Lewitiki 13 - Mukanda wa Nzambi Dihungila Dikulukulu ne Dihungila Dihia-dihia 2003

Mikenji bualu bua Bena Nsudi

¹ Yehowa wakambila Mose ne Alona ne,

² Bikala muntu ne tshiuja tshikese mu dikoba diandi anyi tshilamulamu anyi ditoba ditoke tô, bikala bintu ebi bu disama dia nsudi, nebalue nʼandi kudi Alona muakuidi anyi kudi umue wa bana bandi balume bakuidi.

³ Muakuidi neatangile ha disama didi mu dikoba diandi, bikala miosa ya mu muaba wa disama miandamuke mitoke tô, ne bikala disama dimane kubuela mu munyinyi wandi mene mene, edi ndisama dia nsudi, muakuidi neamutangile, neambile bantu ne, Muntu eu kena muakane.

⁴ Biamueneka ditoba ditoke tô mu dikoba diandi, ne bikaladi kadiyi dibuela mu munyinyi wandi mene, ne bikala miosa kayiyi mianze kuandamuka mitoke tô, nunku muakuidi neabueshe muntu udi ne disama ha nkayandi mu nsubu tô matuku muanda mutekete.

⁵ Halua dituku dia muanda mutekete, muakuidi neamutangile kabidi, bielanganeye meji ne disama didi diamba kushika, kadiena ditampakana, nunku muakuidi neamubueshe mu nsubu ha nkayandi matuku muanda mutekete makuabo.

⁶ Halua dituku dia muanda mutekete, muakuidi neamutangile kabidi, ne biamba disama kushika, bikaladi kadiyi ditampakana mu dikoba diandi, nunku muakuidi neambile bantu ne, Muntu eu udi muakane, disama edi didi bu tshilamulamu, muntu eu neuvuwe bilulu biandi, neikale mua kane.

⁷ Kadi bikala tshilamulamu tshitampakane mu dikoba, hakashikisheye kudilesha kudi muakuidi bualu bua kudilengesha, nunku yeye neadileshe kudi muakuidi kabidi,

⁸ muakuidi neatangile ne bikala tshilamulamu tshitampakane mu dikoba, nunku muakuidi neambile bantu ne, Muntu eu kena muakane disama edi didi dia nsudi.

⁹ Bikala muntu ne disama dia nsudi, nebalue nʼandi kudi muakuidi,

¹⁰ muakuidi neatangile, ne bikala tshima tshitoke tô mu dikoba, ne bikala miosa miandamuke mitoke tô, ne bikala munyinyi mubishe mu tshima,

¹¹ edi didi disama dia nsudi diakadi kudiye diambedi mu dikoba diandi, ne muakuidi neambile bantu ne, Muntu eu kena muakane, yeye kena umubuesha mu nsubu, bualu bua yeye kena muakane.

¹² Kadi bikala disama dia nsudi ditampakane mu dikoba ne biabuikiladi dikoba dionso dia muena nsudi, ku mutu tô ne ku makasa andi, ku miaba yonso idi muakuidi utangila,

¹³ nunku muakuidi neatangile ne bikala disama dia nsudi dimane kubuikila dikoba diandi dionso, yeye neambile bantu ne, Muntu eu wakadi ne nsudi udi muakane, wakandamuka muteke tô, yeye udi muakane.

¹⁴ Kadi biamueneka munyinyi wa mubidi mubishe, yeye kena muakane.

¹⁵ Muakuidi neatangile ha munyinyi wa mubidi mubishe, neambile bantu ne, Muntu eu kena muakane, munyinyi eu mubishe kawena muakane edi ndisama dia nsudi.

¹⁶ Anyi bikala munyinyi eu mubishe muandamuke muteke tô kabidi nunku yeye nealue kudi muakuidi,

¹⁷ muakuidi neamutangile, ne biandamukeye mutoke tô, nunku muakuidi neambile bantu ne, Muntu eu wakadi ne nsudi udi muakane, ne yeye neikale muakane.

¹⁸ Bikala muntu ne tshima mu dikoba, ne bikala tshima tshiondahibue,

¹⁹ ne bikala muaba watshi mutoke tô, anyi ditoba ditoke, nunku yeye neadileshe kudi muakuidi,

²⁰ muakuidi neatangile, ne bielanganeye meji ne disama diakabuela mu munyinyi wa mubidi, ne miosa idi miandamuke mitoke tô, nunku muakuidi neambile bantu ne, Muntu eu kena muakane edi ndisama dia nsudi diakamueneka mu tshima.

