeye udi muanʼabo ne mamuʼebe.

¹⁴ Kuvudi muanʼabo ne tatuʼebe mulume bilulu, kuyi ha buihi ne mukashi wandi, yeye udi mukashi wa tatuʼebe mukuabo.

¹⁵ Kuvudi mukashi wa muanʼebe bilulu, yeye udi mukashi wa muana webe, kuvudi bilulu biandi.

¹⁶ Kuvudi mukashi wa muanʼenu mulume bilulu, yeye udi mukashi wa mua nʼenu mulume.

¹⁷ Kuvudi mukashi ne muanʼandi mukashi bilulu, kuvudi muana mukashi wa muanʼandi mulume, anyi muana mukashi wa muanʼandi mukashi bilulu, badi bana benu, bualu ebu budi bubi.

¹⁸ Kubala muan abo ne mukashi ebe, bua kumutatshisha hatshidiye ne muoyo ne kumuvula bilulu.

¹⁹ Kuvudi mukashi bilulu hatshidiye ne tshijila tshia kulela kuandi.

²⁰ Kuladi ne mukashi wa mukuenu bua kudionena bualu buandi.

²¹ Kanuadi bana bebe bua kubahitshisha mu kahia ka Moleke, kutedi dina dia Nzambi wenu tshitelatela meme ndi Yehowa.

²² Kuladi ne mulume bu mudibo balala ne mukashi, bualu ebu budi bubi.

²³ Kuladi ne nyama bua kudionena mutshima webe, ne mukashi kimanyi biandi ku mpala kua nyama bua kulala handi, bualu ebu budi butamba bubi.

²⁴ Kanudionenyi mitshima yenu ne malu au Ebi mbilele bia bisamba bindi ngihata ku mesu kuenu,

²⁵ buloba buabo buakoneka, nempingishe bubi ha mutu habu, buloba nkayabu budi buluka bena buloba.

²⁶ Nuenu nutumikile mei anyi ne mikenji yanyi, kanuenji bilele ebi bidi bitambe bubi, nansha bana baledibue mu nsubu yenu nansha benyi badi munkatshi muenu

²⁷ (bualu bua bena buloba bakadi ku mpala kuenu bakenza malu mabi â onso, ne buloba buakoneka),

²⁸ buloba kabunuluki kabidi hanuabuona, bu muakadi buloba buluka tshisamba tshiakadi ku mpala.

²⁹ Bantu bonso batu benza malu mabi au nebumushibue munkatshi mua bana babo.

³⁰ Nunku nutumikile dî dianyi, kanuenji bilele ebi bibi biakenzabo ku mpala, kanudionyi mu malu au meme ndi Yehowa, Nzambi wenu.