²¹ Kadi biatangila muakuidi ne miosa mitoke tô kayenaku, ne disama kadiena dibuela mu munyinyi wa mubidi, nunku muakuidi neamubueshe ha nkayandi mu nsubu matuku muanda mutekete,

²² bikala disama ditampakane mu dikoba, nunku muakuidi neambile bantu ne, Muntu eu kena muakane edi ndisama dia nsudi.

²³ Kadi bikala ditoba ditoke tô dishale mu muaba wadi, kadiyi ditampakane, etshi ntshibangu tshia tshima, ne muakuidi neambile bantu ne, Muntu eu udi muakane.

²⁴ Bikala muntu mudioshe ne kahia, ne bikala munyinyi wa mu muaba muandamuke mutoke anyi mukunze,

²⁵ muakuidi neatangile ha muaba au, ne bikala miosa ya mu muaba au miandamuke mitoke tô, ne bikala disama dimane kubuela mu munyinyi wa mubidi, edi ndisama dia nsudi diakumueneka mu muaba wakadiosheye muakuidi neambile bantu ne, Muntu eu kena muakane edi ndisama dia nsudi.

²⁶ Biatangila muakuidi ne miosa mitoke tô kayena mu muaba au mutoke, ne disama kadiena dibuela mu munyinyi wa mubidi, muakuidi neamubueshe ha nkayandi mu nsubu matuku muanda mutekete.

²⁷ Halua dituku dia muanda mutekete, muakuidi neamutangile ne bikala disama ditampakane mu dikoba muakuidi neambile bantu ne, Muntu eu kena muakane edi ndisama dia nsudi.

²⁸ Bishala ditoba ditoke mu muaba umue, kadiyi ditampakane mu dikoba, etshi ntshiuja tshiakadiosheye ne kahia, ne muakuidi neambile bantu ne, Muntu eu udi muakane, etshi ntshibangu tshia kahia.

²⁹ Bikala mulume anyi mukashi ne mputa ku mutu anyi ku muedi,

³⁰ muakuidi neatangile ha muaba au, bielanganeye meji ne mputa udi ubuela mu munyinyi wa mubidi, ne nsuki yakuandamuka mitoke tô, muakuidi neambile bantu ne, Muntu eu kena muakane edi ndisama dia nsudi didi ku mutu anyi ku muedi.

³¹ Biatangila muakuidi ha mputa ne bielanganeye meji ne disama kadiena dibuela mu munyinyi wa mubidi, ne nsuki mifike kayenaku, muakuidi neamubueshe ha nkayandi mu nsubu matuku muanda mutekete.

³² Halua dituku dia muanda mutekete, muakuidi neatangile mu mputa, ne bikala mputa kayi mutampakane, ne nsuki mitoke kabayiku, bielanganeye meji ne mputa kena ubuela mu munyinyi wa mubidi,

³³ nebamubeye, kadi nebashiye muaba wa mputa, ne muakuidi neamubueshe mu nsubu matuku muanda mutekete makuabo.

³⁴ Halua dituku dia muanda mute kete, muakuidi neatangile mu mputa, ne bikala mputa kayi mutampakane mu dikoba, ne kayi ubuela mu munyinyi wa mubidi, muakuidi neambile bantu ne, Muntu eu udi muakane, yeye neuvuwe bilulu biandi, neikale muakane.

³⁵ Kadi bikala mputa mutampakane hakashikisheye kudilengesha,

³⁶ muakuidi neamutangile, ne bikala mputa mutampakane mu dikoba, muakuidi kena ne bua kukeba nsuki mitoke tô, muntu eu kena muakane.

³⁷ Kadi bielanganeye meji ne mputa wakuamba kushika, ne nsuki mifike yakamueneka mu muaba eu, mputa wakuondahibua, ne muntu eu udi muakane, muakuidi neambile bantu ne, Muntu eu udi muakane.

³⁸ Bikala mulume anyi mukashi ne matoba matoke mu dikoba,

³⁹ muakuidi neamutangile, ne bi kala matoba au kâyi matambe kutoka tô, ei idi bu mpusu yakumueneka mu dikoba, muntu eu udi muakane.

⁴⁰ Bikala nsuki ya muntu mituke, ne bikaleye muena dibala, yeye udi muakane.

⁴¹ Bikala nsuki ya muntu ya ku mpala nubike, ne bikala mpala wandi ne dibala, yeye udi muakane.

⁴² Kadi biamueneka mputa mutoke tô ku mutu kua muena dibala, anyi ha mpala hadi dibala, edi ndisama dia nsudi diakumueneka ku mutu kua muena dibala anyi ha mpala hadi dibala.

⁴³ Muakuidi neamutangile, ne bikala tshiuja etshi tshitoke tô ku mutu kua muena dibala, anyi ha mpala hadi dibala, bu nsudi udi umueneka mu dikoba diandi,

⁴⁴ yeye udi muena nsudi, kena muakane, muakuidi neambile bantu ne, Muntu eu kena muakane, udi ne disama dia nsudi ku mutu kuandi.

⁴⁵ Muena nsudi eu neahande bilulu biandi, neashiye nsuki ya ku mutu kuandi tshianana, neabuikile mushiku wandi wa ha mutu, nêle mbila ne, Tshiena muakane, tshiena muakane.

⁴⁶ Neikale bu muntu udi kayi muakane tô matuku onso a disama diandi, yeye kena muakane, neashikame ha nkayandi ku butshika bua tshitudilu.

⁴⁷ Bilulu biakadiye nʼabi, nansha tshilulu tshiakenzabo ne miosa ya mikoko nansha tshilulu tshia lin,

⁴⁸ nansha mu milongo ya buludi nansha mu milongo ya butshiama ya miosa ya mikoko anyi ya lin, nansha mu tshiseba anyi mu tshintu tshiakenzabo ne tshiseba,

⁴⁹ bikala bintu bifike anyi bikunze mu tshilulu anyi mu tshiseba anyi mu milongo ya buludi anyi mu milongo ya butshiama anyi mu tshintu tshiakenzabo ne tshiseba, edi ndisama dia nsudi, nebaleshe disama edi kudi muakuidi.

⁵⁰ Muakuidi neatangile ha disama, neateke tshintu tshidi ne disama edi ha buatshi tô matuku muanda mutekete,

⁵¹ halua dituku dia muanda mutekete, yeye neatangile ha disama, bikala disama ditampakane mu tshilulu, nansha mu milongo ya buludi nansha mu milongo ya butshiama, nansha mu tshiseba tshidibo benza nʼatshi mudimu edi ndisama dia nsudi; tshintu etshi katshiena tshiakane.

⁵² Yeye neoshe tshilulu mu kahia, bikala disama mu milongo ya buludi anyi mu milongo ya butshiama ya bintu biakenzabo ne miosa ya mikoko anyi bia lin anyi tshintu tshia tshiseba, edi ndisama dia nsudi, neboshe tshintu atshi mu kahia.

⁵³ Biatangila muakuidi ne disama kadiena ditampakane mu tshilulu, nansha mu milongo ya buludi nansha mu milongo ya butshiama nansha mu tshintu tshia tshiseba,

⁵⁴ muakuidi neambile bantu ne, Nuvuwe tshintu tshidi ne disama, ne yeye neatshiteke ha buatshi matuku muanda mutekete makuabo.

⁵⁵ Hashikishabo kuvuwa tshintu atshi, muakuidi neatangile ne ditoba dia disama kadiyi diandamuke mekala, nansha bikaladi kadiyi ditampakane, tshintu atshi katshiena tshiakane, nebatshioshe mu kahia edi ndisama dia nsudi, bikala disama ku mutu kua muena dibala anyi ku mpala hadi dibala.

⁵⁶ Biatangila muakuidi ne disama diakuamba kushika hashikishabo kuvuwa tshintu atshi, yeye neahande tshituha tshia tshilulu anyi tshia tshiseba anyi tshia milongo ya buludi anyi tshia milongo ya butshiama tshidi ne disama.

⁵⁷ Bikala disama dishale mu tshilulu nansha mu milongo ya buludi nansha mu milongo ya butshiama anyi mu tshintu tshia tshiseba, disama edi didi ditampakana, neboshe tshintu atshi mu kahia.

⁵⁸ Biuvuwabo tshilulu nansha milongo ya buludi nansha milongo ya butshiama anyi tshintu tshia tshiseba, ne biajimina disama, nebatshiuvuwe musangu muibidi ne tshintu etshi netshikale tshiakane.

⁵⁹ Eu udi mukenji wa disama dia nsudi didi mu tshilulu tshiakenzabo ne miosa ya mikoko anyi ne bintu bia lin, nansha mu milongo ya buludi nansha mu milongo ya butshiama anyi tshintu tshia tshiseba, bua kutahulula tshintu tshidi tshiakane ne tshintu tshidi ka tshiyi tshiakane.